Utandiko 4 - Amazwi Yakwe Leza 2013

Kaini na Abeli

¹ Lyene Adamu amanya Eva umuci wakwe, nga nawe asenda indilwa avyala umwana umonsi. Eva avwanga ati, “Ku wazwilizyo wakwe Yawe navyala umwana umonsi.” Acino amutemela izina ati Kaini.

² Pacisila avyala umwana umonsi namuze, nga amutemela izina ati Abeli. Abeli wali umucemi wa mfwele, lelo Kaini wali umulimi.

³ Pacisila ca nsita imwi, Kaini asenda vilimwa vimwi vyamu calo, aya apeela uwila kuli Leza.

⁴ Lelo Abeli asenda ana mayeli ya mfwele zyakwe, ayafyula nga apeela uwila viputulwa vya mafuta. Yawe azanga muli Abeli nu mu wila wakwe kwene.

⁵ Lelo Yawe atazangile muli Kaini nu mu wila wakwe kwene. Caleka Kaini asoka, nga afinya pa manso.

⁶ Lyene Yawe auzya Kaini ati, “Uzye pacani cino wasoka? Uzye pacani cino wafinya pa manso?

⁷ Ndu cita visuma ngani nakuzangila. Lelo pamulandu wakuti watucita iviipe, iifyo lyatilikuteyamila pa mulyango wako wa cilyanyi. Likukulondesya kuti likuteeke uzya, lelo ufwile kulicimvya.”

⁸ Lyene uwanda umwi Kaini anena muto wakwe ati, “Tuye tulyatoke ku vyalo.” Nga lino yali ku vyalo Kaini akatukila Abeli muto wakwe, amukoma.

⁹ Lyene Yawe auzya Kaini ati, “Uzye Abeli muto wako ali kwi?” Nawe aasuka ati, “Ntamanyile. Uzye umulimo wane kulasunga muto wane?”

¹⁰ Alino Yawe amuuzya ati, “Uzye pacani cino wacita icintu cii ciipisye? Uwazi wa munyonko ukulila kunondi ukufuma mu musili, wi zwi ilikulilila cilanduzi.

¹¹ Ndakai watipwilwa, nga utalatala ulime musili. Wene watiukowela pa kufipa uwazi wa munyonko wino wakomile.

¹² Ndi ulezya kulima vilimwa, musili utalakumezezya nanti cimwi. Acino wemo utalatala uye ni teko nupya ulazeuluka sile muno nsi.”

¹³ Alino Kaini anena Yawe ati, “Kuvunuka kuno wacita kuno ndi kwakula ukuluta vino ningazizimizya.

¹⁴ Lola, watunsukula ku kulima umusili nga nu ku manso yako. Ntalatala nje ni teko, nupya ndazeuluka pano nsi, na wino wensi alankomanya alankoma.”

¹⁵ Lelo Yawe amunena ati, “Awe, cisi vivyo! Umuntu umwi ndi alakukoma, ndacita cilanduzi panoli ca utazi wa katwe pa antu cinimbali.” Lyene Yawe aika icimanyililo pali Kaini, pakuti umuntu ali wensi wino angamukomenkanya atamukoma.

¹⁶ Lyene Kaini afuma ku manso yakwe Yawe aya aikala mu mpanga ya Nodi, ku ufumondaka wa calo ca Edeni.

Amu mupanda wakwe Kaini

¹⁷ Kaini amanya umuci wakwe, nga nawe asenda indilwa avyala Enoki. Lyene Kaini akuula umusumba nga autemela izina pacisila cakutemela umwana wakwe umonsi, Enoki.

¹⁸ Enoki yamuvyalile umwana umonsi, Iladi. Iladi wali a isi wakwe Mehuyaeli, nga Mehuyaeli wali a isi wakwe Metusyaeli, nga Metusyaeli wali a isi wakwe Lameki.

¹⁹ Lameki wapalike aci yaili. Kapundu wakwe wali a Ada, nga umuci muze wali a Zila.

²⁰ Ada waviile Yabali. Yabali wali cikolwe cakwe yao ali atesi ya viteekwa, aikalanga mu mataalu.

²¹ Umwina kololo wali a yubali, uwali cikolwe cakwe yakalizya ya mapango ni mitolilo.

²² Zila waviile Tubali Kaini, uwali a musyanyi uwasulanga viombelo vya misango yonsi ukufuma ku mukuwa nu ku vyela. Kaci wakwe Tubali Kaini wali a Naama.

²³ Lameki anena aci yakwe, ati, “Ada na Zila, uvwini kunondi. Mwe aci yane, mutezye amazwi yane. Natinkoma umuntu pano wali wanguma. Natinkoma umulumendo wiyo pano wali wancisa.

²⁴ Ndi pakukoma Kaini cilanduzi cacitwa pa antu cinimbali, ale lyene umwi ndi wankoma, cilanduzi cico cilacitwa pa antu amaila amakumi cinimbali na cinimbali.”

Seti na Enosi

²⁵ Nupya Adamu amanya umuci wakwe, nga nawe amuvyalila umwana umonsi. Muci amutemela izina ati Seti, nga avwanga ati, “Leza watapeela kunondi umwana umonsi uwakupyanikizya pali Abeli, wino Kaini wakomile.”

²⁶ Seti nawe kwene yamuvyalile umwana umonsi, nga amutemela izina ati Enosi. Pa nsita kwene iya alino antu yatandike kupepa Yawe.