Utandiko 40 - Amazwi Yakwe Leza 2013

Yosefu wilula viloto vya anyepwe yauze

¹ Uwanda umwi katumikila wa lwako lwakwe waini ku mwene nga nu muze uwapanganga imikate kwisano, iyaluvyanya ku musambazi wao, umwene waku Eguputo.

² Falao asoka pa yaomvi ya oili, mukulu wakwe yakangalila ya lwako lwakwe waini na kapanga wa mikate.

³ Caleka yayayalila mu ng'anda yakwe kalinda mukulu wa ng'anda yaminyololo umwali Yosefu.

⁴ Kalinda mukulu ayapeela Yosefu ukuyaombela. Yali mu ng'anda yaminyololo amanda avule.

⁵ Usiku umwi mu ng'anda yaminyololo katumikila wa lwako lwakwe waini na kapanga wa mikate kwisano kwa mwene waku Eguputo, yonsi oili yalota viloto. Cila muntu ciloto cakwe cali namuno ciile.

⁶ Katondo lino Yosefu waya kunoyali alola ukuti yali asakamikwe cuze.

⁷ Nga auzya aomvi yakwe Falao, yano yayaliwe pamwi na aliwe mu ng'anda ya musambazi wakwe, ati, “Uzye ilelo mwaloleka asakamikwe uli?”

⁸ Nayo yaasuka yati, “Swensi cila muntu watalota ciloto, lelo pano pasi wakuti atwilwile viloto vitu.” Yosefu ati, “A Leza wenga sile akapeela ukwilula konsi ukwa viloto. Nenini viloto vinu.”

⁹ Caleka mukulu wakwe yakatumikila ya lwako lwakwe waini anena Yosefu ciloto cakwe ati, “Mu ciloto cane nalinalota muti wa viseekwa vya matingi uli ku cinso cane ala uli ni misambo itatu,

¹⁰ nga zuwazuwa lino mafwa yamelako, maluwa yaliyaloleka lyene iviseekwa viseeka nu kuca.

¹¹ Nalindemile ulwako lwakwe Falao. Acino nalinatola iviseekwa vivyo nafenela mu lwako lwakwe Falao, imupela.”

¹² Lyene Yosefu amunena ati, “Ciloto cikusenula vii: misambo itatu ya muti amanda yatatu.

¹³ Mu manda yatatu Falao ale wakufumya nu kukwelela mulandu wako, akuswilizye na pa ncito yako. Uli nu kuya pelanga Falao ulwako lwakwe waini ndi vino wacitanga lino wali katumikila wa lwako lwakwe waini.

¹⁴ Lelo ukanjiusye lino vyonsi vyakuzipila, nupya napapata ukaye nu luse kunondi apakutaka izina lyane kuli Falao, kuti ukalenge nani nkafume mu ng'anda ii yaminyololo.

¹⁵ Pasi pano nemo yansenzile ku maka ukufuma ku mpanga ya Ayebulai, na munondi kwene nemo ntacita umwi mulandu awe uwakulenga kuti yanyepe.”

¹⁶ Lino kapanga mukulu wa mikate kwisano uvwa kwilula kwa ciloto kwazipila muze, anena Yosefu ati, “Nane kwene nkweti ciloto. Pa mutwe wane pali vimponda vya mikate vitatu.

¹⁷ Mu cimponda ca papela mwali muli misango yonsi ya vyakulya vyoce vyakwe Falao, lelo ivyunyi vyali vikulya.”

¹⁸ Yosefu amunena ati, “Ciloto cikusenula vii: vimponda vitatu amanda yatatu.

¹⁹ Mu manda yatatu Falao ale wakufumya mu ng'anda yaminyololo. Alino alapeela ilamulo kuti yakuputule umutwe, lyene umwili wako yalauning'inya ku muti ni vyunyi vilaulya.”

²⁰ Lyene uwanda uwalenga yatatu wali wanda uwa kuvyalwa kwakwe Falao. Falao wacitile aomvi yakwe yonsi icimulo. Alino afumya nu kwelela mukulu wakwe yakatumikila ya lwako lwakwe waini nu mukulu wakwe yakapanga ya mikate kwisano, ayalanga ku manso ya ntunguluzi zyakwe.

²¹ Lyene Falao awezezya mukulu wakwe yakatumikila ya lwako lwakwe waini pa cifulo cakwe, kuti amuombela.

²² Lelo mukulu wakwe yakapanga ya mikate kwisano wene amukoma. Cali wakwe ndi vino Yosefu wailwile viloto vyao.

²³ Lelo mukulu wakwe yakatumikila ya lwako lwakwe waini atiwisye Yosefu, wamwilile.