Utandiko 15 - Amazwi Yakwe Leza 2013

Upangano wakwe Leza na Abulamu

¹ Pacisila ca vintu vii Yawe aloleka kuli Abulamu mu cilolwa, nga amunena ati, “Utuvwa intete, Abulamu, kunuli indi wa cisyangu cakukucinga. Ndakupeela uwila ukulu cuze.”

² Lelo Abulamu ati, “Endi we Yawe Simwandalali, uzye icani cino ndatumbula mu wila uwo, pano ntakwata umwana? Mpyanyi ino nkweti sile a Elieza waku Damasiko.

³ Utampeela ana, nga wenga uwamu azya yane aalapyana vyuma vyane.”

⁴ Nga Yawe nupya amunena ati, “Elieza, muzya wako atalapyana vyuma vyako, lelo umwana wako umonsi, uwa munuli alaya mpyanyi yako.”

⁵ Alino Yawe amufumya panzi, nga amunena ati, “Lingamila umwiyulu nga upende intanda, ndi ungazipenda. Vii avino ana yako yalavula wa ntanda.”

⁶ Abulamu ataila Yawe, nga pamulandu wa utailo wakwe Yawe azangila munoli amuzumila ukuya mololoke.

⁷ Lyene Yawe anena Abulamu ati, “Nene indi Yawe wino wakufumizye ku Uli mu mpanga ya ina Kalideya, kuti nkupele impanga ii iye iyakwako.”

⁸ Lelo Abulamu auzya Yawe ati, “Yawe Simwandalali, uzye ningamanya uli ukuti impanga ii ilaya iyakwane?”

⁹ Nawe amwaasuka ati, “Ndetele zyakaci ing'ombe ni mbuzi na suuku, cila nyama iye iya myaka itatu nga na kaondo ka nkunda ni cipele.”

¹⁰ Alino Abulamu atwalila Yawe inyama zii, aziputula pakasi nga atantika vimpilinsya mu milongo iili, cila cimpilinsya ulunga ni cuze. Ivyunyi vyene ataviputwile.

¹¹ Lyene lino makozi yiiza ku kuwa pa nyama, Abulamu azila.

¹² Lino ilanzi lyatemba, Abulamu akasula cuze, nga, ku tulo ntete zyangofyo zimulema cuze.

¹³ Lyene Yawe amunena ati, “Cumi manya vino amu mupanda wako yalaya alowezi mu mpanga yacilendo kuno yalaya yakaye azya nu kucula pa myaka imyanda ini.

¹⁴ Lelo nani ndavunuka umutundu ulayacuzya, na lino yalafuma mu mpanga ilya yalasenda vyuma vingi.

¹⁵ Lelo wemo ulikala mutende kufika lino ulakota cuze, lino ulafwa nu kuzikwa pacisila cakwikala imyaka ingi.

¹⁶ Palapita mikulo ini lino amu mupanda wako yalaweluluka kuno mpanga, pano lyene ukwifya kwa ina Amoli ala kwafika pa kuyavunuka.”

¹⁷ Lino ilanzi lyawa na kakuku katola, mu kupumikizya kuloleka icinga icikusuka umoto ni cisonsololwa cikwaka, vii vyoili ala vili pakasi ka vimpilinsya vya nyama zizi.

¹⁸ Pa wanda ulya Yawe acita upangano na Abulamu, avwanga ati, “Nakulaya ukuti namapeela impanga ii yonsi ku amu mupanda wako, ukufuma ku Luzi lwa Eguputo kufika nu ku luzi lukulu lwa Yufulate,

¹⁹ impanga ya ina Kenite, ya ina Kenizi, ya ina Kedimoni,

²⁰ ya ina Hiti, ya ina Pelizi, ya ina Lefaimu,

²¹ ya ina Amoli, ya ina Kenani, ya ina Giligasi, ni ya ina Yebusi.”