Utandiko 30 - Amazwi Yakwe Leza 2013

¹ Lelo lino Lakeli walola ukuti atakuvyalila Yakobo ana, aya nu uzuwa pali nyinalenzi, nga anena Yakobo ati, “Mpela ana, nanti mfwe!”

² Yakobo asokela Lakeli nga amunena ati, “Ntangentole cifulo cakwe Leza uwakulenga ukuya ng'umba.”

³ Lyene Lakeli aasuka Yakobo ati, “Tola Bilaa, mukazyana wane muzya, umutwale kuti akuvyalile ana nalela. Nani ningaya nyina mwana kupitila munoli.”

⁴ Caleka apeela Bilaa muzya wakwe kuli Yakobo, nga nawe amutwala.

⁵ Bilaa asenda indilwa, nga avyalila Yakobo umwana umonsi.

⁶ Lakeli avwanga ati, “Leza waputwila umulandu ku lusansa lwane. Watauvwa ipepo lyane nu kumpela umwana umonsi.” Caleka amutemela izina ati a Dani.

⁷ Bilaa muzya wakwe Lakeli nupya asenda indilwa, avyalila Yakobo umwana umonsi wakwe ciili.

⁸ Lakeli avwanga ati, “Nacimvya ulwi wane wa maka wapali nene na mangulenzi.” Caleka amutemela izina ati Nafutali.

⁹ Lino Leya walola ukuti ikwata lyasila, apeela Zilipa muzya wakwe kuli Yakobo kuti aye umuci wakwe.

¹⁰ Lyene Zilipa avyalila Yakobo umwana umonsi.

¹¹ Leya avwanga ati, “Nakwata ulongo.” Caleka amutemela izina ati a Gadi.

¹² Zilipa muzya wakwe Leya avyalila Yakobo umwana wakwe ciili umonsi.

¹³ Nga Leya avwanga ati, “Endi, vino nazanga! Na anaci yanji yamangama yati luzango.” Caleka amutemela izina ati a Asyeli.

¹⁴ Mu nsita yakuzombola ingano Lubeni waile ku vyalo, nga azana mandaleki, aletela Leya. Lakeli anena Leya ati, “Napapata mpeko mulembo wa uvyazi ni citemwiko uno umwana wako wataleta.”

¹⁵ Leya aasuka ati, “Umalapila! Uzye utampoka wane? Lyene ukulonda kuti umpoke na mandaleki wino Lubeni umwana wane umonsi wandondela.” Lakeli nawe avwanga ati, “Ndi wampeela mulembo uno umwana wako wataleta, ale lyene Yakobo wiza lala nawe ilelo usiku.”

¹⁶ Walanga lino Yakobo akufuma ku vyalo manguzi, Leya amukomanya nga amunena ati, “Ilelo ulinzile ukulala nani, pamulandu wakuti natindipila pakupeela umuci unji mandaleki wino umwana wane umonsi wandondela.” Caleka Yakobo waile alala na Leya usiku ulya.

¹⁷ Leza nawe aasuka ipepo lyakwe Leya, nga nawe asenda indilwa avyala umwana umonsi.

¹⁸ Leya avwanga ati, “Leza watampela cilambu pa kupeela muzya ku wane.” Caleka atemela umwana izina ati a Isakali.

¹⁹ Leya nupya asenda indilwa, nga avyalila Yakobo umwana umonsi wakwe mutanda.

²⁰ Lyene Leya avwanga ati, “Leza watampela uwila usuma, lyene uwane alantemwisya pano natimuvyalila ana aonsi mutanda.” Caleka amutemela izina ati a Zebuluni.

²¹ Pacisila nupya avyala umwana umwanaci, nga amutemela izina ati a Dina.

²² Lyene Leza atilile Lakeli, acino azumila ipepo lyakwe, aleka kuti lyene angavyala ana.

²³ Lakeli asenda indilwa avyala umwana umonsi. Avwanga ati, “Leza watamfumya mu kuzewana kwa kuntavyala.”

²⁴ Nga amutemela izina ati a Yosefu, nga avwanga ati, “Yawe, si ungampeela umwana namuze umonsi.”

Yakobo yalayana na Labani

²⁵ Pacisila ca kuvyalwa kwakwe Yosefu, Yakobo anena Labani ati, “Leka mpite nswilile kumwitu.

²⁶ Mpeko aci yane na ana yano nalonka pa kukuombela, nga nani namapita. Wacimanya cuze vino nakuombela.”

²⁷ Labani amwaasuka ati, “Leka ndandepo izwi. Ndi wantemwa utapita pano napendola nu kuzana vino Mwene Leza wampolelela mulandu uno twaya nawe pamwi.

²⁸ Caleka ungalanda malipilo yako, nga nani namalipila.”

²⁹ Yakobo amunena ati, “Wamanya ningo insita ino natinkuombela na vino iviteekwa vyako vyativisanda pamulandu wa usunzi wane.

³⁰ Pa vinono vino wakweti lino ntali nize vyativivulilako cuze, na Yawe watakupolelela pamulandu wa usunzi wane. Lyene insita yatifika yakuti nani nkailolela nemwisikulu.”

³¹ Labani auzya Yakobo ati, “Uzye icani cino namakulipila?” Yakobo aasuka ati, “Ntakulonda malipilo yamwi. Lelo namatwalilila ku kucemela iviteekwa ndi wacita cino namakunena:

³² Ilelo leka mpituluke mu viteekwa vyako vyonsi, kupaatula imfwele zyonsi zitifi ni zya maalamaala, nanti imbuzi izili na matonitoni nanti maalamaala. Yaa, ali malipilo yano nkulonda.

³³ Manda akwiza ulazana ndi nene wacumi. Lino uli nu kwiza nengula pa malipilo yane, ndu ulazana nkweti imbuzi itakweti matonitoni nanti maalamaala, nanti imfwele yonga isi itifi, ulamanya ukuti iiye.”

³⁴ Labani azumila ati, “Cisuma tulacita cino walanda.”

³⁵ Lelo uwanda kwene ulya Labani wene aya afumya yasawe yonsi a mingololozi na matonitoni nga afumya na yanyinambuzi yonsi a maalamaala. Afumya ni mfwele zyonsi zitifi apeela ana yakwe aonsi kuti yazisunga.

³⁶ Lyene apita ukufuma kuli Yakobo asenda iviteekwa vivyo ukuya kutali kwa lwendo lwa manda yatatu. Yakobo asyala ni viteekwa vino nyinalume wasile.

³⁷ Alino Yakobo aya atema misambo iyisi ya miti iyakolana ni mifungo, na makole na yanamunsi nga aiza afopola kuti yaloleka iya mingololozi itiswe.

³⁸ Nga atoola imiti ino wafopwile aisansanta kuzingulusya imilangu ino iviteekwa vyamwelanga mwenemo amanzi pa cifula. Cino wacitile vivyo pano lino iviteekwa viizanga ku kumwa amanzi alino vyakwelananga.

³⁹ Iviteekwa vyakwelananga ala vikulolekesya ku mingololozi ya miti ifopole, nga pali pa kuvyala twana utwa mingololozi, nu twa maalamaala, nu twa matonitoni.

⁴⁰ Avino Yakobo wapaatulanga ana ya mfwele na ambuzi iyaya yonga, lelo zyasyala aya azyuminkanya na zyakwe Labani zya maalamaala ni zitifi. Mu musango uu amuno wene wasandulwile ufyo wakwe nu kuupaatula ku ufyo wakwe Labani.

⁴¹ Lyonsi lino iviteekwa iviine vyakalume ndi vimalonda vyakaci, Yakobo waviiletanga pipi ni miti ifopole.

⁴² Lelo atikanga misambo ku nkolelo lino iviteekwa vyonde vikulondelwa. Caleka iviteekwa vyonde vyonsi vizile viya vyakwe Labani nga iviine vyonsi viya vyakwe Yakobo.

⁴³ Mu musango kwene uu amuno Yakobo wizile aya umukama wakwe cimwi, akwata iviteekwa vivule cuze, na aomvi anaci na aonsi, ni ngamila na yapunda.