Utandiko 41 - Amazwi Yakwe Leza 2013

Yosefu wilula ciloto cakwe Falao

¹ Lino papita myaka iili Falao alota aimi mu mbali ya Luzi lwa Nailo.

² Lyene alola ing'ombe cinimbali iziine nupya zitelepe, zikufuma mu luzi zitandika ukulya mu matete.

³ Lyene kwiza ing'ombe nazyuze cinimbali zyonde iziipe, ziza zimilila mupipi ni zyuze mu nkumba ya luzi.

⁴ Alino ing'ombe zyonde iziipe zilya ing'ombe iziine. Lyene Falao azyuka.

⁵ Lino wakasula nupya, Falao alota ciloto nacuze. Lyene alola misakinta ya ngano cinimbali ili ku lusawa longa, yali ikuloleka ikulu nupya ice ningo.

⁶ Lyene ku lusawa ululi lumwi kutumba misakinta nayuze cinimbali, inyale nupya ifooke pamulandu wa muza uno wafumanga mu lwanga.

⁷ Lyene alola imitwe inyale ya ngano imila imitwe iyali ice ningo. Falao azyuka azana ukuti wali akulota.

⁸ Lino kwaca katondo Falao asakamala cuze. Caleka aama amamanyamano na antu yamano yonsi amu Eguputo nga ayalotwela viloto, lelo kutali nanti wenga wakuti angilula muno viloto viile.

⁹ Lyene mukulu wakwe yakatumikila ya lwako lwakwe waini ku mwene anena Falao ati, “Musambazi ndinzile njilongwele vino naluvyanya.

¹⁰ Insita imwi we musambazi Falao wakalipile aomvi yako, ulema mukulu wakwe yakapanga ya mikate nga nani kwene, utunyepa utuyalila mu ng'anda yaminyololo.

¹¹ Usiku uli umwi cila wenga munotuli walosile ciloto, nga cila ciloto cali na muno ciile.

¹² Mulumendo Muyebulai apano wali, muzya wa mukulu wakwe kalinda wa ng'anda yaminyololo. Lino twamulondolwile viloto vitu, nawe ailula viloto vitu, atunena cila muntu muno ciloto cakwe ciile.

¹³ Nga ni vintu vyatucitikile kulinga navino wilwile. Nemo imunswilizya pa ncito nu unji nawe imumunyonga.”

¹⁴ Lyene Falao apeela ilamulo kuti yalete Yosefu, nga yamuleta zuwa ukufuma ku ng'anda yaminyololo. Alino pacisila cakumupeela inyele azula ivizwalo vya anyepwe azwala usaka, nga aiza kuli Falao.

¹⁵ Nga Falao anena Yosefu ati, “Nalinalota iciloto lelo antu yonsi yatiyaposiwa ukwilula muno viile. Natinuvwa ukuti wemo ndi unguvwa iciloto ungaciilula.”

¹⁶ Yosefu azumila ati, “Nemo ntangacita cico, lelo Leza amapeela wilulo usuma kuli Falao.”

¹⁷ Falao anena Yosefu ati, “Nalinalota nimilile pa cituntu ca Luzi lwa Nailo.

¹⁸ Alino ing'ombe cinimbali iziine zitelepe zyali zyafuma mu luzi ziza zimalya mu matete.

¹⁹ Lyene nupya kwali kwiza ing'ombe zyuze ziili zyonde nupya iziipe mukuloleka. Zyali ziili ing'ombe zyonde izyaipisya zino ntatala nalola mu mpanga yonsi ya Eguputo.

²⁰ Ing'ombe zyonde zyali zyalya iziine.

²¹ Lelo lino ing'ombe zyonde zyali zyalya iziine kusi umuntu angalola kupusana pano zyali zikuloleka vivi kwene izyonde ndi vino zyali zili pankolelo. Lyene nalinapampuka, nazyuka.

²² Nupya kwene nalinalota iciloto nacuze. Nalinalota misakinta ya ngano cinimbali ili ku lusawa longa, nga yali ikuloleka ikulu nupya ice ningo.

²³ Lyene ku lusawa ululi lumwi kwafuma misakinta nayuze cinimbali, inyale nupya ifooke pamulandu wa muza uno wafumanga mu lwanga.

²⁴ Lyene imitwe inyale ya ngano imila imitwe iyali ice ningo. Nalinalotwela amamanyamano, lelo kutali kuli umwi uwa kwilula viloto vii.”

²⁵ Yosefu anena Falao ati, “Viloto vyakwe Falao vyoili vikusenula icintu conga sile. Leza watakunena vino amacita.

²⁶ Ing'ombe ziine cinimbali, imyaka cinimbali. Ni misakinta ya ngano cinimbali, ikulu nupya ice, nayo kwene imyaka cinimbali. Viloto vyako vyoili vikusenula icintu conga.

²⁷ Ing'ombe zyonde cinimbali izyafumile pacisila nga ni misakinta cinimbali ya ngano inyale nupya ifooke pamulandu wa muza uwamu lwanga, imyaka cinimbali iya cipowe.

²⁸ Cili ndi vino nakunenyile we Falao mwene wakwisaci, Leza watakusoka pali vino ali nu kucita.

²⁹ Kulaya ivyakulya ivivule cuze mu mpanga ya Eguputo pa myaka cinimbali.

³⁰ Pacisila ca myaka iyo, kulaya cipowe pa myaka cinimbali mu Eguputo, ni myaka iyo isuma italiusiwa ukuti yaliko awe, nga ni cipowe cilonona mpanga.

³¹ Imyaka cinimbali ya vyakulya vivule antu yataliusya pamulandu wa cipowe icilapona, icilipisya cuze.

³² Mulandu uno iciloto ciizile kunuli umu nzila ziili, umusambazi Falao, pakuti cikulange vino umwene Leza aliwe wateyanya ci, na kuti asininkizye ukuti ali nu kucicita mu kasita kakwene kakwiza.

³³ “Caleka ndakai mwene wakwisaci ulinzile ukutoola umuntu mulamoke wa mano nu kumanyikisya kwa kulola ivyankolelo, awino ulasike ukangalila mu mpanga ya Eguputo.

³⁴ Acino cingazipa Falao asolole intunguluzi nazyuze mu mpanga yakwe monsi muno yapeela, kuti zyatoola conga camuli visano pa vyakulya vya antu mu Eguputo mu myaka iyo cinimbali ya vyakulya vivule cuze.

³⁵ Yalinzile yakolonganika ivyakulya mu nsita kwene ikwiza. Yalinzile yaombe mwi lamulo lyako we Falao, ukusunga ivyakulya mu zyankoma muli cila musumba nu kuvilolela.

³⁶ Ivyakulya vii vilinzile vitutilwe mu zyankoma kuti vikaye ivyakuomvya mu nsita ya myaka cinimbali ya cipowe cino cilapona mu Eguputo, pakuti antu amu Eguputo yatakafwe ku cipowe.”

Yosefu yamucita mulasi uwamu Eguputo

³⁷ Falao na yacilolo yakwe yazumila pa uteyanyo wa musango uu.

³⁸ Nga Falao auzya yacilolo yakwe ati, “Aukwi kuno tungazana umuntu wa musango ndi wi, akweti Mupasi wakwe Leza?”

³⁹ Falao anena Yosefu ati, “Pakuti Leza watakusokolwela vii, kusi nanti wenga akweti ukumanya kuu nanti amano ukukuluta.

⁴⁰ Nakucita ukuya mulasi wa mpanga yane, na antu yane yalayela amasunde yako. Ndakuluta sile pamulandu wakuti nene indi mwene wa mpanga yonsi ya Eguputo.

⁴¹ Nakucita ukuya mulasi wa mpanga yonsi ya Eguputo.”

⁴² Falao azula imbalaminwe yakwe ya cimanyililo ca usambazi, azwika Yosefu ku munwe, amuzwika nu mwingila usuma nga atoola munyololo wakwe zaabu amukoweka mu nsingo.

⁴³ Avino amukwezya na pi celeta lyakwe lya wene, nga asilika yapita inkolelo, yazuka yakupunda yati, “Fumini mu nzila.” Vii avino Falao wamucisile ukuya mulasi wa mpanga yonsi ya Eguputo.

⁴⁴ Kulunda pali cii Falao nupya anena Yosefu ati, “Nene ndi Falao, nga ukwaula insambu yako, kusi umuntu nanti wenga mu Eguputo monsi alacita icintu icili consi.”

⁴⁵ Falao atemela Yosefu izina Zafenati Panea. Amupa nu mwanaci wakutwala, Asenati, umwana umwanaci wakwe Potifela. Simapepo uwamu musumba wa Oni. Yosefu watandile kuzinguluka impanga yonsi ya Eguputo.

⁴⁶ Yosefu wali ni myaka yakuvyalwa amakumi yatatu lino watandike kutumikila Falao, umwene waku Eguputo. Ndi Yosefu wafuma umwi sano ala waya ku kutandala konsi mu Eguputo.

⁴⁷ Mu nsita ya myaka cinimbali ya vyakulya vivule impanga yamezizye ivyakulya ivivule cuze.

⁴⁸ Yosefu akolonganika ivyakulya vyonsi mu myaka cinimbali ya vyakulya vivule mu Eguputo ala akututila mu zyankoma mu misumba ilya.

⁴⁹ Lyene Yosefu atutila ivyakulya vivule cuze mu zyankoma, cakuti asazya ukupima pano wingi wa ngano wali wa lusenga lwa muli yemba luno utangupende.

⁵⁰ Lino imyaka ya cipowe itali kuti ifike, Yosefu waviile ana yaili aonsi muli Asenati, umuci wakwe nupya umwana umwanaci wakwe Potifela, uwali simapepo waku Oni.

⁵¹ Nga Yosefu ati, “Leza watalenga kuti nilile ucuzi wane onsi kumwi na amu ng'anda yakwe Tata.” Caleka atemela umwana wakwe umonsi iyeli ati a Manase.

⁵² Nupya ati, “Leza watampela ana mu mpanga ya ucuzi.” Caleka atemela umwana umonsi wakwe ciili izina ati a Efulemu.

⁵³ Lino myaka cinimbali ya vyakulya vivule mu Eguputo yasila,

⁵⁴ imyaka cinimbali ya cipowe nayo itandika, ukulingana navino Yosefu walanzile. Nga kwali inzala mu mpanga zyuze zyazingulwike Eguputo. Lelo monsi mu mpanga ya Eguputo mwali ivyakulya.

⁵⁵ Lino mu Eguputo monsi mwatandika kuya icipowe, antu yalilila Falao kuti ayapeele ivyakulya. Caleka Falao apeela ilamulo ku antu yakwe yonsi amu Eguputo ati, “Mwaya kuli Yosefu, nga vino amamunena avino mulondele.”

⁵⁶ Acino lino cipowe cakumana impanga yonsi, Yosefu ayulila aina Eguputo inkoma zyonsi zya vyakulya, pano inzala iipisye yakumine impanga zyonsi.

⁵⁷ Antu ukufuma mu mpanga zyonsi iizanga ku Eguputo kuli Yosefu ku kukala ivyakulya, pamulandu wakuti inzala yakomile cuze mu nsi yonsi.