Utandiko 10 - Amazwi Yakwe Leza 2013

Amu mupanda wa ana yakwe Nowa

¹ Yaa ali amu mupanda wa ana yakwe Nowa, yano Syemu, Hamu na Yafeti yavile mu aci yao pacisila cakwe mulamba.

² Ana yakwe Yafeti aonsi a Gomeli, Magogi, Madai, Yavani, Tubali, Mesyeki na Tilasi.

³ Ana yakwe Gomeli aonsi a Asyikenazi, Lifati na Togalima.

⁴ Ana yakwe Yavani aonsi a Elisyaa, Tasyisyi, aina Kitimu na aina Dodanimu,

⁵ yali vili vikolwe vyakwe yano akaikala mu nkumba yakwe yemba nu mu vilila. Yaa, ali ana yakwe Yafeti mu mitundu ipusane ni mpanga zipusane, cila mutundu ula ukuvwanga ululimi lwauko.

⁶ Ana yakwe Hamu aonsi a Kusyi, Eguputo, Puti na Kenani.

⁷ Ana yakwe Kusyi aonsi a Seba, Havila, Sabita, Laama na Sabiteka. Ana yakwe Laama aonsi a Syeba na Dedani.

⁸ Kusyi wali isi wakwe Nimulodi. Nimulodi wizile aya impola ya monsi ino insi itatazile ilole ku vita.

⁹ Yawe amulenga ukuya mulunzi wa maka cuze mu nsi yonsi, apafuma nu muvwango wakuti, “Yawe akulenge uye umulunzi wa maka wakwe Nimulodi!”

¹⁰ Pa kutandika kwa wene wakwe Nimulodi wateesile imisumba ya Babeli, Eleki, na Akadi, na yonsi itatu yali mu mpanga yaku Syinala.

¹¹ Afuma ku mpanga ilya aya aikala ku Asilya, aya akuula imisumba ya Ninive, Leoboti Ili, Kala

¹² na Leseni, uwaya pakasi ka musumba wa Ninive nu musumba ukulu wa Kala.

¹³ Eguputo cili cikolwe ca ina Ludi, Anamu, Leaabu, Nafutu,

¹⁴ Patulusi, Kasilu, na Kulete (uwali cikolwe ca ina Filisti) na ina Kafitoli.

¹⁵ Kenani wali a isi wakwe Sidoni iyeli lyakwe, nga na Hiti,

¹⁶ nga na ina Yebusi, Amoli, Giligasi,

¹⁷ Hivi, Aliki, Sini,

¹⁸ Alivadi, Zemali, nga na ina Hamati. Pacisila uluko lwakwe Kenani lusalangana konsi,

¹⁹ cakuti umupaka wa ina Kenani wafisile ukufuma ku Sidoni ukuya ku Gelali nu ku Gaza kufika ku ufumondaka, ulunga na Sodoma na Gomola, Adima nu ku Zeboimu mpaka kufika na Lasya.

²⁰ Yaa ali amu mupanda wakwe Hamu, atenzi mu mpanga zipusane nu mu mitundu ipusane, na cila mutundu ula ukuvwanga ululimi lwauko,

²¹ Syemu wali a silenzi wakwe Yafeti, wali cikolwe ca ana yakwe Ebeli (kwafuma Ayebulai). Syemu nawe kwene waviile ana aonsi.

²² Ana yakwe Syemu aonsi a Elamu, Asyuli, Alipakisadi, Ludi nga na Alamu.

²³ Ana yakwe Alamu aonsi a Uzi, Hulu, Getele, nga na Mesyeki.

²⁴ Ana ya mwana wakwe Alipakisadi aonsi a Syela, na Syela wali a isi wakwe Ebeli.

²⁵ Ebeli wali a isi wa ana aonsi yaili. Wenga izina lyakwe a Pelegi, pano mu manda ya umi wakwe antu mu nsi yapalukine. Izina lya mwana wakwe muze a Yokotani.

²⁶ Yokotani wali a isi wakwe Alimodadi, Syelefu, Hazalamaveti, Yela,

²⁷ Hadolamu, Uzali, Dikila,

²⁸ Obali, Abimaele, Syeba,

²⁹ Ofili, Havila, na Yobabu. Yaa yonsi amu mupanda wakwe Yokotani.

³⁰ Mpanga muno yatenzi ukufuma ku Mesya ukuya ku Sefali mu ncende ya myamba yaku ufumondaka.

³¹ Yaa ali ana yakwe Syemu aonsi aikalanga mu mpanga zipusane, nu mu mitundu ipusane, na cila mutundu ula ukuvwanga ululimi lwauko.

³² Antu yaa yonsi amu mupanda wakwe Nowa kulingana cila mutundu wao, luko nu luko. Acino pacisila cakwe mulamba antu amu nko zyonsi zyamu nsi yafumile mu ana yakwe Nowa.