Utandiko 9 - Amazwi Yakwe Leza 2013

Upangano wakwe Leza na Nowa

¹ Leza apolelela Nowa na ana yakwe ati, “Vyalalini musanduluke muce mulimbe insi yonsi.

² Inyama zyonsi ni vyunyi vyonsi ivikapapuka nga ni inswi zyonsi vilaamoopa. Vyonsi navika mu makasa inu.

³ Vyonsi vyaumi ivikapita mwalya. Wakwe vino natiile mwalya musalu, namupeela kuti vyonsi viye ivyakulya.

⁴ Lelo mutakezye ukulya inyama muno mucili uwazi, pano uwazi uli umi wakweyo.

⁵ Wino watala akatwe wene wazwisya uwazi nawe alakomwa. Inyama iyakoma umuntu ndaikoma.

⁶ Nu muntu uwakoma umuntu muze, nawe kwene antu yauze yalamukoma. Pano umuntu waumvilwe mu cata cakwe Leza.

⁷ Caleka mulinzile kuvyalana muvule mukumane insi yonsi.”

⁸ Lyene Leza anena Nowa na ana yakwe ati,

⁹ “Nacita upangano ndakai pakasi kakwe wewe na amu mupanda wako alakulondelela

¹⁰ nu ku vyaumi vyonsi ivili nawe, ivyunyi, iviteekwa, inyama zyamu mpanga, na consi cafumile nawe mu cange.

¹¹ Ndaiusya upangano wane uwakuti, ‘Iviumbwa vyonsi vyaumi vitalatala vyononeke nupya kuli mulamba foo, nupya kutalatala kuye mulamba uwakonona insi.’ ”

¹² Nupya Leza anena Nowa ati, “Cimanyililo ca upangano uno nkucita namwe ni viumbwa vyonsi cakuti,

¹³ Nika umulalamfuti umwiyulu, na cii cili cimanyililo ca upangano wane ku viumbwa vyaumi mu nsi.

¹⁴ Lyonsi lino ikumbi lya mvula lyafisya nu mulalamfuti ndi waloleka umwiyulu,

¹⁵ ndaiusya upangano wane kunomuli nu ku viumbwa vyonsi vyaumi uwakuti, kutalaya mulamba nupya uwakonona viumbwa vyonsi vyaumi nanti insi.

¹⁶ Lyonsi lino mulalamfuti waloleka mu makumbi ndaulola nu kwiusya upangano wa manda pe uli pakasi kakwe nene ni viumbwa vyaumi vyonsi vyamu nsi.

¹⁷ Cili cimanyililo cino nacita ca upangano wane ni viumbwa vyaumi vyonsi vyamu nsi.”

Nowa na ana yakwe aonsi

¹⁸ Ana yakwe Nowa afumile mu cange a Syemu, Hamu, na Yafeti. Hamu ali isi wakwe Kenani.

¹⁹ Ana ya yatatu yakwe Nowa vili vikolwe vya antu yonsi aya mu nsi.

²⁰ Nowa wali umulimi nupya uwatandike kulima icalo ca matingi.

²¹ Walanga wamwa waini akoleka, azula, alala tupu mwi Taalu lyakwe.

²² Lino Hamu, isi wakwe Kenani wingila mwi taalu, alola isi ali tupu, nga afuma aya anena aina.

²³ Lyene Syemu na Yafeti yatozile umwingila yawika kwitundu pa maye yao nga yapita cundansinzi iyaya mwi taalu, yamuvimba, yala yamufutatile kuti yatamulola tupu.

²⁴ Lino waini wamukololoka, Nowa auvwa vino umwana wakwe wa munono wali wacita kunoli.

²⁵ Asoka avwanga ati, “Citipu ciye kuli Kenani, Wene alaya muzya ku ina yakwe.

²⁶ Alumbanyiwe Yawe, Leza wakwe Syemu! Kenani alaya muzya wakwe Syemu.

²⁷ Su Mwene Leza angalenga kuti Yafeti asanduluke, na ana yakwe yakikale pamwi na ana yakwe Syemu. Kenani alaya muzya wakwe Yafeti.”

²⁸ Pacisila cakwe mulamba Nowa aikala imyaka 350.

²⁹ Afwa lino waya ni myaka 950.