Yakapingula 15 - Amazwi Yakwe Leza 2013

¹ Walanga papita insita, umu nsita ya kuzombola ingano, Samusoni asenda kambuzi aya ku kutandalila umuci wakwe. Avwanga ati, “Nkulonda inje ku muci wane ku muputule uno akasendamamo.” Lelo sivyala amukanya ati,

² “Ntatwisike ukuti wemo wapata umuci wako wakwe cimwi, acino namupiile kuli cuza wako. Uzye umuto asi umuyembe ukuluta aliwe? Cingazipa awino utole.”

³ Lelo Samusoni ayanena ati, “Lii lyene ntamapelwa umulandu pali vino namacita ku ina Filisti! Cumi kwene namayacitia icikakate.”

⁴ Acino Samusoni aiza afuma nu kuyalema yankusa imyanda itatu nu kuyanyepenkanya yaili yaili ku misinda yao. Alino pa mafundo ya misinda apano anyepelela ulwenge.

⁵ Alino atumula ivyenge nga aleka yankusa iyasimwila mu vyalo vya ngano vya ina Filisti. Fwandi avili vino osile ingano izisi zisinze kumwi nzisinze, nga na matingi kumwi ni miti ya miolivi.

⁶ Lino aina Filisti yuzya yati, “Aweni uwacita cii?” Iyayasuka yati, “A Samusoni, sivyala uwa mwina Timinaa, pamulandu wakuti sivyala watola umuci wakwe nu kumupeela kuli cuza wakwe Samusoni.” Acino aina Filisti iyapita iyaya yoca umuci wakwe kumwi na isi mpaka iyafwa.

⁷ Samusoni ayanena ati, “Ata, ali vino mwacita! Fwandi nani ntalata mpaka insuke ndandule.”

⁸ Alino ayazanza icikalale, akoma aingi wakwe cimwi. Lyene atentemuka aya aikala mwi cele mwi we lyaku Etamu.

Samusoni wacimvya aina Filisti

⁹ Aina Filisti iyatumbela iyaya yakuula insakwe mu mpanga yakwe Yuda, nga yazanza umusumba wa Leii.

¹⁰ Antu amu Yuda yuzya yati, “Uzye pacani cino mwiza ku kutulwisya?” Nayo yaasuka yati, “Twizile lema Samusoni, kuti tumucitile vino wene watucitile.”

¹¹ Acino antu amazimbi yatatu afumile ku mpanga yakwe Yuda iyatentemukila kwi cele lyaku Etamu nga iyaya iyanena Samusoni yati, “Uzye utamanya ukuti aina Filisti yakatuteeka? Fwandi icintu camusango ci cino watucitila?” Samusoni nawe aasuka ati, “Nemo nayacitile sile vino yancitile.”

¹² Nayo iyamunena yati, “Twatitwiza kuti tukunyepe nu kukupeela ku ina Filisti.” Samusoni nawe ayanena ati, “Lapini ukuti musikunkoma mweisikulu.”

¹³ Nayo iyazumilizyanya yati, “Awe, tutakukukoma. Lelo tumakunyepa sile nu kukupeela ku ina Filisti.” Acino iyamunyepa ni myando iili ipya nga iyafuma nawe mwi cele mwi we iyamusenda.

¹⁴ Lino Samusoni wafika ku Leii, aina Filisti iyamukomenkanya yala yakupunda ucimvyo. Lelo Umupasi wakwe Yawe iwikila panoli iumupela amaka, nga atankola imyando ino yamunyefile ku makasa wa usavu uwapya ku moto, nga ilukuta ku makasa yakwe.

¹⁵ Lyene Samusoni kuno ati, alola uluzekete lwakwe punda uwacifwile, nga alusola nu kukomelako antu izimbi lyonga.

¹⁶ Samusoni pali pakuilumba mu lwimbo ati, “Ku luzekete lwakwe punda natinjatulika mu mutumba. Ku luzekete lwakwe punda natinkoma antu izimbi lyonga.”

¹⁷ Lino wamala kuvwanga vii, asumba luzekete lulu. Ni ncende ilya iyaitemela izina yati Lamati Leii.

¹⁸ Lyene Samusoni auvwa ulusala wakwe cimwi, nga alaizya kuli Yawe ati, “Watupela umuzya wako ucimvyo uu ukulu. Uzye lyene imfwe ku lusala nu kupelwa mu makasa ya antu atasilamulwa?”

¹⁹ Lyene Yawe atulula pa cifoloma camu Leii nga amanzi iyafuma. Samusoni amwa amanzi nga nupya auvwa amaka nu mwenzo iuwela. Caleka kafukoka kaka yakatemile izina yati a Eni Hakole, nga na pilelo kwene kacili ku Leii.

²⁰ Samusoni watungulwile aina Izlaeli pa myaka amakumi yaili mu manda ya ina Filisti.