Yakapingula 10 - Amazwi Yakwe Leza 2013

Ukulanda vyapali Tola

¹ Pacisila ca mfwa yakwe Abimeleki, Toola umwana wakwe Puwa nu mwizikulu wakwe Dodo aiza ku kukulula aina Izlaeli. Wene wafumile mu mutundu wakwe Isakali nga wikalanga ku Syamili mu mpanga ya myamba yakwe Efulemu.

² Wene watungulwile aina Izlaeli pa myaka amakumi yaili na itatu. Lyene afwa nga yamuzika ku Syamili.

Ukulanda vyapali Yaili

³ Pacisila cakwe Tola, Yaili aiza ukufuma ku Gileadi. Wene watungulwile aina Izlaeli pa myaka amakumi yaili na yaili.

⁴ Wakweti ana aonsi amakumi yatatu, yano yakwelanga pali yapunda amakumi yatatu. Yene yateekanga imisumba amakumi yatatu mu mpanga ya Gileadi, ino nilelo kwene icili aamwa ukuti imizi yakwe Havoti Yaili.

⁵ Lino Yaili wafwile, yamuzisile ku Kamoni.

Ukulanda vyapali Yefuta

⁶ Nupya kwene aina Izlaeli yiifya kuli Yawe pa kupepa maunkolanya yakwe Baali na yakwe Asyitaloti, nga na tuleza tuze twa ina Alamu, nu twa ina Sidoni, nu twa ina Moabu, nu twa ina Amoni, nu twa ina Filisti.

⁷ Acino Yawe pali pakusokela aina Izlaeli, nga aleka kuti aina Filisti na ina Amoni yayacimvye.

⁸ Pa myaka cinani yene yatitikizye nu kuzunya aina Izlaeli yonsi aikalanga mu mpanga ya ina Amoli lwaku ufumondaka wa Luzi lwa Yodani umu Gileadi.

⁹ Aina Amoni yalamvile Luzi lwa Yodani kuti yakalwe nu mutundu wakwe Yuda, na wakwe Benjamini, nga na wakwe Efulemu. Aina Izlaeli yali mu ntazi ikulu sana.

¹⁰ Alino lyene aina Izlaeli iyalilila kuli Yawe yavwanga yati, “Twatitwifya kunuli, pa kufutatila Leza witu nu kutumikila Tubaali.”

¹¹ Yawe ayaasuka ati, “Aina Eguputo, na ina Amoli, na ina Amoni, na ina Filisti,

¹² na ina Sidoni, na ina Amaleke na ina Midyani yamucuzizye ku mpiti nga namwe mwandilile kuti imwazwe. Uzye ntamutuuzile kuli yayo?

¹³ Lelo mwemo mwamfutatila nu kutumikila tuleza tuze. Acino nani ntalatala imutuule nupya.

¹⁴ Yangini mukalilile tuleza tuno mwasolola. Lekini tuto kwene tumutuule lino mwaya mu ntazi.”

¹⁵ Lelo aina Izlaeli iyanena Yawe yati, “Twatitwifya. Ucite kunotuli icili consi icingakuzipila. Lelo twapapata ututuule ilelo kwene.”

¹⁶ Acino aina Izlaeli iyasumba tuleza utwa inamasi nga iyatumikila Yawe. Nga Yawe auvwila aina Izlaeli ulanda pa ntazi zyao.

¹⁷ Lyene ivita vya ina Amoni iviiteyanya kuya ku kulwa nga ivicita insakwe mu mpanga ya Gileadi. Aina Izlaeli nayo iyakongana nu kukuula insakwe ku Mizipa.

¹⁸ Alino antu nga ni ntunguluzi zyamu Gileadi yavwanzyanya yati, “Wino wensi alatandikilapo kuzanza aina Amoni alaya intunguluzi ya ikazi amu Gileadi.”