Utandiko 29 - Amazwi Yakwe Leza 2013

Yakobo wafika kwakwe Labani

¹ Yakobo atwalilila nu ulendo wakwe, alungama ku mpanga yaku ufumondaka.

² Aiukila ukuti wafika pa cifula icali mu calo, na maufyo yatatu yala yaizi pambali ya cifula. Papa kwene apano yamwesyanga imfwele, ni cifula cakweti ntupiko yi we likulu pa mulyango.

³ Lyonsi lino maufyo yonsi iza yakolongana papa, yakacema yakunkulusya iwe, yayula mulyango wa cifula nga yamwesya imfwele. Lino yamala kuzimwesya yaswilizya iwe pa cifula.

⁴ Yakobo auzya yakacema ati, “Yacuza yane, uzye mufumile kwi?” Yakacema yaasuka yati, “Twafuma ku Halani.”

⁵ Nupya Yakobo ayuzya ati, “Uzye mwamanya Labani, mwizikulu wakwe Nawoli?” Nayo yaasuka yati, “Endi, twamumanya.”

⁶ Yakobo nupya ayuzya ati, “Uzye ali ningo?” Nayo yaasuka yati, “Ee mukwai, uwa kwinu. Na Lakeli umwana wakwe umwanaci awiyo akwiza ni mfwele zyakwe isi.”

⁷ Yakobo ayanena ati, “Nga vino ucili musanya ni nsita yakuwezya mfwele itali ifikile, uzye pacani cino mutangazimwesya amanzi nu kuziswilizya zikalya?”

⁸ Yakacema yaasuka yati, “Tutangacita cico mpaka zyonsi ziza zyakolongana nga tufumyapo ntupiko yi we, lyene tutapa nga tuzimwesya.”

⁹ Lino Yakobo acili akulanda na yakacema Lakeli afika nu ufyo wa mfwele zyakwe isi.

¹⁰ Lino Yakobo walola Lakeli muvyala wakwe ali ni mfwele zyakwe isi Labani, asimwilila ku cifula, afumyapo ciliwe nga amwesya imfwele amanzi.

¹¹ Lyene Yakobo atonsola Lakeli nga atandika ukuponya minsozi pamulandu nu luzango.

¹² Anena Lakeli ati, “Nene mwana wakwe Labeka wakazi kakwe so.” Lakeli asimwilila ukuya nena isi ilyasi lyonsi.

¹³ Nga lino isi uvwa amazwi yapa mwipwa wakwe Yakobo, asimula ukuya mukomanya, amuzengela amutonsola amutwala ku ng'anda. Lyene Yakobo alandila Labani vyonsi ivyacitike.

¹⁴ Labani amunena ati, “Ee, mucumi wewe wazi wane.” Yakobo aikala mwakwe Labani umwezi onga.

Yakobo waombela Labani pali Leya na Lakeli

¹⁵ Labani auzya Yakobo ati, “Utange wambombela sile kwaula kulipilwa pamulandu wakuti wewe wakazi kane. Unene uzye azinga zino ungatemwa kuti nkulipe?”

¹⁶ Labani wakweti ana yakaci yaili, zina lyakwe nyinalenzi wali a Leya, nu muto a Lakeli.

¹⁷ Leya wakweti manso afutalile. Lelo Lakeli wali wa caata cisuma nupya muyembe.

¹⁸ Yakobo atemwapo Lakeli nga ati, “Namakuombela imyaka cinimbali pa mwana wako munono, Lakeli.”

¹⁹ Labani ati, “Ningatemwa kumupeela kunuli ukuluta kumupeela ku muntu muze. Ikala kuno nani.”

²⁰ Caleka Yakobo aombela Lakeli imyaka cinimbali, ni nsita yonsi kunoli yali wa manda yanono. Pano wamutemilwe cuze.

²¹ Lyene Yakobo anena nyinalume ati, “Imyaka yatikumana leka ntwale umwana wako.”

²² Acino Labani ateyanya cimulo cawinga nga aama antu yonsi aku ncende ilya kwiza ku winga.

²³ Lyene usiku Labani mucifulo cakupeela Lakeli kuli siwinga amupeela Leya nyinalenzi, nga Yakobo amanya Leya.

²⁴ Labani apeela Zilipa muzya wakwe mukazyana kuli Leya kuti amuombela.

²⁵ Katondo lino waca nga Yakobo alola vino a Leya awino watatwala. Anena Labani ati, “Uzye pacani cino wacitila ca musango uu kunondi? Uzye ntakuombile kuti umpeele Lakeli? Uzye fwandi pacani cino wacitila ucenjezi kunondi?”

²⁶ Labani aasuka ati, “Pano cisi camu lutambi lwitu ukutwalizya umuto lino nyinalenzi atali atwalwe.

²⁷ Lolela umulungu upite uwa winga ndakupeela na Lakeli kwene ndi wazumila ukuombela imyaka nayuze cinimbali.”

²⁸ Yakobo azumila. Lino amanda cinimbali ya winga yasila, Labani amupeela Lakeli kuti aye umuci wakwe.

²⁹ Labani apeela Bilaa muzya wakwe mukazyana kuli Lakeli kuti amuombela.

³⁰ Caleka Yakobo atwala na Lakeli kwene, nga amutemwisya ukuluta Leya. Lyene aombela nyinalume imyaka nayuze cinimbali.

Ana yakwe Yakobo

³¹ Lino Yawe walola ukuti Yakobo watemwa Lakeli ukuluta Leya, apeela Leya ukwasi, lelo Lakeli aya ng'umba.

³² Leya asenda indilwa nga avyala umwana umonsi. Avwanga ati, “Yawe watalola ucuzi wane, acino lyene uwane amantemwa. Acino atemela umwana izina ati a Lubeni.”

³³ Leya asenda indilwa nayuze avyala umwana umonsi namuze. Alino avwanga ati, “Yawe wampeela umwana umonsi pano wamanya vino ntatemwikwa. Acino atemela umwana izina ati a Simeoni.”

³⁴ Nupya kwene asenda indilwa, nga lino wavyala umwana umonsi avwanga ati, “Ndakai uwane amantemwa cuze, pamulandu wakuti natimuvyalila ana aonsi yatatu.” Acino atemela umwana izina ati a Levi.

³⁵ Nupya kwene asenda indilwa, nga lino wavyala umwana umonsi avwanga ati, “Ndakai namalumbanya Yawe.” Acino atemela umwana izina ati a Yuda. Lyene ni kwata litala limilila.