Utandiko 39 - Amazwi Yakwe Leza 2013

Yosefu nu muci wakwe Potifa

¹ Ndakai Yosefu ala yamusenda ku Eguputo na Potifa mwina Eguputo wenga wamuli yacilolo yakwe Falao, uwali intunguluzi yakwe yakalolela ya kwisano kwakwe Falao, wamukazile ukufuma ku ina Isumeli amulesile ku Eguputo.

² Yawe wali na Yosefu, nu kulenga kuti vintu vyonsi vyamuzipila. Wikalanga mu ng'anda ya musambazi wakwe mwina Eguputo.

³ Nawe waweni ukuti Yawe akaazwa Yosefu muli vyonsi vino akucita.

⁴ Potifa watemilwe Yosefu ni milimo yakwe, nga icalesile kuti amupe nu wangalizi pali vyonsi vino wakweti na pa ng'anda yakwe.

⁵ Ukufuma lino wapile Yosefu uwangalizi wapali vyonsi vino wakweti vyapa ng'anda, Mwene apolelela ng'anda ya mwina Eguputo mulandu wakwe Yosefu. Upolelelo wa Mwene wali pali vyonsi vino Potifa wakweti vyamu ng'anda, nga ni vyamu vyalo kwene.

⁶ Potifa apeela vyonsi ni milimo yapa ng'anda mu makasa yakwe Yosefu. Wene aelenganya ukulya kutupu. Yosefu wali mulumendo wa cata cisuma nupya muyembe cuze.

⁷ Lino papita amanda umuci wakwe Potifa atandika ku kumbwa Yosefu, amutoka ati, “Ndanga tulale nawe!”

⁸ Yosefu akana ati, “Si lola vino umusambazi wane wancita mwangalizi muno ng'anda. Kutacili cimwi cino akalemako, nga wapeela vyonsi mu wangalizi wane.

⁹ Nkweti amaka mu ng'anda ii wakwe vino umusambazi wane akweti. Wene wampeela maka pali vyonsi, lelo kufumyako sile wewe we muci wakwe. Uzye lyene ningacita uli cintu caipa ndi ci nu kwifya kuli Leza wane?”

¹⁰ Nanti angala mama wamuzyanga cila wanda, Yosefu atamuvwanga cakuya ku musanzi wakwe.

¹¹ Lelo uwanda umwi lino Yosefu wingile mu ng'anda ku kuomba imilimo, mutali muomvi muze umwi mu ng'anda.

¹² Muka Potifa aya amutinta ikoti lyakwe ati, “Iza ku musanzi wane.” Lelo Yosefu amufyumbutuka, autukila apanzi, nga umwanaci asyala ni koti mu minwe.

¹³ Lino umuci wakwe Potifa walola kuti utukila panzi wamusila ikoti mu minwe,

¹⁴ aama aomvi aombanga mu ng'anda nga avwanga ati, “Lolini ci! Uwane waleta Muyuda wi mu ng'anda itu kuti aize aatuzewanya. Wali wiza ku muputule wane ati tulale nawe.

¹⁵ Lino uuvwa kuno napunda, wene asya ikoti lyakwe lii mu makasa yane, nga autuuka afuma nu mu ng'anda.”

¹⁶ Lyene umuci wakwe Potifa asunga ikoti kufika lino umusambazi wakwe Yosefu wawezile.

¹⁷ Lino iya wawela, amulandila ati, “Muzya wilya Muyuda wino waleta kuno, wali wangingilila ku musanzi ku kwiza mpatikizya kuti tulale nawe.

¹⁸ Lelo lino nalinapunda wali utukila apanzi, wasya ni koti lyakwe aili.”

¹⁹ Lino umusambazi wakwe Yosefu uvwa amazwi yaa asoka cuze.

²⁰ Alema Yosefu amwika mu ng'anda yaminyololo kuno umwene wasungilanga anyepwe akuno Yosefu aikala.

²¹ Lelo Yawe wacingililanga Yosefu nga nu kumupolelela. Cii, calesile kuti kalinda wa anyepwe umukalamba azangila muli Yosefu.

²² Caleka kalinda wa anyepwe umukalamba aika Yosefu pali ukangalila wa anyepwe yauze onsi. Amupa amaka akulolela vyonsi vyacitikanga mu ng'anda yaminyololo.

²³ Kalinda wa anyepwe acefya nu kwangalila, nga vyonsi vyali mu makasa yakwe Yosefu pano Yawe wacingililanga Yosefu nu kulenga kuti vyonsi vino wacitanga vyamuzipila.