Utandiko 16 - Amazwi Yakwe Leza 2013

Haga wavyala Isumeli

¹ Lyene Salai, umuci wakwe Abulamu atavyalile iya umwana nanti wenga. Lelo wakweti muzya mukazyana mwina Eguputo izina lyakwe a Haga.

² Salai anena Abulamu ati, “Lola nemo Yawe wancita ukuya ng'umba. Uzye utange utwale Haga pakuti limwi angamvyalila ana?” Abulamu azumila vino Salai wamunena.

³ Caleka Salai apeela Haga kuli Abulamu kuti aye umuci wakwe. (Cii, cacitike pacisila lino Abulamu wikala mu Kenani pa myaka ikumi).

⁴ Nga Abulamu amanya Haga, nawe asenda indilwa. Lino Haga walola ukuti wasenda indilwa atandika ukuya ni vilumba kuli Salai nu kumusoweka.

⁵ Salai avwanzya Abulamu ati, “Wewe ukulenga kuti Haga angansoweka nu kuntumfya. Nemwisikulu nakupiile muzya wi. Lelo lino wene wamanya ukuti watasenda indilwa wataya ni misuli kunondi. Si Yawe ka aliwe apingule umulandu witu, wapali wewe nani!”

⁶ Lyene Abulamu azumila ati, “Cisuma, Haga acili muzya wako nupya acili mu makasa yako. Cita consi cino ukulonda kunoli.” Lyene Salai atandika kuzunya Haga cakuti asuka apuuka.

⁷ Mungeli wakwe Yawe akomanya Haga mu lwanga pa kafukoka ka manzi mu museo uwaya ku Syuli.

⁸ Mungeli avwanzya Haga ati, “Haga we muzya wakwe Salai uzye wafuma kwi nupya ukuya kwi?” Haga nawe aasuka ati, “Napuuka mangu Salai.”

⁹ Mungeli wakwe Yawe ati, “Swilila kuli Salai nu kuya ikala mwi sunde lyakwe wa muzya.”

¹⁰ Mungeli wilya nupya avwanga ati, “Ndasandulula amu mupanda wako, nga yalavula cakuti kutangaya umwi angayapenda.”

¹¹ Nupya mungeli wilya amunena ati, “Watusenda indilwa nga ulavyala umwana umonsi, ulamutemela izina Isumeli, pamulandu wakuti Yawe watauvwa ukulilizika kwako.

¹² Lola umwana wako alaikala wakwe colwa. Alakatukila umuntu ali wensi, na antu yonsi yalamukatukila. Wene atalauvwana na kazi kakwe.”

¹³ Haga aelenganya ati, “Uzye umucumi natindola Leza wino akandola?” Caleka atemela Yawe, wino wavwanzile kunoli ati, “Wewe Leza akalola.”

¹⁴ Acino antu yakaama icifula icaya pakasi ka Kadesyi na Beledi yati, “Beeli Laai Loi.”

¹⁵ Lyene Haga avyalila Abulamu umwana umonsi, na Abulamu amutemela izina ati Isumeli.

¹⁶ Pa nsita ilya lino Haga wamuvyalile Isumeli Abulaamu wali ni myaka amakumi cinani na mutanda.