Utandiko 13 - Amazwi Yakwe Leza 2013

Abulamu yapalukana na Loti

¹ Caleka Abulamu nu muci pamwi na Loti na vyonsi vino yakweti, yafuma mu Eguputo yalungama ku katutu ku Lwanga lwa Negebu.

² Abulamu ala umukama cuze, wakweti imfwele, imbuzi, ni ng'ombe alino na siluva na zaabu.

³ Lyene Abulamu akuka insakwe ni nsakwe, apita ukufuma ku Negebu ukuya lwaku Betele, cifulo cino waliko pa kutandika, pakasi kakwe Betele na Ai.

⁴ Aswilila kuno inkolelo wakuuzile itaalu na kavuwa. Na kukwa akuno Abulamu aama Yawe mwi zina.

⁵ Loti, wino wapitanga monsi pamwi na Abulamu, nawe kwene wakweti imfwele, imbuzi ni ng'ombe pamwi na antu yano yali nawe.

⁶ Lelo impanga iyakucemela mwenemo iviteekwa yacefile, pamulandu wakuti iviteekwa vyao vyasandulwike cakuti iyaposiwa ukwikala pamwi.

⁷ Caleka yakacema yakwe Loti na yakwe Abulamu yalemanila. Pa nsita ilya aina Kenani na ina Pelizi yalanga ala yacili ikala mu mpanga ilya.

⁸ Lyene Abulamu anena Loti ati, “Sweswe ali yamwi, antu yako na antu yane yatalinzile kulemanila.

⁹ Lola! Mpanga ikulu, leka tupalukane. Nakupapata solola cifulo consi cino ukulonda. Ndi waya kwilunji namaya kwimani, ndi waya kwimani namaya kwilunji.”

¹⁰ Caleka Loti acelecensya monsi azana ukuti cifoloma consi ca Luzi lwa Yodani, na konsi ukufuma ku Zoali kwali amanzi aingi wamu calo ca Edeni cino Yawe wapanzile, nanti wamu mpanga ya Eguputo (cii cali lino Yawe atali aonone imisumba ya Sodoma na Gomola).

¹¹ Caleka Loti asolola kutoola cifoloma consi ca Luzi lwa Yodani, nga atenuka aya ku ufumondaka. Vii Avino antu ya oili yapalukine.

¹² Abulamu aikala mu mpanga ya Kenani. Lelo Loti nawe aikala lwaku misumba yamu cifoloma, aimika itaalu lyakwe pipi na Sodoma,

¹³ umusumba muno antu yali ankota, aifyanga Yawe wakwe cimwi.

Abulamu na Salai yasamila ku Hebuloni

¹⁴ Lino Abulamu yapalukana na Loti, Yawe anena Abulamu ati, “Celecensya manso yako ukufuma pano uli, lolekesya ku katutu nu ku kaeya, ku ufumondaka nu ku uwondaka.

¹⁵ Mpanga yonsi ino walola ndapeela kunuli nu ku amu mupanda wako, nga ilaya iyakwako amanda pe.

¹⁶ Ndasandulula amu mupanda wako, cakuti umuntu nga angapenda lusenga lwa pansi, ale lyene angayapenda.

¹⁷ Lyene katuka ukendezye impanga ilya yonsi, pano ndakupeela yonsi kwene.”

¹⁸ Caleka Abulamu asama, aya aikala pipi ni miti yamuzilo ya Mamule ku Hebuloni, kuno wakuulile Yawe kavuwa.