Utandiko 22 - Amazwi Yakwe Leza 2013

Leza wapeela Abulaamu ilamulo kuti amupeele Isaki wa mpolelwa.

¹ Insita imwi Leza wezizye Abulaamu avwanga kunoli, ati, “Abulaamu!” Nawe aasuka ati, “Mukwai, nkutezya!”

² Leza avwanga kunoli ati, “Tola umwana wako umonsi, umwana wako umonsi wenga sile Isaki wino watemwa, uye ku mpanga ya Moliya. Na kukwa akuno uye ukamumpeele impolelwa wa wila wakoca pa mwamba onga uno ndakulanga.”

³ Uca katondo Abulaamu aputola inkwi zya kocela uwila nga azinyepa pali punda. Asenda Isaki na aomvi yaili nga iyatenuka iyaya ku cifulo cino Leza wamunenyile.

⁴ Mu wanda uwalenga yatatu Abulaamu alola katalamukila cifulo cino yamulanzile.

⁵ Anena aomvi yakwe ati, “Syalini pano na punda, Isaki nani twaya mu kupepa. Tumawela kunomuli.”

⁶ Abulaamu atwika Isaki inkwi zya kocela uwila, nga umwisikulu asenda cisonsololwa ca moto nu mwele, yapita yoili.

⁷ Isaki avwanga kuli Isi ati, “Tata.” Isi nawe aasuka ati, “Anene mwanane?” Isaki auzya ati, “Nalola kuti tukweti umoto ni nkwi. Uzye imfwele yene ilikwi iyakupeela uwila wakoca?”

⁸ Abulaamu aasuka ati, “Leza umwisikulu amapeela umwana wa mfwele uwa kupeela wa wila wakoca.” Awe yatwalilila ukupita.

⁹ Lino yafika pa cifulo cino Mwene Leza wamunenyile, Abulaamu akuula kavuwa alonga ni nkwi papela. Anyepa Isaki umwana wakwe umonsi nga amulambalalika pa kavuwa, alino amwika papela pa nkwi.

¹⁰ Atoola nu mwele azunzula ni kasa kuti amukome.

¹¹ Lelo mungeli wakwe Yawe alaizya ukufuma umwiyulu ati, “Abulaamu, Abulaamu!” Nawe aasuka ati, “Anene mukwai.”

¹² Alino mungeli ati, “Utezya ukukoma mulumendo nanti ukucita icili consi kunoli. Lyene nimanya ukuti wemo ukacindika nu kuyela Leza, pano utanjimile umwana wako umonsi uwaya sile wenga.”

¹³ Abulaamu alwenga nga alola suuku watalemya impembe mu cimpuza. Lyene aya amutola awino afyula, nga apeela wa wila wakoca mucifulo ca mwana wakwe.

¹⁴ Abulaamu atemela cifulo cici izina ati, “Kapeela a Yawe.” Caleka kufika na pilelo kwene antu yakati, “Pa mwamba wakwe Yawe apano cilapelwa.”

¹⁵ Mungeli wakwe Yawe aama Abulaamu iila lyakwe ciili ukufuma umwiyulu

¹⁶ nga amunena ati, “Ivyalanda ne Yawe: Nalaya umwi zina lyane ukuti ndakupolelela cuze, pano wazumila ukupeela kunondi umwana wako umonsi ali sile wenga.

¹⁷ Nalaya ukuti ndakupeela ana avule cuze, nu kuvula kwao kulaya wa ntanda zya mwiyulu, nanti wa musensenga uwamu nkumba yakwe yemba. Ana yako yalacimvya anisi yao.

¹⁸ Na antu amu nko zyonsi zya muno nsi yalanguzya kuti nayo njapolelele wakwe vino natinkupolelela na ana yako pamulandu wa kunjela.”

¹⁹ Abulaamu aswilila ku yaomvi yakwe lyene yonsi pamwi yaswilila ku Belisyeba kuno ikalanga.

Ana yakwe Nawoli

²⁰ Uwanda umwi Abulaamu auvwa ukuti Milika, mulamu wakwe, wavyalila Nawoli mwina wakwe Abulaamu ana.

²¹ Iyeli lyakwe wali a Uzi, nga a Buzi na Kemueli isi wakwe Alamu,

²² Kesedi, Hazo, Pilidasi, Yidilafi na Betuele

²³ (Betuele ali isi wakwe Labeka). Mika wavyalile Nawoli umwina wakwe Abulaamu ana yaa, cinani.

²⁴ Muci wakwe Nawoli namuze wali a Leuma, nawe waviile Teba, Gaamu, Taasyi na Maaka.