Utandiko 12 - Amazwi Yakwe Leza 2013

Leza waama Abulamu

¹ Lyene Yawe anena Abulamu ati, “Fuma mu mpanga yakumwinu, usye akazi kako, na amu ng'anda yakwe so, upite uye ku mpanga ino namakulanga.

² Ndakupeela ana avule, nga amu mupanda wako yalavula yaye umutundu ukalamba cuze. Indi nu kukupolelela muli vyonsi nu kulenga kuti ulumbuke, na kuti nce mpolelele antu yauze mu musango uli onga.

³ Ndapolelela yao alakupolelela. Lelo ndatipwila yao alakutipwila. Munuli ndapolelela inko zyonsi.”

⁴ Lino Abulamu waya, ni myaka amakumi cinimbali na isano, atenuka ukufuma mu Halani ndi vino Yawe wamupeezile ilamulo. Na Loti amulondela.

⁵ Abulamu asenda Salai umuci wakwe, na Loti umwana wa mwina, nga yasenda ni vyuma, na azya, na vyonsi vino alanga walonka mu Halani. Alino iyatenuka iyaya ku mpanga ya Kenani. Lino yafika ku Kenani,

⁶ Abulamu aendezya mpanga asuka afika nu ku Syekemu ku cifulo ca muti wamuzilo waku Mole. Pa nsita ilya ala aina Kenani yacili ikala mu mpanga ilya.

⁷ Lyene Yawe aloleka kuli Abulamu amunena ati, “Ii ili mpanga ino ndapeela ku amu mupanda wako.” Caleka Abulamu akuulako na kavuwa papa kwene kakwe Yawe, uwalolike kunoli.

⁸ Nga Abulamu afumapo alungama ku kaeya ka Betele ku mpanga ya myamba, aya aimika itaalu pakasi, Betele ku uwondaka na Ai nawe ku ufumondaka. Kuku akuno akuulila Yawe kavuwa nga amupepa.

⁹ Lyene Abulamu atenuka nga atwalilila kwendezya impanga aya ku kaeya afika ku Lwanga lwa Negebu.

Abulamu mu Eguputo

¹⁰ Mwali cipowe mu mpanga ya Kenani. Lino icipowe cakoma Abulamu atentemukila ku Eguputo ku kwikalako ukuutuka inzala.

¹¹ Lino akuya, afika pipi na mupaka kwingila mu Eguputo, nga anena umuci ati, “Salai namanya ukuti wewe mama umuyembe.

¹² Lino aina Eguputo yalakulola yalati, ‘Wii ali muci.’ Lyene yalankoma, lelo wemo usyale nayo ulumi.

¹³ Acino ukayanena ukuti wewe kaci wane, lyene pakulonda wewe yalansya mumi nu kunsunga ningo.”

¹⁴ Lino Abulamu na asyala yacila umupaka ingila mu Eguputo, aina Eguputo yalola ukuti Salai umuyembe cuze.

¹⁵ Lino aomvi yakwe Falao yalola Salai, iyaya yalumbanya usuma wakwe ku mwene Falao. Caleka yamusenda aya umusano.

¹⁶ Pamulandu wakwe Salai, Falao wasunzile Abulamu ningo amupa imfwele, imbuzi, ing'ombe, yapunda, azya ni ngamila.

¹⁷ Lelo Yawe aponya impungo ya ndwala pali Falao na amwi sano lyakwe, pamulandu wakuti Falao watozile Salai ukuya musano wakwe.

¹⁸ Lyene Falao atuma akuya ama Abulamu, nga amuuzya ati, “Uzye pacani cino wacita ci kunondi? Uzye pacani cino utanenyile ukuti wene umuci wako?

¹⁹ Uzye pacani cino watile akaci wako, uleka imutola kuti aye umuci wane? Umuci wako aewi, musende mwapita!”

²⁰ Alino Falao apeela ilamulo ku antu yakwe kuti yazinge Abulamu mu mpanga ya Eguputo, nga nayo yamufumya apita pamwi nu muci wakwe na vyonsi vino wali navyo.