Yakapingula 3 - Amazwi Yakwe Leza 2013

Inko izyasile umu mpanga ilya iya Kenani

¹ Zii zili nko zino Yawe wasile kuti zyaezya aina Izlaeli, yao atamanyile ivya kulwa inkondo pa nkondo izyacitike mu Kenani.

² Yawe wacisile cico pamulandu wa kusambilizya cila nkulo zya ina Izlaeli ivya kulwa inkondo, makamaka kuli yao atamanyile vino yalwanga ku mpiti.

³ Yao asile mu mpanga ilya yali aikazi amu misumba isano ya ina Filisti, na ina Kenani yonsi, na ina Sidoni, na ina Hivi aikalanga mu myamba yaku Lebanoni. Ukutandikila lwaku Mwamba wa Baali Helimoni ukufika pa wingililo wa Lebo Hamati.

⁴ Yakwene aliyo yali nu kwezya aina Izlaeli, pakuti yalole ndi cakuti aina Izlaeli yangayela amalamulo yakwe Yawe nanti foo, yano wapile ivikolwe vyao ukupitila muli Mose.

⁵ Acino aina Izlaeli yatenzi apakasi ka ina Kenani, aina Hiti, aina Amoli, aina Pelizi, aina Hivi, na ina Yebusi.

⁶ Yatwalananga nu kupepa tuleza twao.

Ukulanda vyapali Otinieli

⁷ Aina Izlaeli yilila Yawe Leza wao, yiifya kunoli nu kupepa Baali na Asyela, tuleza tuluwi tutu.

⁸ Acino Yawe nawe pasi pakusokela aina Izlaeli alenga nu kuti Kusyani Lisyataimu, umwene waku Mesopotamya, ayacimvye. Wene wayateesile pa myaka cinani.

⁹ Lyene aina Izlaeli yalilile kuli Yawe, nga nawe ayatumila umuntu uwayatuuzile. Umuntu wii wali a Otinieli, umwana wakwe Kenazi, umuto wakwe Kalebu.

¹⁰ Umupasi wakwe Yawe iwikila panoli, nga nawe aya intunguluzi ya ina Izlaeli. Otinieli aya ku kulwa inkondo, nga Yawe aleka acimvya Kusyani Lisyataimu, umwene waku Mesopotamya.

¹¹ Umu mpanga ilya mwali umutende pa myaka amakumi yani, nga lyene Otinieli umwana umonsi wakwe Kenazi aca afwa.

Ukulanda vyapali Eudi

¹² Aina Izlaeli nupya yiifya pa manso yakwe Yawe. Pamulandu wakwe cii, Yawe aleka Egiloni umwene waku Moabu aye na maka ukuluta aina Izlaeli.

¹³ Egiloni iyuminkana pamwi na ina Amoni na ina Amaleke. Lyene iyacimvya aina Izlaeli nu kupokolola umusumba wa Yeliko, uwa tuncindu.

¹⁴ Egiloni umwene waku Moabu ateeka aina Izlaeli pa myaka ikumi na cinani.

¹⁵ Lyene aina Izlaeli iyalilila kuli Yawe, nga nawe ayatumila umuntu uwayatuuzile. Umuntu wi wali a Eudi, umwana wakwe Gela, uwamu mutundu wakwe Benjamini. Eudi waomvyanga ikasa limani. Aina Izlaeli yatumile Eudi kuli Egiloni umwene waku Moabu, ala asenzile amawila akumupeela.

¹⁶ Eudi waisulile na calimwi ulupanga ulunyolwe konsikonsi, nupya ulwatalimfile ukulingana mita wenga. Awe alunyepelela lwa kwi lunji lyakwe avimbilikizyapo ningo ni laya lyakwe.

¹⁷ Alino lyene atwala amawila yalya kuli Egiloni umwene waku Moabu, uwali umwine sana.

¹⁸ Lino Eudi wamupeela amawila, anena aonsi amusendile amawila kuti yaswilile kumwao.

¹⁹ Lelo Eudi umwisikulu asenuka lwapa tuluwi twa mawe pipi nu ku Giligali, nga aswilila ku Egiloni nga avwanga ati, “Mwene wakwisaci nkukwatile amazwi ya nkama.” Acino umwene wilya apeela ilamulo ku yaomvi yakwe ati, “Tale fumini mutusye swenga.” Nga nayo yonsi iyafuma panzi.

²⁰ Alino lyene Eudi aingila muno umwene Egiloni watenzi wenga sile, pa muputule wa papela pa kuumila kamuza. Lyene amunena ati, “Musambazi amazwi yano nkukwatile yafumile kuli Leza.” Umwene nawe akatuka pa cilimba.

²¹ Lyene Eudi afumya ulupanga lwakwe ukwi kasa lyakwe limani, luno wafisile mu lutungu lwa kuli ndilo, nga atota umwene wilya mu mala.

²² Ulupanga ilutuwila lonsi pyu umu mala, kumwi ni cilemelo cakuti na mafuta iyasilila apapela. Eudi atasomwile ulupanga mu mala.

²³ Lyene Eudi nawe afumila panzi, asya wafunga icisasa, aongoloka apita.

²⁴ Aomvi yalya yiiza yazana icisasa iciyalwe. Lelo iyelenganya ukuti umwene ali sile mukasi akuyazwilizya.

²⁵ Alino iyalolela ukulingana na lino yelenginye ukuti cafula. Lelo lino yalola ukuti atayuzile icisasa, iyaya iyatola imfungulo nu kuyula. Mumu amuno iyazana umusambazi wao wilya watapona pansi nupya umufwe.

²⁶ Eudi wapusile pa nsita ilya yonsi lino yalolelanga. Aya apuzya pa tuluwi twa mawe nga autukila ku Seila.

²⁷ Lino wafika kuku mu mpanga ya myamba yakwe Efulemu, alizya intandala kuti aame ivita vya ina Izlaeli ku kulwa. Lyene ayatungulula iyatentemuka umwamba pamwi nawe.

²⁸ Ayanena ati, “Ndondelini! Yawe watamupeela ucimvyo pa anisi inu, aina Moabu.” Acino iyalondela Eudi, iyatentemuka nu kupoka ilambwa lwa Luzi lwa Yodani pano aina Moabu yali nu kulambila. Yatatile umuntu nanti wenga kuti alambe.

²⁹ Uwanda ulya yakomile ivita vya ina Moabu ukulingana na mazimbi ikumi. Kusi nanti wenga uwapuswike.

³⁰ Uwanda ulya aina Izlaeli yacimvizye aina Moabu, cakuti mu mpanga ilya mwali umutende pa myaka amakumi cinani.

Ukulanda vyapali Syamugali

³¹ Intunguluzi iyalondelile pali Eudi a Syamugali, umwana wakwe Anati. Wene wacimvizye aina Filisti imyanda mutanda kuli swepu wakwe uwapangilwa nu musinda wakwe masaye. Nawe kwene watuuzile aina Izlaeli.