Utandiko 46 - Amazwi Yakwe Leza 2013

Yakobo na amu ng'anda yakwe yapita ukuya ku Eguputo

¹ Caleka Yakobo alonga vyonsi vino wakweti, nga atenuka aya ku Eguputo. Lino wafika ku Belisyeba apeela impolelwa kuli Leza wakwe Isaki isi wakwe.

² Usiku Leza avwanga kunoli mu cilolwa, amwama ati, “Yakobo, Yakobo!” Nawe aasuka ati, “Endi, indi pano.”

³ Leza avwanga ati, “Anene Leza, Leza wakwe so. Utuvwa intete zya kutentemukila ku Eguputo, pano kuku akuno ndalenga amu mupanda wako ukuya uluko lukulu cuze.

⁴ Nemo ndatentemukila ku Eguputo, nga nene kwene ndakuwezya pali pamwi nawe, nga na amu mupanda wako ndayawezya kuno mpanga kwene ii. Lino ulafwa Yosefu alakufunda.”

⁵ Lyene Yakobo akatuka ukufuma ku Belisyeba, nga ana yakwe aonsi yamusenda yasenda na ana yao, anono, nga na aci yao mu maceleta yano Falao watumile.

⁶ Yatoola ni viteekwa kwene na vyonsi vino yalonsile mu Kenani, nga Yakobo na amu mupanda wakwe yonsi yapita, yaya ku Eguputo.

⁷ Caleka Yakobo asenda ana yakwe aonsi ku Eguputo, na aizikulu yakwe aonsi, na ana yakwe anaci nga na aizikulu yakwe anaci.

⁸ Yaa ali mazina ya ina Izlaeli aonsi (kuli kuti Yakobo na amu mupanda wakwe) yao apisile nawe ku Eguputo. Pali Lubeni iyeli lyakwe.

⁹ Nga na ana yakwe Lubeni aonsi yali a Hanoki, Palu, Heziloni, na Kalimi.

¹⁰ Ana yakwe Simeoni aonsi a Yemueli, Yamini, Oadi, Yakini, Zoyali, nga na Syauli, umwana umonsi wino waviile mu mwanaci waku Kenani.

¹¹ Ana yakwe Levi aonsi yali a Gelisyoni, Koati, na Melali.

¹² Ana yakwe Yuda aonsi yali a Ele, Onani, Syela, Pelezi, na Zela. (Lelo ana yakwe Yuda yauze aonsi a Ele na Onani yene yafwile ala yacili mu mpanga ya Kenani.) Ana yakwe Pelezi aonsi yali a Heziloni na Hamuli.

¹³ Ana yakwe Isakali aonsi yali a Tola, Puwa, Yasyubu na Syimuloni.

¹⁴ Ana yakwe Zebuluni aonsi yali a Seledi, Eloni, nga na Yaleeli.

¹⁵ Ya, ali ana yakwe Yakobo aonsi amuli Leya yano yamuvyalile ku Mesopotamya, ukwikapo nu mwana umwanaci Dina. Onsi pamwi amu mupanda wakwe Leya yali amakumi yatatu na yatatu.

¹⁶ Ana yakwe Gadi aonsi yali a Zefoni, Hagi, Syuni, Eziboni, Ele, Alodi na Aleli.

¹⁷ Ana yakwe Asyeli aonsi yali a Imuna, Isyiva, Isyivi, Beliya na kaci wao Selaa. Ana yakwe Beliya aonsi yali a Hebeli na Malikieli.

¹⁸ Yaa ikumi na mutanda ali amu mupanda wakwe Yakobo, amuli Zilipa. Zilipa umwanaci muzya wino Labani wapeezile kuli Leya umwana wakwe umwanaci.

¹⁹ Lakeli wavyalile Yakobo ana yaili aonsi, Yosefu na Benjamini.

²⁰ Asenati umwana umwanaci wakwe Potifela, simapepo waku Oni, wavyalile Yosefu ana yaili aonsi mu Eguputo. Ana yaa a Manase na Efulemu.

²¹ Ana yakwe Benjamini aonsi yali a Bela, Bekeli, Asyibeli, Gela, Namani, Ei, Losyi, Mupimu, Hupimu na Alidi.

²² Yaa ikumi na yani ali amu mupanda wakwe Yakobo muli Lakeli.

²³ Dani wakweti umwana umonsi wenga, Husyimu.

²⁴ Ana yakwe Nafutali yali a Yazeeli, Guni, Yezeli, na Syilemu.

²⁵ Yaa cinimbali ali amu mupanda wakwe Yakobo muli Bilaa. Bilaa umwanaci muzya wino Labani wapeezile kuli Lakeli umwana wakwe umwanaci.

²⁶ Antu amu mupanda wakwe Yakobo yonsi pamwi yali amakumi mutanda na mutanda yano yaile ku Eguputo. Aci ya ana yakwe Yakobo yene yatapenzilweko.

²⁷ Yosefu waviile ana yaili aonsi mu Eguputo. Caleka impendwa yakwe yao amu mupanda wakwe Yakobo, yano aile ku Eguputo, ikumana amakumi cinimbali.

Yakobo na amu ng'anda yakwe yikala mu mpanga ya Eguputo

²⁸ Yakobo inkolelo atuma Yuda kukunena Yosefu kuti akayazengele ku Gosyeni. Lino yafika,

²⁹ Yosefu anena aomvi yakwe kuti yateyanye celeta nga aya ku kuzengela isi ku Gosyeni. Lino Yosefu walola isi asimwilila kunoli amukumbatila nga alila pa nsita itali.

³⁰ Yakobo anena Yosefu ati, “Awe lyene ningafwa, pano natinjilolela na manso yane ukuti ucili mumi.”

³¹ Lyene Yosefu anena aina yakwe nga na amu ng'anda yakwe isi yonsi ati, “Ndinzile nje kuli Falao, imunene inti, ‘Aina yane na amu ng'anda yakwe tata, yano ikalanga mu Kenani yatiyiza kuti ikale nani.

³² Ndaya nkamunene ukuti mwemwe yakacema, pano mwateeka iviteekwa. Nupya ndaya nkamunene ukuti mwatimwiza na maufyo ya mfwele, ing'ombe zino mukasunga nga na vyonsi vino mwakwata.’

³³ Lino Falao alamwama kwi sano nu kumuuzya imilimo ino mukaomba,

³⁴ mukamunene cumi ukuti ukufuma ku kuvyalwa kwinu mwemwe atesi ya viteekwa wakwe vino ivikolwe vinu vyali. Ndi mwaca mwamunena vii, lyene alamuzumilizya kuti mwikale mu muputule wa Gosyeni.” Yosefu wavwanzile vii pamulandu wakuti wamanyile ukuti aina Eguputo yakalola yakacema wa cintu cawinyi.