Utandiko 3 - Amazwi Yakwe Leza 2013

Umuntu waifya

¹ Lyene inzoka yali icenjelesye pa viumbwa vyonsi vyamu mpanga vino Yawe Leza waumvile. Inzoka yuzya umwanaci iti, “Uzye icacumi Leza wamuinda ukulya iviseekwa vyaku miti yonsi yamu calo?”

² Umwanaci aasuka ati, “Tungalya iviseekwa vyaku miti yonsi yamu calo,

³ suka sile ku muti uno uli pakasi ka calo. Leza watuinda ukulya iviseekwa vyaku muti uwo nanti ku ukumya, pano ndi twacita vivyo tulafwa.”

⁴ Inzoka nayo inena umwanaci iti, “Cico cisi cacumi, mutalafwa awe.

⁵ Pano Leza wamanya vino uwanda uno mulalyako iviseekwa vivyo mulalingana na aliwe nu kumanya visuma ni viipe.”

⁶ Caleka umwanaci alola usuma wa muti ni viseekwa vyakweo vino vyalolekanga nu mulyo. Alino aelenganya usuma wa kuya na mano. Lyene atoola iviseekwa vimwi alya, nga atoola iviseekwa vimwi apeela iya nga nawe kwene alya.

⁷ Lilyo kwene lino yalya iviseekwa vyaku muti uwo, yapeelwa kumanya nga yiluka ukuti yali tupu. Acino yasuminkanya amafwa ya musamvu iyaindizya mu misana yao.

⁸ Manguzi uwanda kwene ulya umonsi nu muci yuvwa mutinti wakwe Yawe Leza ala akupita mu calo. Lyene yafisama mu miti kuti Leza atayalola.

⁹ Lelo Yawe Leza aama umonsi, alaizya ati, “Uzye uli kwi?”

¹⁰ Umonsi nawe aasuka ati, “Inuvwa mutinti wako mu calo, pali pakuvwa intete, nafisama pano indi tupu.”

¹¹ Leza amuuzya ati, “Uzye aweni uwali wakunena ukuti uli tupu?” “Uzye watulya iviseekwa vyaku muti uno namuinda ukulyako?”

¹² Umonsi nawe aasuka ati, “Umwanaci wino wampeela kuti aya nani uwali wampeela viseekwa, nga nani nalya.”

¹³ Lyene Yawe Leza auzya umwanaci ati, “Uzye pacani cino wali wacita cii?” Umwanaci aasuka ati, “Inzoka yali yansomba, nga nani nalya viseekwa.”

Kuvunukwa ukufuma kuli Yawe Leza

¹⁴ Alino Yawe Leza anena inzoka ati, “Pamulandu wakuti wacita cii, wemo watipwa pakasi ka nyama zyonsi! Ukufuma ndakai ukaselela pa lunda lwako, nupya umalyanga ivu mu umi wako onsi.

¹⁵ Nika uwanisi pakasi kako nu mwanaci, pakasi ka mwana wako nu mwana wakwe. Alakufwamfwanta ku mutwe, nga nawe ulamuluma ku cintunta.”

¹⁶ Alino Yawe Leza anena umwanaci ati, “Ndungilizya ucuzi wako pakusenda indilwa nu kuwaika kwa umbuza. Ulatwalilila kulondesya uwako, nga nawe alaya a kateeka wako.”

¹⁷ Alino Yawe Leza anena umonsi ati, “Pamulandu wakuti wali uvwila umuci wako nga nu kulya iviseekwa vyaku muti uno namuinzile, musili watipwa pamulandu wako. Ulaombesya cuze pakuzana ivyakulya.

¹⁸ Umusili ulakumezezya vikona ni myunga, nga nawe ulalya vimelwa vyamu mpanga mu manda aumi wako onsi.

¹⁹ Ulakailwa pa kuzana ivyakulya kufika lino ulaswilila ku musili kuno waumvilwe. Waumvilwe ukufuma ku musili, nupya ku musili akuno ulaswilila.”

²⁰ Adamu watemile umuci wakwe izina ati Eva, pamulandu wakuti ali nyina wa antu onsi.

²¹ Lyene Yawe Leza anyukila Adamu nu muci wakwe impapa ya nyama, nga ayazwika.

Leza wafumya Adamu na Eva mu calo ca Edeni

²² Alino Yawe Leza avwanga ati, “Ndakai umuntu wakolana naswe, pano wakwata amano akumanya visuma ni viipe. Atalinzile kuzumiliziwa nupya ukulya ciseekwa caku muti uno ukapeela umi, nga aikalilile nu umi.”

²³ Caleka Yawe Leza apeela ilamulo ukuyafumya mu calo ca Edeni, kuti alima musili uno yaumvilweko.

²⁴ Lino wayafumya mu Edeni, Yawe Leza aika yakelubi nu lupanga lwa moto ku ufumondaka wa calo. Lupanga lwacingililanga umuti uno ukapeela umi kuti umwi atapalamilako.