Yakapingula 17 - Amazwi Yakwe Leza 2013

Tuluwi twakwe Mika

¹ Mu manda yalya kwaliko umuntu wino yatemile izina yati a Mika, uwafumile ku mpanga yakwe Efulemu, impanga ya myamba.

² Anena nyina ati, “Uzye ukwiusya ulupiya lwakwe siluva luno yakwivile nupya ulwali ukulingana ni myanda ikumi na onga, nga navino nuvwile kuno ukutipwila umwivi? Impiya zizyo anene ndi nazyo. Nene natoozile.” Lyene nyina amunena ati, “Si Yawe akupolelele, mwanane!”

³ Alino nawe awezezya nyina ulupiya lulu, nga nyina avwanga ati, “Napaatwila Yawe siluva wane pakuti ulutipu lutaponela umwana wane umonsi kuti awaze akaluwi nu kukapomela na siluva. Acino ndakai namakuwezezya impiya zii zyakwe siluva.”

⁴ Acino awezezya nyina impiya zizi zyakwe siluva, nga nawe atoola impiya zyakwe siluva ukulingana imyanda iili apeela yasimusyanyi, nga nayo iyazisungulula nu kupanga ukolanya na kaluwi. Alino iyavika mu ng'anda yakwe Mika.

⁵ Lyene umuntu wi Mika wakweti icifulo cakwe icakupepelapo, nga wapanzile ni cakuzwala ca efodi nu tuluwi nga aika umwana wakwe umwi pali usimapepo.

⁶ Mu manda yalya mu Izlaeli mutali umwene. Cila muntu wacitanga cino umwisikulu atemilwe.

⁷ Kwali kweneko umulumendo umwi umwina Levi uwamu mutundu wakwe Yuda. Wene wafumile ku Betelemu mu mpanga yakwe Yuda.

⁸ Wene afuma mu musumba ulya aya ku kulondalonda icifulo cuze ica kwikalamo. Lino acili pa ulendo wakwe, asuka afika ku ng'anda yakwe Mika mu mpanga ya myamba yakwe Efulemu.

⁹ Alino Mika amuuzya ati, “Uzye wafuma kwi?” Nawe aasuka ati, “Nene mwina Levi nupya mfumile ku Betelemu mu mpanga yakwe Yuda. Nzusile nkulonda icifulo ica kwikalamo.”

¹⁰ Mika pali pakumunena ati, “Ndu waikala nani, uye umulangilizi na simapepo wane, nga nani namakulipilanga impiya zyakwe siluva ikumi lyonga pa mwaka nupya namakuzwikanga nu kukwimula.”

¹¹ Acino umwina Levi wilya azumila ukwikala nawe, nga kunoli umulumendo wali wa mwana wakwe umonsi, umwana kazi.

¹² Lyene Mika aika umulumendo wilya pali usimapepo, nga aya a simapepo wakwe nupya aikala mu ng'anda yakwe.

¹³ Mika pali pakuvwanga ati, “Awe lyene namanya ukuti Yawe alancitila ivisuma, pasi pano naya na simapepo wi umwina Levi.”