Utandiko 42 - Amazwi Yakwe Leza 2013

Aina yakwe Yosefu yiiza ku Eguputo ku kukala ingano

¹ Lino Yakobo uvwa ukuti ku mpanga ya Eguputo kuli ingano, auzya ana yakwe ati, “Uzye pacani cino mutenzi mukulolekesya sile?”

² Nga atwalilila ukulanda ati, “Natinuvwa ukuti ku Eguputo kuli ingano. Pitini mukakale ingano zimwi kuti tutafwa ni nzala.”

³ Caleka aina yakwe Yosefu ali ikumi iyafuma ku Kenani iyaya ku kukala ingano ku Eguputo.

⁴ Lelo Yakobo atazumilizye Benjamini wino yavilwe na Yosefu nyina na isi wenga kuti apite pamwi nayo. Wacisile cii pamulandu wakoopa ukuti Benjamini angazanzwa.

⁵ Avino ana yakwe Izlaeli aonsi yapita pamwi na antu yauze ku kukala ingano, pamulandu wakuti mu mpanga ya Kenani mwali cipowe.

⁶ Yosefu, mulasi wa mpanga ya Eguputo, wakazyanga ingano ku antu yonsi afumile konsikonsi mu nsi. Caleka aina yakwe Yosefu yaya kunoli, nga yafukama pansi yafupime iinamika impumi zyao pa musili.

⁷ Lino Yosefu walola aina yakwe, ayalooka, lelo acita ngati atayamanyile. Alino ayuzya mu ukali ati, “Uzye mufumile kwi mwemwe kwene?” Nayo yaasuka yati, “Tufumile ku Kenani, twizile kala ivyakulya.”

⁸ Nanti angala Yosefu walooka, lelo aina yakwe yene yaposiwa kumulooka.

⁹ Yosefu aiusya viloto vya pali aliyo vino walosile nga ayanena ati, “Mwemwe nengu, mwizile lola ndi tukweti utonte, na vino mungazanza impanga itu.”

¹⁰ Nayo yamwasuka yati, “Musambazi, tusi nengu foo. Twatitwiza wa yaomvi yako kuti tukale sile ivyakulya.

¹¹ Swensi pamwi twavilwe ana aonsi ikumi na yaili kuli tata wenga. Musambazi, tusi nengu foo, sweswe antu acumi.”

¹² Yosefu ayanena ati, “Awe! Mwizile lola ndi tukweti utonte, na vino mungazanza impanga itu.”

¹³ Nayo yaasuka yati, “Musambazi twavyalwa ana aonsi ikumi na yaili, swensi pamwi ku muntu wenga sile mwina Kenani. Mwina witu wenga wafwa, nga nu muto witu ndakai asile kuli tata.”

¹⁴ Lelo Yosefu aasuka ati, “Cili ndi vino nalinavwanga, mwemwe nengu.

¹⁵ Pakuti nsininkizye ukuti vino mukuvwanga pali nkwangu winu ivyacumi, namacita vii: Mwi zina lyakwe Falao nalapa ukuti mutalaswilila mpaka muto winu akize kuno.

¹⁶ Wenga uwa munomuli alinzile apite akamulete. Asyala mwensi mumasungwa mu ng'anda yaminyololo mpaka ndole ukuti vino mukuvwanga ivyacumi. Ndi cisi vivyo, nalapa mwi zina lyakwe Falao, ale mwemwe nengu.”

¹⁷ Lyene ayasunga mu ng'anda yaminyololo pa manda yatatu.

¹⁸ Pa wanda uwalenga yatatu Yosefu ayanena ati, “Nene muntu wino akaopa Leza. Caleka citini cii kuti mutakomwa.

¹⁹ Pakuti nsininkizye ukuti mwemwe acumi, wenga uwa munomuli amasyala asungwe mu ng'anda yaminyololo muno mwali. Mwemuno mwasyala mumaswilila kuti mutwale ingano zino mwatimukala ku amu mang'anda inu kuno kuli cipowe.

²⁰ Lyene mulinzile mukize na nkwangu winu kunondi. Cii cilasininkizya kunondi ukuti vino mukunena ivyacumi, nga nani ntalamukoma.” Nayo yazumilizya pali cii,

²¹ nga yavwanzyanya yati, “Cumi ndakai twavunukwa pamulandu wakwe vino twacisile ku muto witu lino twaweni vino ali mu ntazi, nga na vino wapapatanga kuti tuwake umi wakwe. Lelo swemo tutuvwile kupapata kwakwe. Cii icingalenga kuti tuye mu ntazi ndi ii.”

²² Lubeni avwanga ati, “Namunenyile nati mutacisa mulumendo, lelo mutalondanga kuvwa. Mwalola lyene, ndakai tukucula pamulandu wa mfwa yakwe.”

²³ Yosefu uvwanga vino yakulanda, lelo yene yatamanyile cii pano wavwanganga kunoyali kupitila muli kasenula wa mazwi.

²⁴ Lyene Yosefu afuma panoyali aseleuka nga atandika kulila. Lino wateeka umwenzo aswilila, asenda Simeoni, apeela ilamulo, nga yamunyepa pa manso yao.

Aina yakwe Yosefu yaswilila ku Kenani

²⁵ Lyene Yosefu apeela ilamulo ku yaomvi kuti yazuzye ingano mu masaka ya ina yakwe nu kuyaswilizizya impiya cila muntu mwi saka lyakwe, nga ayapeela ni mpao. Alino aomvi yakwe Yosefu nayo iyacita vivyo kwene.

²⁶ Lyene aina yakwe Yosefu yanyepelela masaka ya ngano pali yapunda yao, nga yakatuka ulendo.

²⁷ Lino yafika pa cifulo cino yaile yalala indo, wenga pano yali asapula isaka kuti apeele punda ivyakulya, nga azana impiya papela ya ngano mwi saka.

²⁸ Aama aina ayanena ati, “Lolini, nemo yatiyambwezezya impiya zyane. Asi zii, mwi saka!” Papo kwene myenzo yao ikunta, yuvwa intete cuze, nga yauzyanya yati, “Uzye cii icani, cino Leza watacita kunotuli?”

²⁹ Lino yafika ku Kenani kuli isi Yakobo, yamulondolwela vyonsi ivyacitike kunoyali, yati,

³⁰ “Mulasi wa mpanga ya Eguputo watunenanga mu ukali ati sweswe nengu mu mpanga yakwe.

³¹ Naswe twamwaswike tuti, ‘Tusi nengu foo, sweswe antu acumi.

³² Twavilwe ana aonsi ikumi na yaili swensi pamwi kuli tata wenga. Mwina witu wenga wafwa nga nu muto witu asile ku Kenani kuli tata.’

³³ “Muntu wi, mulasi wa mpanga nawe aasuka ati, ‘Namacita vii kuti ndole ndi mwemwe antu acumi. Wenga uwa munomuli amasyala nani kuno, lyene asyala mulaswilila kuti mutwale ingano ku amu mang'anda inu kuno kuli cipowe.

³⁴ Mukize na nkwangu winu, kunondi. Lyene ndamanya ukuti musi nengu foo, lelo mwemwe antu acumi. Ndamusapwila mwina winu muce mwacita nu uculuzi muno mpanga.’”

³⁵ Lyene lino yafumfumula masaka yao, yazana impiya mwi saka lyakwe cila muntu. Nga lino yalola impiya, yene pamwi na isi kwene Yakobo yuvwa intete cuze.

³⁶ Isi ayanena ati, “Uzye mukulonda kuti mponzye ana yane onsi? Yosefu waponga, lyene na Simeoni kwene wataponga, nga ndakai mukulonda musende na Benjamini kwene. Ala! Nene nkucula ne so, asi mwemwe.”

³⁷ Lubeni anena isi ati, “Ndi ntalaya nkawele nawe, uce wize ukome ana yane aonsi yaili. Mumwike sile mu maka yane, nupya ndamuwezya.”

³⁸ Lelo Yakobo avwanga ati, “Mwana wane atangapita namwe, pano umwina wafwa, nga wikwene wenga sile asilepo. Limwi icintu cimwi cingamucitikila mu nzila. Nene muntu mukote, lyene amazwi aulanda yano mungiza nayo angankoma.”