Utandiko 6 - Amazwi Yakwe Leza 2013

Inkota zya antu

¹ Pa nsita ilya lino antu yatandika kuvula, yalimba insi yonsi, ana yakaci yavyalwa.

² Lyene ana yakwe Leza aonsi yalola ukuti akazyana yaa yayazipila cuze. Pali pakutwala yano yatemwa.

³ Alino Yawe avwanga ati, “Ntalazumilizya umuntu ukwikalilila umuyayaya pano wene umwinakufwa. Ukufuma ndakai umuntu asyaikala ukuluta pa myaka umwanda onga na makumi yaili.”

⁴ Lyene mu manda yalya nu mu manda alondelela kwali vipombolo vya antu pano nsi, vivyo ivyavilwe ku anaci atwitwe ku ana yakwe Leza aonsi. Yene yali ali antu yamaka, alumbuke.

⁵ Lino Yawe walola vino inkota zya antu zyavulisya na vino ukwelenganya kwao lyonsi kwaya ukwipe,

⁶ aya nu ulanda cuze nu mwenzo umuwaya pa kuumba antu nu kuika pano nsi.

⁷ Caleka avwanga ati, “Namaonona antu yonsi pyu yano nauumba, ni nyama, ni vikasela, ni vyunyi ivikapapuka. Pano vyandenga ulanda pa kuviumba.”

⁸ Lelo Nowa wene uwazanzyanga Yawe.

Icange cakwe Nowa

⁹ Ilandwe lyapali Nowa lyaya ndi vii. Pakasi ka antu amu nsita ilya Nowa wenga mpo wali umuntu uwacitanga vyawololoke nupya uwaula impwelo mbi. Lyonsi kwene Nowa wapitanga na Leza.

¹⁰ Nowa waviile ana aonsi yatatu, Syemu, Hamu na Yafeti.

¹¹ Antu yonsi yali aipe ni mpanzela zyao zyasalangine insi yonsi.

¹² Leza alolekesya azana ukuti insi yonsi yazulamo inkota, pano vicitwa vya antu ivya nkota.

¹³ Nga Leza anena Nowa ati, “Nimpingula ukonona muntunze. Namaonona insi yonsi kumwi na aliyo, pano yatizulamo lwete ni nkota zyao.

¹⁴ Upange icange cako, kuomvya imbao zyakwe lombwa. Wikemo miputule nu kusindila manenekela mukasi nu kunzi.

¹⁵ Mu utali ciye amamita umwanda onga na makumi yasano, nu mu wipi namo ciye amamita amakumi yaili na yasano, ukuzika nako amamita ikumi na yatatu.

¹⁶ Upalike icange usye ni nzota kulingana citika wakwe mita ukuzinguluka icange. Utendelekanye miputule itatu, usye nu mulyango mu mbali.

¹⁷ Namatuma imvula nga mulamba alazula insi yonsi nu kulovya ivya umi vyonsi ivyayamo. Vyonsi ivyaya panonsi vilafwa.

¹⁸ Lelo ndacita upangano pakasi kakwe wewe nani. Ingila mu cange pamwi nu muci wako, na ana yako na aci yao.

¹⁹ Utoole conga icakalume ni cakaci ca musango wakwe cila nyama kuti uvisunge vipuma.

²⁰ Utoole viili viili vyamu misango yonsi ya vyunyi, pamwi ni misango yonsi ya nyama, zikulu ni zinono ni vikasela, uvingizye mu cange kuti uvisunge vipuma.

²¹ Ingizya ni misango yonsi ya vyakulya vyako ni vyakulya vyakwevyo, uvisunge.”

²² Nowa wacisile vyonsi ndi vino Leza wamupeezile ilamulo.