Utandiko 27 - Amazwi Yakwe Leza 2013

Isaki wapolelela Yakobo

¹ Isaki wakosile apafula. Lyene aama Esau iyeli lyakwe amunena ati, “Mwanane!” Nawe Esau azumila ati, “Anene pano!”

² Isaki ati, “Watulola ukuti ni nkota, ningafwa insita ili yonsi.

³ Lyene tola vyanzo vyako, ulapwa ni mivwi, kalunge mu mpanga unkomele inyama.

⁴ Wize weleke inyama imwi mu musango uno natemwa, nga undetele ndye. Ndi niza nalya nga nize nkupolelele lino ntacili imfwe.”

⁵ Labeka fwandi ala akutezya lino Isaki walandanga na Esau umwana wakwe umonsi. Caleka lino Esau waile mu mpanga ku kulungila isi nyama,

⁶ Labeka anena Yakobo ati, “Nalinuvwa vino so walakunena Esau ati,

⁷ ‘Kalunge ulete inyama, nga unjelekele imwi indye. Indi nu kwiza kupolelela pa manso yakwe Yawe lino ntali imfwe.’

⁸ Ndakai mwanane, uvwikisye ningo nu kucita cino namakunena.

⁹ Yanga ku viteekwa ukasolole utumbuzi twiili twine, ulete kunondi kuti nize neleke cakulya icili wakwe cino so watemwa.

¹⁰ Wize utwale kuli so kuti alye, nga akupolelele lino atacili afwe.”

¹¹ Lelo Yakobo anena nyina ati, “Wamanya vino Esau wakwata ipipi. Lelo nemo umwili wane utelepe.

¹² Tata amaiza ampalapasye nu kumanya vino nkumutumpika, lyene namaiza njiletele citipu mucifulo ca upolelelo.”

¹³ Labeka amunena ati, “Citipu consi ciye panondi, mwanane cita cino nakunena. Pita kalete imbuzi kuno.”

¹⁴ Caleka Yakobo apita aya aleta imbuzi, yiiza yakoma, nga aeleka cakulya cino Isaki watemilwe.

¹⁵ Lyene Labeka atoola ivyakuzwala vyakwe Esau visuma vino wasunzile mu ng'anda azwika Yakobo.

¹⁶ Amwikila ni mpapa ya mbuzi ku makasa yakwe, alino nu mu nsingo muno atali nu upipi.

¹⁷ Amupeela cakulya cino welike ningo nu mukate ati twala kuli so.

¹⁸ Lyene Yakobo aya kuli isi amunena ati, “Tata!” Nawe azumila ati, “Anene mwanane, nga wewe weni?”

¹⁹ Yakobo aasuka ati, “Anene Esau iyeli lyako. Natincita cino wali unenyile ukucita. Napapata katuka wikale, nga ulye cakulya cino naleta kunuli pakuti umpolelele.”

²⁰ Isaki auzya umwana wakwe umonsi ati, “Uzye waya wakoma zuwa uli nyama, we mwanane?” Yakobo aasuka ati, “Yawe, Mwene Leza wako wali wampela.”

²¹ Isaki anena Yakobo ati, “Nakupapata palamila pipi pakuti nkuleme. Uzye umucumi wewe mwanane Esau nanti foo?”

²² Yakobo apalamila isi, nga isi lino wamupalapasya avwanga ati, “Izwi lyako likuuvwika ngati ilyakwe Yakobo, lelo makasa yakuvwika ngati a Esau.”

²³ Atilwike ukuti a Yakobo, pano wali ni pipi ku makasa yakwe, wakwe Esau. Alino Isaki atandika ukumupeela upolelelo.

²⁴ Lelo nupya amuuzya ati, “Uzye mu cumi wewe mwana wane Esau?” Nawe azumila ati, “Anene kwene mukwai.”

²⁵ Isaki ati, “Mwanane, ndetela inyama yako imwi kuti indye, nga lyene namakupolelela.” Lyene Yakobo amuletela inyama nga nawe alya. Alino amutwalila waini nga nawe amwa.

²⁶ Lyene isi amunena ati, Mwanane, palama pipi untonsole.

²⁷ Lino wapalama kuti amutonsole Isaki anunsya lyena lya vizwalo vino Yakobo wazwite, nga amupolelela ati, “Kununkila kusuma kwa mwana wane kukoline ukununkila kwa calo cino Yawe wapolelela.

²⁸ Si Mwene Leza akupeele imvula ukufuma kwiyulu, nu kuvunzya vyalo vyako. Si Mwene Leza akupeele uzombozi wa mbezu ni vilimwa vya viseekwa vingi, na waini.

²⁹ Si mitundu ni nko zyonsi zyakutumikila, na antu yakufukamila. Si uye umwene pa anyonko, na ana yakwe nyoko aonsi yakakufukamila. Yano onsi alakutipa yakatipwe, na yano alakupolelela yakapolelelwe.”

Esau wapapata kuli isi kuti amupolelele

³⁰ Lino Isaki wamala kumupolelela, Yakobo afumapo nga Esau nawe alino afika ukufuma ku kulunga.

³¹ Nawe kwene aeleka cakulya icisuma atwala kuli isi ati, “Tata napapata katuka ulye kanyama kampanga, ne mwana wako naleta. Ndulye pakuti umpolelele.”

³² Isaki amuuzya ati, “Uzye wewe weni?” Esau aasuka ati, “Anene iyeli lyako.”

³³ Isaki atandika kuzakaza wakwe cimwi nga avwanga ati, “Nga fwandi aweni lyene uwali wakoma inyama nu kuleta kunondi? Natindya lino utali kuti wize. Nalinamupolelela. Caleka upolelelo waya uwakwakwe pe.”

³⁴ Lino Esau uvwa vivyo alila nu kulosya kwa ulanda ati, “Tata, umpolelele nani kwene!”

³⁵ Isaki avwanga ati, “Munyonko wali wiza wantumpika. Wataiza asenda upolelelo wako.”

³⁶ Esau avwanga ati, “Lino lyaya iila lyakwe ciili lino wantumpika. Endi, acino izina lyakwe a Yakobo. Watozile nsambu ya uyeli wane, nga nilelo wampokolola nu upolelelo wane. Tata uzye utasileko umwi?”

³⁷ Isaki aasuka ati, “Nimucita umwene wako mpiti, nupya ni ncita aluko lwakwe yaye aomvi yakwe. Nimupeela imbezu ni viseekwa na waini. Mwanane kusi nanti cimwi cino ningakucitila!”

³⁸ Esau atwalilila kupapatila isi kuti amupolelele nanti upolelelo onga sile, ati, “Tata, si mpolelele nani kwene!” Lyene Esau alila nu kupooma wakwe cimwi.

³⁹ Alino Isaki amunena ati, “Wemo kusi ukama kunuli panonsi, kusi imvula kunuli ilafuma kwiyulu iya vyalo vyako.

⁴⁰ Mu lupanga umulaya wikazi wako, Lelo ulaya muomvi wa muto wako. Ndi waca wamusangukila, lyene ulafuma mu maka yakwe.”

⁴¹ Esau apata Yakobo pamulandu wakuti isi wamupolelile, nga aelenganya ati, “Insita yakulosya tata yatipalama pipi. Lino insita ya kulosya ilasila, ndakoma Yakobo.”

⁴² Lelo Labeka uvwile kupanga kwakwe Esau, nga anena Yakobo ati, “Uvwa kuno, solenzi akupanga kuti ace alandule akukome.

⁴³ Mwanane, lyene ndakai cita cino namakunena. Mwanane ukwaula ukusumba insita katuka pita kwakwe nyokolume Labani ku Halani.

⁴⁴ Ukikale nawe pa nsita imwi kufika lino solenzi wawezya umwenzo.

⁴⁵ Lino munyonko waca wawezya umwenzo nu kwilila vyonsi vino wacita kunoli, alino ndatuma umwi kuti aize akuwezye. Uzye pacani ningaleka kuti mwe ana yane muce mukomane uwanda onga, yanamwe?”

Yakobo utukila kwakwe Labani

⁴⁶ Labeka anena Isaki ati, “Nemo caticimfulila nupya natonta na aci yakwe Esau ainamasi. Ndi cakuti na Yakobo kwene angatwala wenga uwamu ina Hiti, ale lyene cinganzipila ukufwa.”