Utandiko 14 - Amazwi Yakwe Leza 2013

Abulamu watuula Loti

¹ Mu manda yalya Amulafeli umwene waku Syinala, Alioki umwene wa Elasali, Kedolaomeli umwene wa Elamu na Tidali umwene wa Goimu

² yaile ku kulwisya yamwene yasano. Yamwene yaa yali a Bela uwamu Sodoma, Bilasya uwamu Gomola, Sinabu uwamu Adima, Syemebali uwamu Zeboimu nu mwene uwamu Belali (nanti Zoali).

³ Yamwene yaa yasano yuvwana kuminkanya ivita vyao mu cifoloma ca Sidimi (Ndakai cikaamwa ukuti Yemba wa Musilya).

⁴ Yamwene yaa yatesilwe nu mwene Kedolaomeli pa myaka ikumi na iili, lelo mwaka uwalenga ikumi na itatu yamukatukila.

⁵ Mu mwaka uwalenga ikumi na ini Kedolaomeli ni vita vyakwe na yamwene yano yuvwananga nawe, yumana akapi yalwisya yacimvya aina Lefaimu mu Asyitaloti Kalinaimu, na Zuzimu mu Hamu, Emimu mu Syave Kilyataimu,

⁶ na ina Holi mu myamba ya Seili ukufika nu ku Eli Palani, ku mpela ya lwanga.

⁷ Lyene iyasenuka iza ku Kadesyi (kuno yamanga yati Enimisipati, kuli kuti kafukoka ka uputuzi) yacimvya impanga ilya yonsi ya ina Amaleke ni ya ina Amoli atenzi mu Hazazoni Tamala.

⁸ Lyene yamwene amu Sodoma, Gomola, Adima, Zeboimu, na Bela nayo yuminkanya vita vyao mu cifoloma ca Sidimi ku kulwisya yamwene yao.

⁹ Kedolaomeli umwene waku Elamu, Tidali umwene waku Goimu, Amulafeli umwene waku Syinala, nga na Alioki umwene waku Elasali, yamwene yani yalwisya yamwene yasano.

¹⁰ Mu cifoloma ca Sidimi mwali viwina vya manenekela vivule, nga lino aina Sodoma na ina Gomola yatiyutuke ku ulwi, yaponelamo. Lelo auze apunsumwike yutukile ku myamba.

¹¹ Caleka yamwene yani yasampa vyuma vyamu Sodoma nu mu Gomola, vyonsi pamwi ni vyakulya, nga yapita.

¹² Yasenda Loti umwana wa mwina wakwe Abulamu uwikalanga mu Sodoma pamwi na vyonsi vino wakweti.

¹³ Lelo umuntu umwi uwapunsumwike aya anena Abulamu Muyebulai. Abulamu wikalanga pipi nu ku miti yamuzilo yakwe Mamule mwina Amoli. Mamule na Esyikoli nga na Anele yali aina, apangine kulemana na Abulamu ku vya nkondo.

¹⁴ Lino Abulamu uvwa ukuti yatiyasenda Loti umwana wa mwina ku uzya, akonganika akazi ni vita vyakwe, vyonsi pamwi 318 yalondela yamwene yalya mpaka kufika ku Dani.

¹⁵ Lino yafika Abulamu apaatula vita vyakwe mu maumba maumba, nga yazanza anisi insita ya usiku, yayacimvya. Anisi yalya yutuka, nayo yayazinganya kufika ku Hoba, ku katutu kakwe Damasiko.

¹⁶ Lyene Abulamu apokolola vyonsi vino yasenzile, awezya na Loti umwana wa mwina, ni vyuma vyakwe, pamwi na anaci nga na antu yauze asenzilwe ku uzya.

Mekisedeki wapolelela Abulamu

¹⁷ Lino Abulamu akuwela ku kucimvya umwene Kedolaomeli na yamwene yano ali nawe, umwene uwamu Sodoma waile ukuya mukomanya mu cifoloma ca Syave (kuli kuti cifoloma ca mwene).

¹⁸ Na Mekisedeki umwene waku Salemu, nupya simapepo wakwe Leza uwapapelapela nawe aletela Abulamu umukate na waini.

¹⁹ Alino apolelela Abulamu, avwanga ati, “Leza wapapelapela uwaumvile insi ni yulu, apolelele Abulamu!

²⁰ Leza wapapelapela uwakupezile ukucimvya pa anisi yako alumbanyiwe.” Lyene Abulamu apeela Mekisedeki icikumi ca muli vyonsi vino wapokolwile.

²¹ Mwene waku Sodoma anena Abulamu ati, “Vyonsi vino wapokolwile sunga, lelo mbwezezye antu yane yonsi.”

²² Abulamu aasuka ati, “Nkulapa pa manso yakwe Yawe, Leza wapapelapela kaumba wa nsi ni yulu,

²³ ukuti ntakusunga icintu nanti conga cakwako, nanti usavu nanti mukowa wa ndyatu. Lyene utalati, ‘Nene nalenzile Abulamu ukuya umukama.’

²⁴ Kusi nanti cimwi cino namatoola, manye nazumila vino antu yane yatiyaomvya na vino yayalya, nga nu wankanyo wakwe yano twali nayo. Lekini Anele, Esyikoli na Mamule yatolepo wankanyo wao.”