Yakapingula 21 - Amazwi Yakwe Leza 2013

Aina Benjamini yayalondela aci

¹ Lino aina Izlaeli yakongine ku Mizipa, yalafile yati, “Kutalaya nanti aumwi uwa munotuli uwakuti akatwalizye umwana umwanaci ku mwina Benjamini.”

² Alino antu yalya iyaya ku Betele, akuno iyalinda kasanya konsi pa manso yakwe Yawe mpaka na lino ilanzi lyawa, ala yakupunda nu kuilizyanya wakwe cimwi kuli Yawe yati,

³ “Pasi paulanda! We Yawe, Leza wa ina Izlaeli! Uzye pacani cino icintu cii cacitika mu mpanga ya ina Izlaeli, kuti ilelo umutundu wakwe Benjamini uye pipi nu kulowa mu mpanga ya ina Izlaeli?”

⁴ Katondotondo uwanda uwalondelilepo antu yalya iyakuula kavuwa kuku nga iyapeelelapo amawila yakoca na mawila autandano.

⁵ Alino aina Izlaeli iyuzya yati, “Uzye mu mitundu yonsi ya ina Izlaeli aweni atizile mu kukongana pa manso yakwe Yawe?” Pano yalavile nu mulapo ukalamba ukuti wensi atalazanwa ku ukongano kuli Yawe ku Mizipa alinzile ku komwa.

⁶ Acino aina Izlaeli iyuvwila aina yao ulanda, aina Benjamini. Yavwanga yati, “Ilelo umutundu onga wasukulwa ku ina Izlaeli.

⁷ Uzye lyene tumacita uli apakutwalizya aonsi amwakwe Benjamini yao ati yasyala, pasi pano twalaya mpiti nu mulapo kuli Yawe ukuti tutange tuyapomele ana itu anaci?”

⁸ Lyene iyuzya yati, “Uzye umutundu cii uwa ina Izlaeli uno utaile ku kukongana kuli Yawe ku Mizipa?” Yazanyile ukuti kutali umutundu umwi ukufuma ku Yabesyi Gileadi uwizile ku nkambi ku kukongana.

⁹ Pano lino yapenzile antu, yaweni ukuti aina Yabesyi Gileadi yatali penepo.

¹⁰ Acino iuvi lyatumile asilika amazimbi ikumi na yaili iyayanena ukuya ku Yabesyi Gileadi ku kukoma aikazi ya kweneko, aonsi, anaci nga na ana kwene.

¹¹ Iyalundapo nu kuti, “Muye mukakome umonsi wensi nu mwanaci wensi wino wamanya umonsi.”

¹² Apakasi ka ikazi yaku Yabesyi Gileadi yazanyile akazyana imyanda ini yano yatatala yamanya umonsi nanti wenga, nga iyayaleta ku nkambi yaku Syilo ku Kenani.

¹³ Lyene iuvi lyonsi ilituma intumi na mazwi ku ina Benjamini yano yali ku Ciliwe ca Limoni, izyakuya yandana nayo icuza.

¹⁴ Acino aina Benjamini iyawela pa nsita ilya, nga iyayapeela akazyana yalya amu Yabesyi Gileadi yano yatakomilwe. Lelo akazyana yatakumaniile.

¹⁵ Antu yalya yuvwila aina Benjamini uluse pamulandu wakuti Yawe walesile ikusyala icipongo mu mitundu ya ina Izlaeli.

¹⁶ Lyene aikolo yi uvi yavwanga yati, “Kutasiile anaci nayauze mu mutundu wakwe Benjamini. Uzye lyene tumacita uli pakuti tulondele aonsi asyala anaci, kuti yaye aci yao?

¹⁷ Aina Benjamini asyalapo yalinzile ukukwata impyanyi pakuti umutundu onga uwamu mitundu ya ina Izlaeli utaloviwa.

¹⁸ Lelo kwene swemo tutange tuyapeele ana itu anaci kuti yaye aci yao, pamulandu wakuti swe ina Izlaeli twatitulapa nu mulapo ukuti umuntu ali wensi aalapeela umwina Benjamini umwanaci kuti aye umuci, wene akawe nalyo.”

¹⁹ Alino iyelenganya yati, “Lolini, kwasya kuye ukuzevya kwa cila mwaka ukwa kucindikilamo Yawe ku Syilo, lwaku katutu kakwe Betele, ku ufumondaka wa museo uwafuma ku Betele nu kuya ku Syekemu, na lwaku kaeya kakwe Lebanoni.”

²⁰ Acino iyanena aina Benjamini yati, “Yangini mukafisame mu vyalo vya matingi

²¹ mule mukucevya. Lino akazyana aku Syilo yafumila ukunzi ku kwizacina, lyene muce mufisamuke ulwilo nu kuyavwangatila. Cila muntu ace asemye wenga mu ina Syilo pakuti angaya umuci wakwe nga aye ku mpanga ya ina Benjamini.

²² Lino yaisi nanti yakalume yao yalailizyanya kunotuli, tulayanena tuti, ‘Tuvwilini uluse pa kuyasunga, pamulandu wakuti swemo tutayalondile aci mu nsita ya nkondo, nga namwe musi nu mulandu pali ci, pasi pano mutapiile ana inu anaci kunoyali.’ ”

²³ Fwandi avili vino aina Benjamini yacisile. Lino akazyana yakucina, cila monsi alema wenga alino amusemya aya umuci wakwe. Lyene iyaswilila ku mpanga yao nu kukuululula imisumba yao nga iyikala mwenemo.

²⁴ Pa nsita ilya aina Izlaeli iyafuma ku cifulo cici iyaya kumwao, cila muntu aya ku mutundu wakwe nu ku luko lwakwe, nu ku caupyanyi cakwe.

²⁵ Mu manda yalya aina Izlaeli yatakweti umwene. Cila muntu wacitanga cino walola ukuti camuzipila.