Yakapingula 2 - Amazwi Yakwe Leza 2013

¹ Umungeli wakwe Yawe afuma ku Giligali aya ku Bokimu nga avwanga ati, “Namufumizye mu Eguputo nu kumutungulula ku mpanga ino nalavile kupeela ku vikolwe vinu. Mvwanzile inti, ‘Intalatala mfutatile upangano wane uno napangine namwe.

² Acino namwe kwene mutakezye kupangana na antu amu mpanga ii, lelo muce monone utuvuwa twao.’ Nga nalyo kwene mwemo mwakana ukunjela. Uzye pacani cino mwacita cino namulesizye?

³ Acino lyene nkamunene. Ntalazinga imitundu iyo pa nkolelo inu. Yene yala anisi inu, nga kupepa tuleza twao kulaya iciteyo kunomuli.”

⁴ Lino umungeli wakwe Yawe wamala ukulanda ivintu vii ku ina Izlaeli, yonsi kwene iyalila nu kupooma,

⁵ nga iyatemela incende ilya yati pa Bokimu Kuku kwene akuno yapeela impolelwa kuli Yawe.

Imfwa yakwe Yoswa

⁶ Yoswa apali pakunena aina Izlaeli ukusalangana, nga iyaya ku mpanga ilya, cila muntu aya ku kuwaka impanga ino umwisikulu wapelwa.

⁷ Antu yatumikile Yawe pa nsita yonsi ino Yoswa na ikolo amukulilile ali apuma, yonsi kwene yano yaweni ivintu ivikulu vino Yawe wacitile aina Izlaeli.

⁸ Yoswa umwana umonsi wakwe Nuni, nupya umuomvi wakwe Yawe, afwa lino ali ni myaka umwanda ni kumi lyonga.

⁹ Nga iyamuzika mu mpanga yakwe ino yamupile ukuya icaupyanyi cakwe, umu Timunati Helesi, lwaku katutu ka Mwamba wa Gaasyi, umu mpanga ya myamba yakwe Efulemu.

¹⁰ Lino antu amu mukulo ulya yafwa yonsi, inkulo iyalondelile penepo yilile Yawe na vyonsi vino Yawe wacitile aina Izlaeli.

Aina Izlaeli yata ukupepa Yawe

¹¹ Lyene aina Izlaeli iyacita inkota pa manso yakwe Yawe nu kutumikila tuleza tu Baali.

¹² Aina Izlaeli iyatazyela Yawe, Leza wa vikolwe vyao, wino wayafumizye umu Eguputo. Iyalondela nu kupepa tuleza tuze utwa antu atenzi umu mpanga iyazingulwike. Apa kufukamila tuleza tutu yene iyalenga Yawe ukusoka.

¹³ Yene iyatazyela Yawe nu kutumikila maunkolanya yakwe Baali na yakwe Asyitaloti.

¹⁴ Nawe Yawe pasi pa kusokela aina Izlaeli nga ayapeela mu makasa ya azanzi nayo iyayasampa vyonsi vino yakweti. Wene wayisile mu maka ya anisi yao ukuzinguluka konsi, nga yatali na maka akuyacimvya nupya.

¹⁵ Lyene lyonsi lino aina Izlaeli yaya ku kulwa, Yawe ayaletela uzanzo, wakwe vino walafile kunoyali nu mulapo. Fwandi lyonsi yikalanga akungumale.

¹⁶ Alino lyene Yawe ayapeela intunguluzi izyakuti zyayataasya lino yazanzwa na azanzi yalya.

¹⁷ Lelo nalyo kwene aina Izlaeli yatuvwilanga intunguluzi zizi. Pasi pano yene yacisile ngati uzelele pa kufukamilanga tuleza tuze nu kutupepa. Ivikolwe vyao vyayezile amalamulo yakwe Yawe, lelo antu amu mukulo uu yene zuwazuwa yata ukuyela.

¹⁸ Lyonsi lino Yawe wapeela aina Izlaeli intunguluzi, wene wali pamwi ni ntunguluzi ilya nga ayatuula ku anisi yao umu nsita yonsi iya umi wa ntunguluzi ilya. Pasi pano Yawe wali na mizu panoyali lino yakunyunguluka pa kuzunyiwa nu kucuziwa na anisi yao.

¹⁹ Lelo lino intunguluzi ilya yafwa, yene iyaswilila ku miyele iipisye ukuluta iya vikolwe vyao, yala yakulondela nu kutumikila nu kupepa tuleza tuze. Yene iyakana ukuta ivicitwa vyao ivyankota ni miyele yao iyakutalama.

²⁰ Caleka Yawe pasi pa kusokela aina Izlaeli nga avwanga ati, “Pamulandu wakuti uluko luu lwatilonona upangano wane uno napiile ilamulo ku vikolwe vyao kuti visunge, nga nayo yakana ukunguvwila,

²¹ lyene ntalatala njazingile uluko nanti longa pali zino Yoswa wasile lino atacili afwe.

²² Namaziomvyanga pa kwezya aina Izlaeli kuti indole ndi cakuti yene yakaalondela inzila zyakwe ne Yawe wakwe vino vikolwe vyao vyacitanga.”

²³ Acino Yawe azumilizya inko zizi kusyala mu mpanga ilya. Wene atazizinzile lilyo kwene nanti ukuzipeela mu makasa yakwe Yoswa.