Utandiko 37 - Amazwi Yakwe Leza 2013

Yosefu na ina yakwe

¹ Yakobo wene watwalilile ukwikala mu mpanga ya Kenani muno isi wikalanga.

² Yaa ali amu mupanda wakwe Yakobo na amu ng'anda yakwe. Yosefu mulumendo sile wa myaka ikumi na cinimbali, wacemanga imfwele ni mbuzi pamwi na yasilenzi, ana aonsi yakwe Bilaa na Zilipa, aci nayauze yakwe isi. Wanenanga isi vyonsi iviipe vino aina yacitanga.

³ Izlaeli watemilwe Yosefu ukuluta ana yakwe onsi, pamulandu wakuti yamuvyalile Yosefu mu ukote. Wamusumile nu mwingila usuma wa makasa atali.

⁴ Lino aina yalola ukuti isi watemwa Yosefu ukuyaluta, yene pasipakumupata, iyata nu kuvwanga ningo nawe.

⁵ Lyene lino Yosefu walotwela aina yakwe ciloto, yamupata nu kuluta.

⁶ Yosefu avwanga ati, “Uvwini ciloto cino ndosile.

⁷ Twali tuli ku vyalo swensi tukunyepa myanzi ya ngano, lyene umwanzi wane iwimilila, wololoka ni myanzi inu nayo iimilila izingulwike umwanzi wane nu kuufukamila.”

⁸ Lyene aina yamukanya yati, “Ele yasole! Uzye welenganya ukuti wewe ulatuteeka? Uzye wewe ungaya umwene witu?” Nga yamupata ukuluta pamulandu wa viloto ni milandile yakwe.

⁹ Nupya Yosefu alota ciloto nacuze, nga anena aina yakwe ati, “Inalota nkulola ilanzi, umwezi, nga ni ntanda ikumi na longa vikumfukamila.”

¹⁰ Yosefu aya alondolwela ni isi kwene iciloto cici. Lelo isi amukalipila ati, “Ala! Wee! Uzye cico cili ciloto cino ungatunena? Uzye ukwelenganya ukuti nyoko, na anyonko, nga nani tulakufukamila?”

¹¹ Aina yakwe Yosefu yaya nu uzuwa panoli, lelo isi wene acisunga mu mwenzo.

Yakazya Yosefu ku ina Eguputo

¹² Uwanda umwi aina yakwe Yosefu yatwala iviteekwa vyakwe isi ukuya cemelanga pipi nu ku Syekemu.

¹³ Izlaeli anena Yosefu ati, “Anyonko yakucemela iviteekwa ku Syekemu. Iteyanye nkulonda nkutume kweneko.” Yosefu avwanga ati, “Tata njiteinye, ntumini.”

¹⁴ Izlaeli amunena ati, “Pita kapempule anyonko ukayuzye mutende wao nu wa viteekwa, nga wize unene.” Caleka Izlaeli atuma Yosefu umwana wakwe ukufuma mu cifoloma ca Hebuloni. Yosefu afika ku Syekemu,

¹⁵ nga umuntu umwi amukomenkanya ala akululuta mu mpanga, alino amuuzya ati, “Uzye icani cino ukulonda?”

¹⁶ Nawe aasuka ati, “Nkulonda ainane. Uzye utange unene kuno yakucemela iviteekwa?”

¹⁷ Muntu wilya amwaasuka ati, “Kuno, yafumako mpiti, nuvwile yakuti tuli nu kuya ku Dotani.” Acino Yosefu alondelela aina aya ayazana ku Dotani!

¹⁸ Lelo aina yamulola katalamukila, nga lino atali kuti afike pano yali, yapangana kuti yamukome.

¹⁹ Yala yakuti, “Akako ka kalota kiza.

²⁰ Izini kuno, tumukome tumusumbile nu mu cifula conga musi amanzi nga tuce tulande tuti cilyanyi ca mpanga camukoma. Lyene tukamulozye pa viloto vyakwe.”

²¹ Lelo Lubeni auvwa mapange yao, nga aezya ukutuula Yosefu, avwanga ati, “Lekini tutamukoma.”

²² “Musumbilini sile mu cifula cii muno kwene mu lwanga. Lelo mutamucisa.” Lubeni avwanga vi pano kuteyanya kwakwe ukwakuti angamutuula ku ina, amuwezezye kuli isi.

²³ Walanga Yosefu wafika ku ina yakwe, yamuvuta, yalepola nu mwingila wakwe kwene usuma uno wazwite,

²⁴ nga yamusenda yaya yamusumbila mu cifula muno mutali amanzi.

²⁵ Lino yatenzi yakulya, iukila mulongo wa alendo aina Isumeli yakupita ukufuma ku Gileadi, yakuya ku Eguputo. Ngamila zyao zyasenzile iviya vivule nupya ivyamutengo, ivinyamuti vinunkile na mafuta yakupangila milembo, na mafuta yakulesya ukuola, ala yakuvitwala ku Eguputo.

²⁶ Lyene Yuda auzya aina ati, “Uzye icani cino tumalonka ndi twapeela pakukoma sile umwina witu nu kufisa imfwa yakwe?

²⁷ Lekini tumukazye ku ina Isumeli. Wi umwina witu nupya uwazi witu. Acino tutamukoma.” Aina yakwe yazumila.

²⁸ Lino aculuzi aina Midyani iza, aina yakwe yafumya Yosefu mu cifula umutali amanzi nga yamukazya ku ina Isumeli pa mpiya zyakwe siluva ukulingana amakumi yaili, nga nayo yamusenda ku Eguputo.

²⁹ Lino Lubeni waswilile ku cifula ku kulengula, azana Yosefu asimo, nga alepola vizwalo vyakwe, kulanga ulanda.

³⁰ Aswilila ku ina yakwe ati, “Mulumendo asimo mu cifula, ndimwandi nga namacita uli?”

³¹ Lyene yakoma imbuzi, yatumpika mwingila wakwe Yosefu mu wazi wa mbuzi.

³² Lyene yatwala mwingila kuli isi, nga yavwanga yati, “Twatituzana mwingila uu, uzye ungaya umwingila wa mwana wako umonsi?”

³³ Isi atoola mwingila auceceta nga avwanga ati, “Naumanya, cumi ulio kwene, kalanda wee! Yosefu watalika ni cilyanyi caticimusantola.”

³⁴ Lyene Yakobo alepula mwingila wakwe, azwala visamu mu musana ukulanga ulanda. Nga alosya umwana wakwe umonsi pa manda aingi.

³⁵ Ana yakwe aonsi na anaci yonsi yiiza ku kumutekezya, lelo akana ukutekeziwa avwanga ati, “Awe indi nu kulosya suka imfwe, ndondele umwanane.” Acino atwalilila ukulosya Yosefu umwana wakwe.

³⁶ Insita iyo, mu Eguputo aina Midyani yalanga yakazya Yosefu kuli Potifa, wenga wamuli yacilolo yakwe Falao. Potifa wali intunguluzi yakwe yakalolela ya kwisano kwakwe Falao.