Utandiko 11 - Amazwi Yakwe Leza 2013

Lupungu lwa Babeli

¹ Mpiti antu amu nsi yavwanganga ululimi luli longa nu kuomvya amazwi ali yamwi.

² Mu kululumba kwao antu yasuka yafika ku manyika aku ufumondaka mu mpanga ya Syinala akuno yikala.

³ Nga yavwanzyanya yati, “Izini tutame injelwa toce zikome.” Caleka yakweti injelwa zyaku kuulila, na manenekela aku kuulila, yataomvizye amawe nanti ndaka.

⁴ Lyene yati, “Twikuulile umusumba nga nu lupungu lwakufika kwiyulu. Ndi twacita vii, tulalumbuka nupya tutalasalangana monsi mu nsi.”

⁵ Lyene Yawe aika ukufuma kwiyulu kwizalola umusumba nu lupungu luno yakukuula,

⁶ nga ati, “Antu yaa ali yamwi, nu lulimi luno yakuvwanga ululi longa, na uu uli utandiko wa vintu vino yali nu kucita. Citakusumba insita ala antu iyacita consi cino yangatemwa ukucita.

⁷ Leka tuye pansi tukavulunganye ululimi lwao kuti yatauvwana.”

⁸ Caleka Yawe ayasalanganya mu nsi yonsi, yata kukuula umusumba.

⁹ Acino umusumba ulya yautemile izina yati a Babeli, pano amuno Yawe wavulunginye ululimi lwa antu yonsi mu nsi. Ukufuma papo kwene antu yasalanga mu nsi yonsi.

Amu mupanda wakwe Syemu

¹⁰ Yaa ali amu mupanda wakwe Syemu. Pacisila cakwe mulamba papisile imyaka iili, nga lino Syemu waya ni myaka 100, umuci amuvyalila umwana umonsi, izina lyakwe a Alipakisadi.

¹¹ Pacisila cakuvyalwa kwakwe Alipakisadi, Syemu aikala imyaka nayuze 500. Wakweti ana nayauze aonsi na anaci.

¹² Lino Alipakisadi waya ni myaka 35, umuci amuvyalila umwana umonsi, izina lyakwe a Syela.

¹³ Pacisila cakuvyalwa kwakwe Syela, Alipakisadi aikala imyaka nayuze 403. Wakweti ana nayauze aonsi na anaci.

¹⁴ Lino Syela waya ni myaka 30, umuci amuvyalila umwana umonsi, izina lyakwe a Ebeli.

¹⁵ Pacisila cakuvyalwa kwakwe Ebeli, Syela aikala imyaka nayuze 403. Wakweti ana nayauze aonsi na anaci.

¹⁶ Lino Ebeli waya ni myaka 34, umuci amuvyalila umwana umonsi, izina lyakwe a Pelegi.

¹⁷ Pacisila cakuvyalwa kwakwe Pelegi, Ebeli aikala imyaka nayuze 430. Wakweti ana nayauze aonsi na anaci.

¹⁸ Lino Pelegi waya ni myaka 30, umuci amuvyalila umwana umonsi, izina lyakwe a Lewu.

¹⁹ Pacisila cakuvyalwa kwakwe Lewu, Pelegi aikala imyaka nayuze 209. Wakweti ana nayauze aonsi na anaci.

²⁰ Lino Lewu waya ni myaka 32, umuci amuvyalila umwana umonsi, izina lyakwe a Selugi.

²¹ Pacisila cakuvyalwa kwakwe Selugi, Lewu aikala imyaka nayuze 207. Wakweti ana nayauze aonsi na anaci.

²² Lino Selugi waya ni myaka 30, umuci amuvyalila umwana umonsi, izina lyakwe a Nawoli.

²³ Pacisila cakuvyalwa kwakwe Nawoli, Selugi aikala imyaka nayuze 200. Wakweti ana nayauze aonsi na anaci.

²⁴ Lino Nawoli waya ni myaka 29, umuci amuvyalila umwana umonsi, izina lyakwe a Tela.

²⁵ Pacisila cakuvyalwa kwakwe Tela, Nawoli aikala imyaka nayuze 119. Wakweti ana nayauze aonsi na anaci.

²⁶ Lino Tela waya ni myaka 70, umuci amuvyalila ana aonsi, amazina yao a Abulamu, Nawoli na Halani.

Amu mupanda wakwe Tela

²⁷ Yaa ali amu mupanda wakwe Tela. Tela wali a isi wakwe Abulamu, Nawoli na Halani. Halani wali a isi wakwe Loti.

²⁸ Halani wafwilile mu Uli, umusumba wakumwao muno yatenzi, mu mpanga ya Kalideya, ala isi acili umumi.

²⁹ Abulamu watwite Salai, nga Nawoli nawe watwite Milika umwana wakwe Halani, nga na Isika kwene wali umwana wakwe Halani.

³⁰ Lelo Salai wali ng'umba, atakweti nanti umwana.

³¹ Lyene Tela asenda Abulamu umwana wakwe umonsi na Loti umwizikulu wakwe nupya umwana wakwe Halani, na Salai umuci wakwe Abulamu, uwali a nyinavyala nga iyatenuka mu musumba wa Uli mu mpanga ya Kalideya, yapita ukuya ku mpanga ya Kenani. Lelo lino yafika ku Halani, akuno yikala.

³² Tela wafwilile ku Halani lino waya ni myaka imyanda iili na isano.