Utandiko 20 - Amazwi Yakwe Leza 2013

Abulaamu na Abimeleki

¹ Abulaamu wafumile ku Mamule aya ku mpanga ya Negebu ukuya ikala pakasi ka Kadesyi na Syuli. Lelo watazile atulila mu Gelali.

² Mu Gelali alanda ati, “Sala akaci wane.” Caleka Abimeleki umwene waku Gelali alonda kutwala Sala.

³ Uwanda ulya usiku, Leza aloleka kuli Abimeleki mu ciloto nga amunena ati, “Umafwa pano Sala umuci wa mwine.”

⁴ Lelo walanga Abimeleki atali amanye Sala, acino avwanga ati, “Mwene, nene wakaele! Uzye ukasi ungonone kumwi nu mutundu wane?

⁵ Abulaamu umwisikulu uwanenyile ukuti Sala akaci wakwe, na Sala kwene wanena cili cimwi. Namanyile ukuti usi mulandu kumutwala, nupya ntaponzile.”

⁶ Mu ciloto kwene Leza amunena ati, “Endi, nimanya ukuti wamanyile ukuti usi mulandu acino nakucinkula kuti utiifya kunondi pa kwingila ng'anda na Sala.

⁷ Acino ndakai swilizya mama wiyo kuli iya. Iya a kasema amakupepela kuti utafwa. Lelo ndi utaswilizye mama wi kuli iya nakusoka ukuti umafwa, wewe na antu yako onsi.”

⁸ Uca katondo Abimeleki atuma akuya ama aomvi yakwe yonsi akwisano ayanena vino Leza amunenyile mu ciloto. Aomvi yuvwa intete.

⁹ Lyene Abimeleki aama Abulaamu amuuzya ati, “Uzye icani cino wacitila ci kunotuli? Ukuponga kuno natimponga ukwa musango cii kwakuti ulete ukuvunukwa panondi napa wene wane? Wancitile cino utalinzile ukucita.

¹⁰ Uzye pacani cino wacitila cii?”

¹¹ Abulaamu aasuka ati, “Mu mano yane natiile kuno kutangaya umuntu akaopa Leza, nga nu kuti yangankoma yatole nu muci wane.

¹² Nga nu mucumi Sala akaci wane nupya tuvilwe tata wenga, lelo tupusine sile muli yamayo. Awino natwala.

¹³ Caleka lino Leza wanenyile ukufuma ku akazi kane ukuya mu masi, nanenyile Sala nati, ‘Pakulanga kuyela kunondi ufwile walanda konsi kuno twaya ukuti nene kalume wako.’ ”

¹⁴ Lyene Abimeleki aswilizya Sala kuli Abulaamu, apeela na Abulaamu imfwele, ing'ombe na azya.

¹⁵ Amunena ati, “Mpanga yonsi iyakwane. Ungikala konsi kuno ukasi.”

¹⁶ Nupya anena Sala ati, “Napeela kalume wako impiya zyakwe siluva izimbi lyonga kuti ciye cimanyililo kuli yano muli nayo ukuti wewe wakaele. Nu muntu wensi alamanya ukuti usi nu mulandu.”

¹⁷ Lyene Abulaamu wapepile Abimeleki na Yawe amupozya, nga apozya nu muci na azya yakwe akazyana pakuti lyene yakwata ana.

¹⁸ Pano walanga Yawe wanyepa ukwasi mu anaci ali mwi sano lyakwe Abimeleki pamulandu wakwe Sala umuci wakwe Abulaamu.