Utandiko 34 - Amazwi Yakwe Leza 2013

Syekemu walema Dina ku maka nu kulongozya nawe

¹ Lyene uwanda umwi Dina, umwana wino Yakobo waviile muli Leya, waile tandalila auze yamangu amu mpanga ilya.

² Lino Syekemu umwana wakwe Hamoli mwina Hivi, umukalamba uwamu muputule wa mpanga ilya wamulola, amulema ku maka nu kulongozya nawe.

³ Lelo nanti wacisile vivyo wali nu lwiswa pali Dina umwana wakwe Yakobo. Watemilwe mukazyana nga atandika ku mulanzya na mazwi yakumulyongofya.

⁴ Nga Syekemu afisya izwi kuli isi Hamoli ati, “Nkulonda kuti mukazyana wi aye umuci wane.”

⁵ Yakobo auvwa ukuti Dina umwana wakwe yatiyamonona, lelo pano ana yakwe aonsi yala yacili mu mpanga mu kucema iviteekwa, amila umwenzo mpaka lino yawela.

⁶ Hamoli isi wakwe Syekemu aya ukuyalandana na Yakobo.

⁷ Nkumankuma ana yakwe Yakobo aonsi yawela ukufuma mu mpanga. Lino yuvwile ivyacitikile kaci wao ciyapezya amano yavulungana nu ukali pali cino Syekemu watacita ku mwana wakwe Yakobo ica muzewanya mu Izlaeli.

⁸ Hamoli avwanga kunoyali ati, “Mwana wane Syekemu watatemwa umwana winu kaci. Napapata lekini amutwale.

⁹ Lekini tuye akuvwana mu kutwalizyanya, twatwala ana inu yakaci namwe mwatwala ana itu.

¹⁰ Lyene mungikala naswe, nga ni mpanga ingaya iyakwinu, mungaculuzya muno mutemilwe nu kulonka vyuma muno mpanga.”

¹¹ Lyene Syekemu anena isi wakwe Dina na yakalume yakwe ati, “Mukwai munjelele, namamulipa consi cino mumalonda.

¹² Landini consi cino mumalonda kuti ndipe. Mpelini mutengo wa mpango muno mukulondela pamwi ni cawila. Consi cino mumampingula ukulipa namalipa, cikulu sile muleke nemo inde mutwale.”

¹³ Ana yakwe Yakobo aonsi yazumila Syekemu ni isi Hamoli mwi syente, pamulandu wakuti Syekemu wazewinye Dina.

¹⁴ Yavwanga yati, “Tutangazumila kaci witu atwalwe ku monsi atasilamulwa pano cingaleta muzewanya kunotuli.

¹⁵ Tungazumila ukulonda kwinu ndi mwazumila icintu conga sile, muye wakwe vino twaya, namwe mwasilamula aonsi akwinu onsi.

¹⁶ Lyene tulatwalizyanya, mwemo mutwala yakaci itu naswe tutwala yakaci inu. Tungikala namwe nu kuya umutundu onga.

¹⁷ Lelo ndi mutangazumila ukusilamulwa, tumatola kaci witu twapita.”

¹⁸ Amazwi yaa yuvwika sile ningo kuli Hamoli nu ku mwana wakwe Syekemu.

¹⁹ Nu mulumendo Syekemu atasumvile kasita ukucita vino ana yakwe Yakobo yamunenyile ukucita, pamulandu wa lukundo lwakwe lwa pa mwana wakwe Yakobo. Na amu ng'anda yakwe Hamoli yonsi yacindike Syekemu.

²⁰ Hamoli na Syekemu umwana wakwe umonsi yapita yaya ku cifulo caku konganilako ku mpongolo ya musumba, ku ikazi ya musumba yauze yati,

²¹ “Antu ya, acuza itu. Lekini twikale muno mpanga itu pamwi nayo. Lekini yapita antungwa. Impanga ikulu cuze iyakwikalamo sweswe pamwi nayo. Lekini twatwala ana yao, nga nayo yatwala ana itu.

²² Lelo antu yaa yangazumila ukwikala naswe, ukuya umutundu onga ndi twazumila ukusilamula aonsi yonsi ndi vino nayo yakacita.

²³ Uzye iviteekwa vyao ni vyuma vyonsi vino yakwata vitalaya ivyakwitu? Lekini tuzumile kuti ikale naswe.”

²⁴ Onsi aikazi amu musumba yazumila kuli cino Hamoli na Syekemu yalanda, nga aonsi yonsi yasilamulwa.

²⁵ Lino papita amanda yatatu ala aonsi yonsi yacili ni vilonda vyakusilamulwa, ana aonsi yakwe Yakobo yaili, Simeoni na Levi, yakalume yakwe Dina, yatoola impanga zyao ingila mu musumba ukwaula kutunganyiwa, nga yakoma aonsi onsi.

²⁶ Yakoma na Hamoli na Syekemu umwana wakwe umonsi, yasenda na Dina ukufuma mu ng'anda mwakwe Syekemu, yapita.

²⁷ Na ana yauze yakwe Yakobo aonsi yingila mu musumba, yaciluka vyala, yasampa vyuma pa kulandula pa muzewanya wakwe kaci wao Dina.

²⁸ Yasampa maufyo ya mfwele, ing'ombe, yapunda, ni vyuma vyonsi ivyali mu musumba nu ku vyalo.

²⁹ Yasenda vyuma vyonsi na anaci na ana, na consi cino yazanyile mu mang'anda yao.

³⁰ Yakobo anena Simeoni na Levi ati, “Yanamwe, vino mwandetelela ku ina Kenani, aina Pelizi nga nu muntu wensi mu mpanga ii amampata. Swemo aonsi tuli ncepelwa. Ndi antu yaa yalemana pamwi kuti yanzanze, lyene ang'anda itu yonsi yamalowa.”

³¹ Lelo ana yaasuka yati, “Tutangazumilizya kaci witu yamucite wakwe cizelele.”