Utandiko 21 - Amazwi Yakwe Leza 2013

Kuvyalwa kwakwe Isaki

¹ Yawe apolelela Sala wakwe vino walavile

² nga Sala asenda indilwa avyala umwana umonsi kuli Abulaamu uwali mukote. Mwana wi wavilwe mu nsita ino Leza walanzile.

³ Abulaamu amutemela izina ati Isaki.

⁴ Lino Isaki waya na manda cinani, Abulaamu amusilamula wakwe vino Leza wapeezile ilamulo kunoli.

⁵ Abulaamu wali ni myaka umwanda onga lino Isaki wavilwe.

⁶ Sala avwanga ati, “Leza watandetela insansa ni nseko nu muntu wensi wino aluvwa ukuti navyalila Abulaamu umwana alaseka pamwi nani.”

⁷ Nupya avwanga ati, “Aweni welenginye ukuti ne Sala ningavyalila Abulaamu umwana? Mwalola, natimuvyalila umwana umonsi mu ukote.”

⁸ Mwana akula yamulumula, nga pa wanda uno yamulumwile, Abulaamu acita cimulo icikulu cuze.

Abulaamu wazinga Haga na Isumeli

⁹ Limwi Sala waweni kuno Isaki yakumupumya kuli Isumeli wino Haga mwina Eguputo waviile kuli Abulaamu.

¹⁰ Lyene Sala avwanga kuli Abulaamu ati, “Zinga muzya wiyo nu mwana wakwe yapita. Mwana wa muzya atalinzile akwateko cipande nanti cimwi ca vyuma vyako vino umwana wane umonsi Isaki alapyana.”

¹¹ Pa kuvwa vivyo Abulaamu umwenzo umuwaya, asakamikwa cuze pano Isumeli nawe kwene wali umwana wakwe.

¹² Nga Leza anena Abulaamu ati, “Utasakamikwa pa mwana na pa muzya wako Haga. Cita consi cino Sala wakunena ukucita, pano muli Isaki amuno ulakwatila ana yano nakulaya.

¹³ Nu ku mwana wa muzya kwene ndapeela ana aingi kuti yakaye uluko lukulu. Nawe kwene umwana wako.”

¹⁴ Lino waca katondo Abulaamu apeela Haga ivyakulya nu lufinga luzile amanzi, amutwika nu kumupapika umwana, nga amuzinga. Alino Haga apita afuma akululumba mu Lwanga lwa Belisyeba.

¹⁵ Lino amanzi yasizile mu lufinga, apaapula umwana asya wamuteka mu cimpuza.

¹⁶ Nawe aya aikala katalamukila manye amamita ikumi, aivwanzya ati, “Ntangenalola kuno umwana wane akufwa.” Lyene lino acili atenzi papa, atandika ukulila.

¹⁷ Leza auvwa umwana kuno akulila, nga mungeli wakwe Leza avwanga kuli Haga ukufuma kwiyulu ati, “Icani icakucuzya, we Haga? Utuvwa intete! Leza watauvwa kulila kwa mwana.

¹⁸ Katuka pita katole umwana umumyalazye. Munoli ndacita luko lukulu ukupitila mu amu mupanda wakwe.”

¹⁹ Lyene Leza amuyula amanso, nga Haga alola icifula ca manzi. Caleka apita nga aya azuzya lufinga, nga aiza amwesya umwana.

²⁰ Leza wali nu mwana mu kukula kwakwe. Mwana wilya watenzi mu Lwanga lwa Palani, aya umulunzi mucenjele nupya uwamaka.

²¹ Nyina amulondela umwanaci wakutwala ukufuma ku Eguputo.

Ulayano pakasi kakwe Abulaamu na Abimeleki

²² Mu nsita ilya Abimeleki apita na Fikoli musika mukalamba wa vita vyakwe, aya kuli Abulaamu amunena ati, “Leza waya nawe muli vyonsi vino ukacita.

²³ Caleka laya nu mulapo pa manso yakwe Leza ukuti utalantumpika, nene nanti ana yane, nanti amu mupanda wane. Nemo indi uwakutailwa kunuli, caleka nawe kwene laya ukuti umayanga uwakutailwa kunondi nu ku mpanga yane kwene ino utenzimo wa mwinamasi.”

²⁴ Abulaamu aasuka ati, “Nalaya.”

²⁵ Lelo Abulaamu wailizyanyizye kuli Abimeleki pamulandu wa cifula cino aomvi yakwe Abimeleki yalanga yapoka.

²⁶ Abimeleki watile, “Ntamanyile wacita cico. Utatazile unene, nga lii, lili iila lyakutandika kuvwa pamulandu uu.”

²⁷ Lyene Abulaamu apeela Abimeleki imfwele ni ng'ombe, nga ya oili yazumilizyanya yacita cipangano.

²⁸ Abulaamu apaatula twana utwa mfwele cinimbali pa mfwele zyakwe.

²⁹ Abimeleki auzya Abulaamu ati, “Uzye pacani wacita cico?”

³⁰ Nawe aasuka ati, “Ufwile ukupokelela imfwele zi cinimbali kulanga ukuzumila vino anene nimvile cifula ci.”

³¹ Caleka cifula yacitemela izina yati Belisyeba, pamulandu wakuti apano antu oili yacitile umulapo.

³² Pacisila ca kucita cipangano cakuzumilizyanya cino yacisile pa Belisyeba, Abimeleki na Fikoli, musika mukulu wa vita vyakwe, yapita yaswilila ku Filisti.

³³ Nga Abulaamu alema umuti wa tamalisiki pa Belisyeba, nu kupepa Yawe Leza, wape nape.

³⁴ Abulaamu aikala mu mpanga ya Filisti pa nsita ntali.