Yakapingula 12 - Amazwi Yakwe Leza 2013

Ukulanda vyapali Yefuta na ina Efulemu

¹ Aonsi aina Efulemu iyaiteyanya ku kulwa inkondo, nga iyalamba Luzi lwa Yodani iyaya ku Zafoni alino iyanena Yefuta yati, “Uzye pacani cino walamvile umupaka kuti ukalwisye aina Amoni ukwaula ukutwama kuti tupite namwe? Tuli nu kukocela mu ng'anda umwako.”

² Yefuta nawe ayaasuka ati, “Nene na antu yane twali pa ncito imwi ikanzane umukulwisyanya na ina Amoni nga lelo nanti angala twamwamile, mwemo mutizile ku kututuula sweswe ku ina Amoni.

³ Lino naweni ukuti mwemo mutali akwiza twazwa, ali lino nemo naisitike nemwisikulu nu kulamba ku kulwisya aina Amoni. Yawe nawe pali pakumpela ucimvyo pa ina Amoni. Uzye lyene pacani cino ilelo mwiza ku kundwisya?”

⁴ Yefuta pali pakuya konganika aina Gileadi nga iyalwisya aina Efulemu, nga aina Gileadi iyacimvya amu mutundu wakwe Efulemu pamulandu wakuti aina Efulemu yavwanzile yati, “Mwe ina Gileadi mwemwe mbutusi izyafumile pakasi ka ina Efulemu na ina Manase.”

⁵ Alino aina Gileadi iyaya yatengamila api lambwa lya Luzi lwa Yodani, umungafyontela aina Efulemu. Lino umwina Efulemu ali wensi wino wutuka wiza ku kulamba ndi wavwanga wati, “Lekini ndambe,” ale aina Gileadi yamamuzya yati, “Uzye wewe uwamu mutundu wakwe Efulemu?” Ndi cakuti wene waasuka wati, “Awe.”

⁶ Nayo iyamunena yati, “Icisuma yame, ale landa uti, ‘Shiboleti.’ ” Ndi cakuti wavwanga wati, “Syiboleti,” pamulandu wakuti atange alande izwi ningo, lyene yene iyamulema nu kumukoma papa kwene api lambwa lya Luzi lwa Yodani. Pa nsita ilya amu mutundu wakwe Efulemu akomilwe yali amazimbi amakumi yani na yaili.

⁷ Yefuta watungulwile aina Izlaeli pa myaka mutanda. Lyene pacisila Yefuta afwa, nga iyamuzika mu musumba wakwe mu Gileadi.

Kulanda ivyapali Ibizani, Eloni na Abidoni

⁸ Pacisila cakwe Yefuta, Ibizani uwaku Betelemu uwizile aya katungulula wa ina Izlaeli.

⁹ Wene wakweti ana aonsi amakumi yatatu na anaci amakumi yatatu. Wene watwalizye ana yakwe anaci ku onsi angolongolo, nga alonda na akazyana angolongolo amakumi yatatu akuti yasakwe ku ana yakwe aonsi. Ibizani wateesile aina Izlaeli pa myaka cinimbali.

¹⁰ Lyene pacisila Ibizani afwa, nga iyamuzika mu musumba wa Betelemu.

¹¹ Pacisila cakwe Ibizani, Eloni umwina Zebuluni wizile aya katungulula wa ina Izlaeli pa myaka ikumi.

¹² Lyene Eloni afwa, nga iyamuzika ku Aiyaloni mu mpanga yakwe Zebuluni.

¹³ Pacisila cakwe Eloni, Abadoni umwana wakwe Hileli uwaku Pilatoni, uwizile aya katungulula wa ina Izlaeli.

¹⁴ Wene wakweti ana aonsi amakumi yani na izikulu amakumi yatatu, nga cila wenga pali yaa wakwelanga pali punda wakwe umwisikulu. Abidoni watungulwile aina Izlaeli pa myaka cinani.

¹⁵ Lyene Abadoni umwana wakwe Hileli afwa, nga iyamuzika ku Pilatoni mu mpanga yakwe Efulemu, impanga iya ina Amaleke ya myamba.