Yakapingula 14 - Amazwi Yakwe Leza 2013

¹ Samusoni atentemukila ku Timinaa nga kuku kwene akuno alola umukazyana umwi umwina Filisti.

² Lino wawelulwike, anena isi na nyina ati, “ku Timinaa natindolako umukazyana umwi umwina Filisti. Nkulenga mumundetele awino ntwale.”

³ Lelo akwasi yakwe iyamukanya yati, “Uzye mu akazi kako nu mu antu yako mutange muzanwe umukazyana wino ungatwala? Uzye pacani cino ungaya ku kutwala umwanaci uwamu ina Filisti yano yatasilamulwa?” Lelo Samusoni anena isi ati, “Ndetelini wiyo kwene, pano ali wino ntemilwe sana.”

⁴ Nga lelo akwasi yakwe yatamanyile ukuti icintu cico cikufuma kuli Yawe, pano umuli muno Yawe walondanga umwakusonkela aina Filisti. Pasi pano pa nsita ilya aina Filisti yateekanga aina Izlaeli.

⁵ Acino Samusoni atentemukila ku Timinaa, ale yali na akwasi yakwe. Lino yapalama ku vyalo vya matingi ivyaku Timinaa, auvwa kacilume kakwe cisama kakumung'anzila kala kakwiza kunoli.

⁶ Umukupumikizya umupasi wakwe Yawe wikila panoli na maka cakuti akalema nu kukalepola ni minwe mitupu wakwe vino angalepola kambuzi. Lelo Samusoni atanenyile isi nanti nyina pali vino watacita.

⁷ Lyene atentemuka aya alanzya umukazyana, nu kumutemwa amutemwa.

⁸ Pacisila ca manda yanono, lino Samusoni akuwela ku kutwala umukazyana wilya, apaluka kuti alole icitumbi cakwe cisama. Lyene alola inzimu zikwingila mu citumbi cakwe cisama, nga nu uci amuno wali.

⁹ Apandila uuci umwi mu makufi ya makasa yakwe nga afuma akulya. Lino wafika ku akwasi yakwe, ayapeela uuci nayo iyalyako. Lelo nalyo kwene atayanenyile ukuti wali waupanda mu citumbi cakwe cisama.

¹⁰ Lyene isi atentemuka ku kulola umukazyana wilya. Nga Samusoni acita icimulo kuku, wakwe vino cali ica lutambi lwakwe yalumbwe.

¹¹ Lino antu yalya yalola Samusoni iyamupeela alumendo amakumi yatatu akwikala nawe.

¹² Samusoni ayanena ati, “Lekini imucolekele akacole. Ndi cakuti mungilula pa manda kwene yaa cinimbali ya cimulo, indamupeelako insalu amakumi yatatu izitelepelele nga ni nsalu zyakucinja nazyo amakumi yatatu.

¹³ Lelo ndi mutange mucolokolole, ale lyene mulinzile kumpela insalu amakumi yatatu izitelepelele nga ni nsalu zyakucinja nazyo amakumi yatatu.” Alino iyamunena yati, “Ale tucoleke, tuvwe!”

¹⁴ Nawe ayanena ati, “Mu cintu cimwi icikalya, mwafumile icakulya. Mu cintu cimwi icikome, mwafumile icilyompe.” Alino ipapita amanda yatatu ale yakusikinsya, lelo iyaposiwa.

¹⁵ Pa wanda uwalenga yani iyanena umuci wakwe Samusoni yati, “Si zembeleka uwako akunene ivyakucolokola kunotuli, ndi cisi vivyo tumakoca kumwi na ang'anda yakwe so mpaka mufwe. Uzye fwandi watwamile kuno kuti wize utwiye ivyuma?”

¹⁶ Acino umuci wakwe Samusoni aya kuli Samusoni ala akulila, nga amunena ati, “Fwandi wampata! Cumi kwene utantemwa, awe. Wacolekela antu yane akacole kano yatange yacolokolole.” Samusoni nawe amunena ati, “Ntatala nanena tata na mayo icintu ci. Uzye lyene wewe ninganena icintu cico?”

¹⁷ Lelo umukazyana wilya alu kumulilila pa manda cinimbali ya cimulo. Acino pa wanda uwalenga cinimbali asuka amunena, pamulandu wakuti wamupamvizye sana. Alino umukazyana wilya aya anena aina Filisti muno kacole kalozile.

¹⁸ Acino pa wanda uwalenga cinimbali lino ilanzi litali liwe aonsi amu musumba iyamunena yati, “Uzye icani icalyompa ukuluta uuci? Uzye icani icingakoma ukuluta cisama?” Samusoni nawe aasuka ati, “Imukana ukulalima na nyina ng'ombe wane, nalikwene ngano mucili ukwaula ukwilula.”

¹⁹ Lyene mukupumikizya umupasi wakwe Yawe wikila na maka panoli. Alino atentemukila ku Asyikeloni, akuno aya akoma antu amakumi yatatu,

²⁰ Umuci wakwe Samusoni wapilwe kuli cuza wakwe uwali umukalamba wa winga wakwe.