Utandiko 2 - Amazwi Yakwe Leza 2013

¹ Avino insi ni yulu na vyonsi vyasililikile ukuumbwa.

² Pa wanda uwalenga cinimbali, walanga Leza watamala umulimo wakwe onsi wa kuumba, nga apuuza.

³ Nga Leza apolelela uwanda uwalenga cinimbali, aupaatula kuti uye uiyele. Pano pa wanda uu walanga watamala umulimo wakwe onsi wa kuumba, nga apuuza.

⁴ Vii avino iyulu ni nsi vyaumvilwe. Lino Yawe Leza waumvile insi ni yulu na vyonsi vyayamo,

Mu calo ca Edeni

⁵ patali cimelwa nanti cimwi pansi, pano walanga Leza atatala waponya imvula pano pansi. Nga kutali umuntu nanti umwi wa kulima musili.

⁶ Lelo munyezi wakatukanga ukufuma pansi nu kutonsya musili.

⁷ Lyene Yawe Leza atoola ivu ukufuma ku musili nga apanga umuntu. Alino aputa umupu ukapeela umi mu mpuno yakwe, nga umuntu aya nu umi.

⁸ Lyene Yawe Leza apanza icalo ca Edeni lwaku ufumondaka, nga aikamo umuntu wino wapanzile.

⁹ Alino Yawe Leza alenga kuti musili umezye imiti iyembe ya misango yonsi nu kuti yaseeka iviseekwa visuma. Pa kasi ka calo pali umuti ukapeela umi nu muti ukapeela amano akumanya visuma ni viipe.

¹⁰ Uluzi lutandika kukonkoloka mu Edeni, lukontelela vyamu calo, nga ukufuma papa ilwankanikana mu nguzi zini.

¹¹ Izina lya luzi lwakwe conga a Pisyoni. Lwene luli luzi ulukakonkolokela mu mpanga yonsi ya Havila, muno mukazanwa zaabu.

¹² Zaabu wa kweneko umuswefiwe, nga kwaya vyamununko usuma visilolekaloleka nga na mawe ya onikisi.

¹³ Izina lya luzi lwakwe ciili a Giooni. Lwene luli luzi ulukakonkolokela mu mpanga yonsi ya Kusyi.

¹⁴ Izina lya luzi lwakwe citatu a Tigilisi. Lwene luli luzi ulukakonkolokela ku ufumondaka wa musumba wa Asyuli, nga lwakwe cini a Yufulate.

¹⁵ Lyene Yawe Leza atoola umuntu amwika mu calo ca Edeni kuti acilima nu kucisunga.

¹⁶ Alino apeela ilamulo ku muntu ati, “Cumi kwene ungalya iviseekwa vyaku miti yonsi yamu calo,

¹⁷ lelo utakalye iviseekwa vyaku muti uno ukapeela amano akumanya visuma ni viipe. Pano uwanda kwene uno ulalyako, ulafwa.”

¹⁸ Lyene Yawe Leza avwanga ati, “Cisi cisuma kuti umuntu aikala wenga. Caleka namamuumbila alingine na aliwe kuti yaazwana.”

¹⁹ Acino Yawe Leza atoola ivu nu kupanga inyama zyonsi nga ni vyunyi vyonsi ivikapapuka ukufuma ku musili. Lyene avileta ku muntu kuti alole vino amavitemela mazina. Vii avino cila ciumbwa catemilwe izina lyaciko.

²⁰ Caleka umuntu atemela inyama zyonsi mazina nga ni vyunyi vyonsi ivikapapuka. Lelo pali vii vyonsi patali icalingine wakwe kazwa wa muntu.

²¹ Lyene Yawe Leza aleka umuntu kuti akasule utulo twamfwa, nga lino acikaswile Leza asisya lumbazo longa lwa monsi, asililapo nu munyefu pa ciposi.

²² Leza aumba umwanaci ukufuma ku lumbazo lwa monsi nga amuleta ku monsi.

²³ Lyene umonsi avwanga ati, “Ndakai, wii ifupa ukufuma ku mafupa yane nu munyefu ukufuma ku munyefu wane. Amaamwangwa ‘umwanaci,’ pano wapangwa ukufuma ku monsi.”

²⁴ Pamulandu ukwene umonsi akasya isi na nyina nu kuilundanya ku muci wakwe, nga iyaya umwili onga.

²⁵ Na onsi oili, umonsi nu muci wakwe yali tupu, lelo yatali ni nsonyi.