Utandiko 25 - Amazwi Yakwe Leza 2013

Ana nayauze yakwe Abulaamu

¹ Abulaamu watwite umwanaci namuze, izina lyakwe a Ketula.

² Ketula wamuvyalile Zimulani, Yokisyani, Medani, Midyani, Isyibaki na Syuwa.

³ Yokisyani wali a Isi wakwe Syeba na Dedani, na ana yakwe Dedani aonsi yali aina Asyuli, aina Letusi na Leumi.

⁴ Ana yakwe Midyani aonsi yali a Efa, Efeli, Hanoki, Abida na Elidaa. Yaa yonsi yali amu mupanda wakwe Ketula.

⁵ Abulaamu wasilile Isaki vyuma vyonsi vino wakweti.

⁶ Lelo lino atali kuti afwe walanga wapaatula vyuma vimwi apeela ku ana amu aci yauze. Lyene ayafuntusya kuli Isaki ayatuma ukuya ikala ku mpanga yaku ufumondaka.

Kufwa nu kuzikwa kwakwe Abulaamu

⁷ Abulaamu watenzi imyaka umwanda onga na makumi cinimbali na isano.

⁸ Lyene Abulaamu afwa pa musinku wa kukota cuze, umukombe uwa myaka ivule. Nga yamuzika ukwaizi ivikolwe vyakwe.

⁹ Ana yakwe Isaki na Isumeli yamuzika mwi cele lyamu Makipela, mu calo icali cakwe Efuloni, umwana umonsi wakwe Zoyali, umwina Hiti, ku ufumondaka wakwe Mamule.

¹⁰ Icalo cino Abulaamu wakazile ukufuma ku ina Hiti, amuno Abulaamu na Sala oili yazisilwe.

¹¹ Lino Abulaamu wafwa, “Leza apolelela Isaki uwatenzi pipi ni cifula cino camwangwa ukuti Beeli Laai Loi.”

Amu mupanda wakwe Isumeli

¹² Yaa ali amu mupanda wakwe Isumeli, umwana umonsi wakwe Abulaamu wino Haga umwina Eguputo, muzya wakwe Sala wamuvyalile.

¹³ Yaa ali mazina ya ana yakwe Isumeli aonsi mu kulondenkana kwao: Nebayoti wali iyeli lyakwe Isumeli, nga a Kedali, Adibeeli, Mibisamu,

¹⁴ Misyima, Duma, Masa,

¹⁵ Hadadi, Tema, Yetuli, Nafyisi na Kedema.

¹⁶ Yaa ali ana yakwe Isumeli, nupya mazina yao yapilwe ku mizi nu ku ncende zya nsakwe zyao, intunguluzi ikumi na ziili ukulingana ni mitundu yao.

¹⁷ Isumeli wakweti imyaka umwanda onga na makumi yatatu na cinimbali lino wafwile, nga yamuzika ukwaizi ivikolwe vyakwe.

¹⁸ Ana yakwe Isumeli yatenzi pakasi ka mpanga ya Havila na Syuli, ku ufumondaka wa Eguputo, lwa kuya ku Asyuli. Yatenzi apalukane ukufuma ku ina yauze, ana yakwe Abulaamu.

Kuvyalwa kwakwe Esau na Yakobo

¹⁹ Yaa ali amu mupanda wakwe Isaki, umwana umonsi wakwe Abulaamu.

²⁰ Isaki wali ni myaka amakumi yani lino watwite Labeka, umwana umwanaci wakwe Betuele, umwina Alamu mu mpanga ya Mesopotamya. Kalume wakwe Labeka a Labani, nga nawe kwene wali umwina Alamu.

²¹ Umuci wakwe wali ng'umba, atakweti ana. Caleka Isaki wamupepelanga kuli Yawe. Yawe auvwa mapepo yakwe na Labeka asenda indilwa.

²² Lino ana yatacili yavyalwe, yapunkana muze nu muze mu ndilwa, asuka Labeka ailizyanya ati, “Uzye pacani cino icintu cii cikucitikila vii kunondi?” Alino apita ku kupepa kuli Yawe, ku kumuuzya muno ciile.

²³ Yawe nawe amunena ati, “Munuli muli inko zili zya antu. Ulavyala antu yaili, yao alacimvyanya mu wikazi wao. Wenga alaya na maka ukuluta muze. Silenzi alaya muomvi wa muto.”

²⁴ Lyene insita ifika yakuti avyale, nga avyala ana aonsi yampundu.

²⁵ Mwana wankolelo wali muyenzulukile, ni pipi lyakwe lyali wa cizwalo ca mavumbu. Amutemela izina ati a Esau.

²⁶ Muto wavilwe ala alemelile ikasa lyakwe ku kantunta kakwe silenzi caleka amutemela izina ati a Yakobo. Isaki wali ni myaka amakumi mutanda lino Labeka wamuvyalile ana.

Esau wakazya uyeli wakwe

²⁷ Alumendo yalya yakula. Esau aya mulunzi mucenjele, waombelanga mu mpanga. Lelo Yakobo wali umutekelele, wasyalanga uku ng'anda.

²⁸ Isaki watemilwe Esau wakwe cimwi, pano walyanga inyama ya mpanga ino wakomanga amuletela. Lelo Labeka nawe watemilwe Yakobo.

²⁹ Uwanda umwi Yakobo welekanga ilanda, nga Esau awela ukufuma ku kulunga. Wali ni nzala,

³⁰ nga anena Yakobo ati, “Namawa ulwezwe, mpeko musunyi uyenzu.” (Acino yamutemile yati, Edomu).

³¹ Yakobo aasuka ati, “Namakupeela ndi cakuti watala wampeela nsambu zya uyeli wako.”

³² Esau avwanga ati, “Cisuma! Ndi pipi nu kufwa, nga usuma ci uno nsambu zingancitila ndakai?”

³³ Yakobo amunena ati, “Utale ulape ukuti umampa nsambu zya uyeli wako.” Esau alapa nu kukazya nsambu zya uyeli wakwe kuli Yakobo.

³⁴ Lyene Yakobo amupeela umukate nu musunyi wi landa. Esau alya amwa, nga alino akatuka afumapo. Vii, ali vino Esau wasawisye nsambu zya uyeli wakwe.