Umbwilo 9 - Amazwi Yakwe Leza 2013

¹ Lyene mungeli walenga yasano alizya ntandala yakwe. Nani ndola lutanda lwapona kufuma kwiyulu kuya pansi, yalupela mfungulo yakuyulila ciwina caula impela.

² Lutanda luyula ciwina caula impela, nga mufuma cunsi cikulu wa cunsi ca mwi lungu likulu. Nga ilanzi nu lwelele vifita fititi ku vyunsi vino vyafumanga mu ciwina caula impela.

³ Alino makanta aiiza pano pa nsi kufuma mu cunsi, nupya wapilwe maka ya kuluma ali yamwi na yano makalela yakwata.

⁴ Makanta yamunena kuti atonona isote nanti imiti nanti cimelwa cili consi. Lelo yamuzumilizya sile konona antu yano atakweti cimanyililo cakwe Leza pa mausyu yao.

⁵ Makanta atazumiliziwe kukoma antu yaa, suka sile kuyacuzya kulingana ni myezi isano. Ucuzi uu wakoline wa usungu wa kulumwa ni kalela.

⁶ Mu myezi iya isano antu yalalonda imfwa, lelo imfwa italaloleka. Yalalonda ukufwa, lelo imfwa ilutuka kufuma kunoyali.

⁷ Makanta walolike wa mfwalasi izyatiziiteyanya ukuya ku ulwi. Pa mitwe yaziko pali vimwi ivyalolike wa ngala zya wene zyakwe zaabu, nga ni vinso vyaziko viloleka wa vinso vya antu aonsi.

⁸ Inyele zyao zyalolike wa nyele zya anaci. Amino yao yalolike wa mino yakwe cisama.

⁹ Pa vifuwa vyao ponsi pali mamba alolike wa vicingo vya cela. Ukulila kwa mapa yao kwali wi zwi lya maceleta aingi akutintwa ni mfwalasi izikusimwila ku ulwi.

¹⁰ Makanta wii wakweti misinda ino yali wa misinda ya makalela, nupya misinda yakweti imboya. Na maka ya mboya akucuzya antu pa myezi isano, yali mu mboya kwene zii.

¹¹ Yene yakweti kateeka uwa kuyateeka, kateeka wii u mungeli wino akaangalila ciwina caula impela. Izina lyakwe mu Ciyebulai a Abadoni, nu mu Cigiliki izina lyakwe a Apolyoni, cikusenula, “Wino akaonona.”

¹² Lyene kalanda kakwe conga ikasila. Pacisila cakwe cii kuliza kalanda kakwe ciili na kakwe citatu.

¹³ Alino mungeli walenga mutanda alizya ntandala yakwe. Nga nuvwa izwi likufuma mu matungi yani a kavuwa kakwe zaabu kano kali nkolelo yakwe Leza.

¹⁴ Izwi livwanga ku mungeli uwali ni ntandala uwalenga mutanda liti, “Sapula angeli yani anyepwa pa luzi lukalamba Yufulate.”

¹⁵ Caleka angeli yasapulwa. Pano pali aawa kwene wilya, pa wanda ulya, mwezi nga nu mwaka ulya, Leza wayateyanyizizye kukoma ciputulwa conga mu viputulwa vitatu vya antu onsi.

¹⁶ Nuvwile mpendwa ya vita vyali pa mfwalasi, vyene vyali mazimbi myanda iili maila izimbi lyonga.

¹⁷ Mu cilolwa cino nakweti naweni imfwalasi pamwi na yao akwezilepo, yene yazwite vicingo vya vyela pa vifuwa vyao vyalolike viyenze wa moto, vifitulukile wa mfisya nupya wa mitulwatulwa. Mitwe ya mfwalasi izikoline wa mitwe yakwe yacisama, nu mu milomo yaziko mwafumanga umoto, icunsi, na maluti.

¹⁸ Ciputulwa conga mu viputulwa vitatu vya antu amu nsi cakomilwe ku vilumbelo vitatu. Ni vilumbelo vii, umoto, cunsi, nga na maluti vino vyafumanga mu milomo ya mfwalasi.

¹⁹ Pano maka ya mfwalasi yaya mu milomo yaziko nu mu misinda yaziko. Imisinda yzikao yakoline wa nzoka, nupya zyali ni mitwe ino zyacuzizyangako antu.

²⁰ Antu yonsi asyala yano atakomilwe ku vilumbelo vii, yatazenzwike ku milimo ya makasa yao. Yene yatatile kupepa mipasi yankota, nanti tuluwi twakwe zaabu, siluva, nanti mukuwa, nanti twa mawe, nanti twa vimuti tuno tutange tulole nanti kuvwa nanti kupita.

²¹ Nupya yene yatazenzwike ku utazi wa katwe, ku ulozi wao, ku ulenzyo nga nu ku wivi.