Yakapingula 20 - Amazwi Yakwe Leza 2013

Aina Izlaeli yalwa na aina Benjamini

¹ Lyene aina Izlaeli yonsi pali pakukatuka ukufuma ku Dani ukufika ku Belisyeba nu ku mpanga ya Gileadi, iyasya uwikalo wao yiiza iyakongana wa muntu wenga pa manso yakwe Yawe ku Mizipa.

² Intunguluzi zya antu yonsi amu mitundu iya ina Izlaeli apano zyali pa ukongano uu uwi uvi lya antu yakwe Leza. Asilika yonsi pamwi apitanga pa ngazo yali amazimbi imyanda ini, yao alwilanga ni mpanga.

³ Aina Benjamini iyuvwa ukuti aina Izlaeli yatiyakongana ku Mizipa. Lyene aina Izlaeli yavwanga yati, “Ale tunenini vino impulupulu ii yacitike.”

⁴ Acino umwina Levi uwali iya wa mwanaci wilya, uwakomilwe, avwanga ati, “Nene pamwi nu muci wane namuze twizile ku Gibeya mu mpanga yakwe Benjamini kuti tulaleko indo.

⁵ Aina Gibeya iyankatukila usiku iyalizizya ing'anda, iyampangila ukunkoma. Iyalema umuci wane namuze ku maka nu kwifya nawe, mpaka iyamulenga ukufwa.

⁶ Nane ali vino natoozile umuci wane namuze, imuputola mu vipimfya nga intuma cila cipimfya ku mutundu pa mitundu yonsi iya ina Izlaeli, pamulandu wakuti yene yacita icintu cii icawinyi nupya icamuzewanya mu mpanga ya ina Izlaeli.

⁷ Lyene cili kunomuli mwe ina Izlaeli mwensi, elenganyini mupinguzyanye pali vino mumacita.”

⁸ Antu yonsi pali pakukatuka wa muntu wenga, nga yavwanga yati, “Tutalola nanti wenga uwakuya ukwakwe, ciye akaikala mu nsakwe nanti mu ng'anda.

⁹ Lelo vii avili vino tumacita ku ikazi yaku Gibeya: tumapendola pakuti tulole vino tumayazanza.

¹⁰ Tumatola antu ikumi lyonga cila pa antu umwanda onga ukufuma mu mitundu yonsi ya ina Izlaeli, nga na pa antu izimbi lyonga napo itutola umwanda onga, na pa antu amazimbi ikumi napo itutola antu izimbi lyonga, yao ali yakalonda ya vyakulya ivyakulisya ivita. Lyene lino ivita vilafika ku Gibeya mu mpanga yakwe Benjamini vilacita icilanduzi pa ukakasi wao uno yacisile mu Izlaeli.”

¹¹ Acino aina Izlaeli yonsi iyakongana pamwi nga iyumana akapi, alino yazanza umusumba ulya.

¹² Amu mitundu iya ina Izlaeli iyatuma antu ku aina Benjamini yonsi, yati, “Uzye impulupulu ci ino mwacita pakasi kinu?

¹³ Lyene letini yakacita yampulupulu amu Gibeya kunotuli pakuti tuyakome nga tusisye inkota ii mu mpanga ya Izlaeli.” Lelo amu mutundu wakwe yakanyile ukuvwa ku yauze aina Izlaeli.

¹⁴ Lyene iyafuma mu misumba yao yonsi iyakongana ku Gibeya ku kuyalwisya aina Izlaeli.

¹⁵ Pa wanda ulya amu mutundu wakwe Benjamini yakonganika asilika amazimbi amakumi yaili na mutanda yano yali na malupanga ukufuma mu misumba yao, ukwikapenepo antu imyanda cinimbali asolwilwe ukufuma mu ikazi yamu Gibeya.

¹⁶ Mwi umba kwene lilyo umwali antu imyanda cinimbali asolwilwe, yao akaomvya kamani. Cila wenga muli ya yali namalunga pakuomvya amalegeni ukwaula kupusa nanti ulunyele.

¹⁷ Aina Izlaeli asyala, ukufumyako aina Benjamini, nayo yakonganika antu amazimbi imyanda ini yano yali na malupanga, nupya yonsi kwene yali asilika.

Aina Izlaeli yalwa na ina Benjamini

¹⁸ Aina Izlaeli pali pakuya ku Betele nu kuuzya Leza yati, “Uzye umutundu cii ulinzile kuya uwankolelo ukuzanza aina Benjamini?” Yawe nawe aasuka ati, “Umutundu wakwe Yuda ulinzile kutandikilapo ukuya kweneko.”

¹⁹ Akatondo uwanda uwalondelilepo aina Izlaeli iyakatuka iyaya iyakuula insakwe pipi nu ku Gibeya.

²⁰ Aina Izlaeli iyafuma iyaya ku kulwisya amu mutundu wakwe nga iyayateyamila ku Gibeya.

²¹ Pa wanda ulya amu mutundu wakwe iyafuma kunzi ya musumba wa Gibeya nu kukoma aina Izlaeli amazimbi amakumi yaili kuku kwene kuno yalwilanga.

²² Lelo aina Izlaeli iyakomelezyanya nga nupya kwene iyaya mu ncende zizi kwene zino yali mwenemo pa wanda wakutandika.

²³ Aina Izlaeli iyatumbela ku Betele, kuno yaile iyalosya pa manso yakwe Yawe ukufika na lino ilanzi lyawa, nga iyuzya Yawe yati, “Uzye nupya kwene tumaswilila ku kulwisya aina itu aina Benjamini?” Yawe aasuka ati, “Ee, yangini mukayalwisye.”

²⁴ Alino pa wanda wakwe ciili aina Izlaeli nupya iyakatuka iyaya ku kuzanza amu mutundu wakwe.

²⁵ Ni ila kwene lii, lino aina Benjamini yafuma mu Gibeya ku kwiza lungatana nayo, iyakomola aina Izlaeli nayauze ukulingana amazimbi ikumi na cinani, yonsi kwene ala yatiyaipangasya impanga.

²⁶ Lyene aina Izlaeli, antu yonsi kwene, iyaswilila ku Betele, nga kuku pasi pakulosya pa manso yakwe Yawe. Uwanda ulya yatalile nanti kamwi ukufika nalino ilanzi lyawa nga yapeela Yawe amawila yakoca nga na mawila ya utandano.

²⁷ Alino aina Izlaeli iyuzya Yawe. (Pa manda yalya Mbokosi ya Upangano yakwe Yawe yali kuku,

²⁸ nu waisunganga wali a Pineasi umwana wakwe Eleaza, umwana wakwe Aloni.) Aina Izlaeli iyuzya Yawe yati, “Uzye nupya kwene tuye tukalwisye aina itu aina Benjamini nanti tute sile?” Yawe nawe aasuka ati, “Ee, yangini mukayalwisye. Mutondo indayapeela mu makasa inu.”

²⁹ Acino aina Izlaeli yika antu akufisama ukulizya Gibeya.

³⁰ Lyene mu wanda uwalenga yatatu iyaya yayazanza amu mutundu wakwe. Wakwe vino yakacita lyonsi iyatantamika asilika yao ukulungamana na Gibeya.

³¹ Aina Benjamini nayo pali pakufuma mu musumba yiiza ku kuyakomenkanya, nga avino yayafumizye mu musumba. Wakwe vino cayanga lyonsi iyatandika kukoma aina Izlaeli yamwi yamwi, cakuti antu yano yakomile mu vyalo nu mu museo uwaya ku Betele nu waya ku Gibeya yali manye amakumi yatatu.

³² Lino amu mutundu wakwe yakuti, “Tukuyacimvya wakwe vino tukayacimvya lyonsi.” Lelo aina Izlaeli nayo yala yakuti, “Lekini tuutukile ku cisila pakuti aina Benjamini yafuntuke sana ku musumba nga yize mu miseo.”

³³ Ivita vya ina Izlaeli vyonsi ivifuma mu vifulo muno vyali iviwelela icisila ku Baali Tamala, nga aina Izlaeli ateyamile nayo iyasokoloka lwaku uwondaka wakwe Geba iyasimula ku kuzanza.

³⁴ Lyene ivita amazimbi ikumi lyonga ivyasololwa mu vita vya ina Izlaeli yazanza umusuma wa Gibeya. Ulwi iukoma wakwe cimwi cakuti aina Benjamini yatamanyile ukuti yasya yakomwe.

³⁵ Yawe acimvya amu mutundu wakwe pa manso ya ina Izlaeli, nga pa wanda ulya aina Izlaeli yakomile amu mutundu wakwe amazimbi amakumi yaili na yasano nu mwanda onga, yonsi kwene ala yatiyaipangasya impanga.

³⁶ Lyene aina Benjamini iyasininkizya ukuti yatiyacimviwa. Lyene impuka ikulu ya ina Izlaeli yafuntukile ku cisila, pamulandu wakuti yasintilile muli yao yano yafisamile aikazi amu Gibeya.

Vino aina Izlaeli yacimvizye

³⁷ Yao afisime ali yano yasimwilile mu Gibeya, iyasalangana monsi kwene nu kukomola aikazi amu musumba ulya.

³⁸ Aina Izlaeli yuvwanyile ni vita ivyafisime ukuti yali nu kutumula umoto nga yafika mu musumba kuti icunsi papela ciye icimanyililo,

³⁹ nga lyene ivita ivyali kuno yalwilanga vili nu kusenuka yatandike nu kulwa. Walanga aina Benjamini yatiyakoma aina Izlaeli manye amakumi yatatu, nga yavwanga yati, “Tukuyacimvya wakwe vino cali pa ulwi wankolelo.”

⁴⁰ Lelo lino icunsi catandika ukukatuka papela mu musumba, aina Benjamini iyasenuka nga iyalola icunsi camu musumba ulya cikukwela papela.

⁴¹ Lyene aina Izlaeli iyasenukila kunoyali, nga aina Benjamini iyazakaza ku ntete, pamulandu wakuti yamanyile ukuti yasya yakomwe.

⁴² Caleka iyutuka ukufuma ku ina Izlaeli iyalungama ku lwanga, lelo kutali kuno yangaya. Lyene aina Izlaeli afumanga mu misumba iyayakomola kuku kwene.

⁴³ Aina Izlaeli iyaliizizya aina Benjamini, iyayacocovya kufika mu pipi nu ku Gibeya lwaku ufumondaka, yala yakuyakomola nzila yonsi.

⁴⁴ Aina Benjamini afwile yali amazimbi ikumi na cinani, yonsi kwene yali ivita ivipame.

⁴⁵ Lino aina Benjamini iyasenuka nu kusimwila lwaku lwanga kwi We lyaku Limoni, aina Izlaeli iyakomola antu mu miseo ukulingana amazimbi yasano. Alino iyatwalilila kucocovya aina Benjamini asile ukufika nu ku Gidomu nga iyakomola antu nayauze amazimbi yaili.

⁴⁶ Pa wanda ulya asilika aina Benjamini amazimbi amakumi yaili na yasano yakomilwe, yonsi kwene yali ivita ivipame.

⁴⁷ Lelo antu imyanda mutanda yasenwike nu kuutukila mu lwanga kwi We lya Limoni, nga yatenzi kuku kwene pa myezi ini.

⁴⁸ Lyene aina Izlaeli iyaswilila ku kupezya aina Benjamini yauze, iyakomola aikazi amu misumba ni ng'ombe, nga ni ciumbwa consi cino yazana. Nu koca imisumba yonsi ino yazanyile kuku.