Utandiko 7 - Amazwi Yakwe Leza 2013

Mulamba watandika

¹ Lyene Yawe anena Nowa ati, “Pita ingila mu cange pamwi na amu ng'anda yako. Ninzana vino wewe wenga mpo mu antu yonsi ukacita ivyaololoke.

² Toola inyama cinimbali zyakalume na cinimbali zyakaci, muli cila musango onga uwa nyama zyasangululwa. Lelo cila musango uwa nyama zitasangululwa utoole sile ziili, yakalume ni yakaci.

³ Toola na cinimbali muli cila musango uwa vyunyi vikapapuka, cakalume ni cakaci. Vivyo vyonsi uvisunge vipuma kuti vikavyalane nupya mu nsi.

⁴ Ndi papita sile amanda cinimbali indi nu kutuma imvula pansi, ilatonya mu nsi yonsi amanda makulu amakumi yani, nu konona consi ca umi cino naumvile.”

⁵ Nowa wacisile vyonsi ndi vino Yawe wamupeezile ilamulo.

⁶ Nowa wali ni myaka imyanda mutanda, lino mulamba wizile pano nsi.

⁷ Pa nsita ilya alanga Nowa nu muci wakwe, ana yakwe aonsi na aci yao yatiingila mu cange kuti yapusuke ku manzi yakwe mulamba.

⁸ Cakalume ni cakaci ca nyama zyonsi zisangululwe ni zisi zisangululwe, ivyunyi ivikapapuka, ni vikasela vyonsi vyakalume ni vyakaci,

⁹ vyonsi ivingila na Nowa mu cange ndi vino Leza wamupeezile ilamulo.

¹⁰ Pacisila ca manda cinimbali mulamba aiza pano nsi.

¹¹ Lino Nowa wafika imyaka imyanda mutanda pa wanda uwalenga ikumi na cinimbali uwa mwezi uwalenga iili, maziya ya muli yayemba yafukoka amanzi, ni vipongo vya mwiyulu navyo viyulika, na manzi yaafuma.

¹² Ni mvula itonya amanda makulu amakumi yani, usiku nu musanya.

¹³ Pa wanda kwene ulya Nowa nu muci, ana yakwe aonsi yatatu Syemu, Hamu na Yafeti pamwi na aci yao ingile mu cange.

¹⁴ Yene ingile pamwi ni misango yonsi ya nyama zya mpanga ni viteekwa, zinono ni zikulu, ni misango yonsi ya vyunyi.

¹⁵ Ca kalume ni cakaci ca musango wa cintu consi ca umi cingile pamwi na Nowa mu cange,

¹⁶ ndi vino Leza wamupeezile ilamulo. Lyene Yawe ayala cisasa lino Nowa wingila.

¹⁷ Imvula itwalilila ukutonya pa manda makulu yani, nga manzi yavula ni cange citandika ukutumpuka.

¹⁸ Amanzi yavulisya nga icange caelela pa manzi.

¹⁹ Amanzi yavula yavimba ni myamba italimpe cuze.

²⁰ Amanzi yatwalilila kuvula yavimba myamba itali kulingana manye amamita cinimbali ukuya papela.

²¹ Consi ica umi cifwa, ivyunyi ivikapapuka, inyama na antu yonsi.

²² Consi ca umi, icikafuta icali mu nsi cafwile.

²³ Yawe ononyile ca umi consi ca muno nsi, antu, inyama, vikasela ni vyunyi ivikapapuka vyonsi vyafwa. Nowa sile na yano wali nayo, pamwi na vino wali navyo mu cange ivyapuswike.

²⁴ Amanzi yamala amanda umwanda onga na makumi yasano kwaula kupwa.