Utandiko 33 - Amazwi Yakwe Leza 2013

Yakobo wakomanya Esau

¹ Yakobo asanzula amanso nga alola Esau akwiza na antu yakwe imyanda ini. Caleka aankanya ana yakwe muli yanyina, Leya, Lakeli nga na azya yakwe anaci yoili.

² Yakobo akolezya azya yakwe anaci na ana yao. Lyene Leya na ana yakwe nayo yalondelela, nga Lakeli na Yosefu aika icisila.

³ Yakobo ayakolelela yonsi nga lino wapalama pipi na Esau afukama pansi afupime maila cinimbali.

⁴ Lelo Esau asimula ku kukomanya Yakobo. Lino wafika amukukula, amutonsola nga lyene yoili iyatandika ukulila.

⁵ Esau acelecensya monsi, nga alola ana na yanyina, nga auzya ati, “Uzye ya yonsi yano uli nayo aaweni?” Yakobo aasuka ati, “Mukwai, ya ana yane yano Leza wampa mu usuma wakwe.”

⁶ Lyene azya yaya anaci pamwi na ana yao iyafika nga yafukama pansi yafupime.

⁷ Leya na ana yakwe nayo iyafika icisila ca azya yafukama pansi yafupime, pa kusyalikizya Lakeli na Yosefu iyafika nga yafukama pansi yafupime.

⁸ Nupya Esau auzya ati, “Uzye antu na maufyo yano nkomenkinye cikusenula cani?” Yakobo aasuka ati, “Musambazi, cikusenula ukuti nkulonda kuzana uluse kunuli.”

⁹ Lelo Esau avwanga ati, “Vino nkweti vivule mutowane, sunga vino ukweti.”

¹⁰ Yakobo nawe ati, “Awe napapata ndi wati unjela luse, pokelela uwila uno napeela kunuli. Ukulola impumi yako, kunondi cili ndi wakulola impumi yakwe Leza, na muli cii wemo walanga ukutemwa kunondi.

¹¹ Napapata pokelela uwila wane uno natindeta kunuli. Mwene Leza wali nu luse kunondi nu kumpela vyonsi vino nkulonda.” Yakobo watwalilile ukumupapata mpaka lino Esau wazumile apokelela uwila.

¹² Lyene Esau anena Yakobo ati, “Katukatuke twapita. Nene namakolela.”

¹³ Yakobo ati, “Musambazi, mumanyile ukuti ana anono yatiyatonta, lyene indinzile nsakamale iviteekwa ivili nu twana, imfwele pamwi ni ng'ombe kwene. Ndi twapita ulwendo uwanda upuma mu kupatikizya ufyo onsi ungafwa.

¹⁴ Musambazi, napapata munkolelele ne muomvi winu. Namaizanga icisila panono panono kulingana nu kucincila kwa viteekwa na ana anono, mpaka muzane pa Seili.”

¹⁵ Esau avwanga ati, “Fwandi leka nkusile antu yane yamwi!” Lelo Yakobo avwanga ati, “Musambazi cico cingaya pa luse lwako, lelo citakulondekwa.”

¹⁶ Caleka uwanda ulya Esau akatuka ulendo wakuswilila ku Seili.

¹⁷ Lelo Yakobo aya ku Sukoti kuno waile akuula ng'anda, nga ni vyakuuwamo ing'ombe ni vitata vya viteekwa vyuze. Uli mulandu uno watemile cifulo cici ati Sukoti.

¹⁸ Yakobo pakuwela ukufuma ku Mesopotamya afika ulumi ku musumba wa Syekemu mu mpanga ya Kenani. Akuula insakwe yakwe kunzi ya musumba.

¹⁹ Akala ciputulwa ca calo ku ana yakwe Hamoli, isi wakwe Syekemu, pa mpiya zyakwe siluva umwanda, apano aimika itaalu lyakwe.

²⁰ Akuula kavuwa, nga akatemela izina Eli Eloe Izlaeli, kuli kuti Leza wane, Leza wakwe Izlaeli.