Umbwilo 7 - Amazwi Yakwe Leza 2013

¹ Pacisila cakwe vii ndola angeli yani yaimi pa ntunga zini zya nsi, ala yati yalema imiza ini. Yacisile vii kuti umuza nanti umwi utapunga pansi nanti pali yemba nanti pa cimuti cili consi.

² Alino ndola mungeli namuze kufuma ku ufumondaka ala alemile nsimbi yakwe Leza wa umi. Lyene apunda ni zwi likulu ku angeli yani yano Leza wapile maka akonona insi na yemba.

³ Mungeli avwanga ati, “Mutonona insi, yemba, nanti imiti, suka lino twamala kwikila aomvi yakwe Leza vimanyililo pa mausyu yao.”

⁴ Lyene nuvwile ukuti impendwa yakwe yao yano ikilwe cimanyililo cakwe Leza yali mazimbi mwanda onga na makumi yani na yani. Yene yafumile mu mitundu yonsi ya ina Izlaeli.

⁵ Aikilwe cimanyililo yali mazimbi ikumi na yaili amu mutundu wakwe Yuda, mazimbi ikumi na yaili amu mutundu wakwe Lubeni, mazimbi ikumi na yaili amu mutundu wakwe Gadi,

⁶ mazimbi ikumi na yaili amu mutundu wakwe Asha, mazimbi ikumi na yaili amu mutundu wakwe Nafutali, mazimbi ikumi na yaili amu mutundu wakwe Manase,

⁷ mazimbi ikumi na yaili amu mutundu wakwe Simeoni, mazimbi ikumi na yaili amu mutundu wakwe Levi, mazimbi ikumi na yaili amu mutundu wakwe Isakali,

⁸ mazimbi ikumi na yaili amu mutundu wakwe Zebuluni, mazimbi ikumi na yaili amu mutundu wakwe Yosefu, nga na mazimbi ikumi na yaili amu mutundu wakwe Benjamini.

Iumba likulu cuze kufuma ku nko zyonsi

⁹ Pacisila cakwe cii nceleka nga ndola iumba likulu cuze. Kutali nanti wenga uwange apende antu onsi. Antu yaa yafumile mu nko zyonsi, mu mitundu yonsi ya antu, mu misango yonsi ya antu nu mu ndimi zyonsi. Yene yaimi nkolelo ya cilimba ca wene na pa manso ya Mwana wa mfwele, ala yazwite mingila itiswe nupya yalemile makambalala mu minwe yao.

¹⁰ Lyene yapunda ni zwi likulu yati, “Ufyusi ukafuma kuli Leza witu, wino uwikala pa cilimba ca wene, nga nu ku Mwana wa mfwele!”

¹¹ Angeli yonsi iimilila kuzinguluka cilimba ca wene, nu kuzinguluka aikolo nga ni viumbwa vyaumi vini. Alino yafukama nu kukontamika ivinso vyao nkolelo ya cilimba ca wene, yapepa Leza yati,

¹² “Ameni! Kulumbanyiziwa, lulumbi, mano, kutaizya, mucinzi, maka nu ulamba vyonsi ivyakwe Leza witu manda pe! Ameni!”

¹³ Wenga uwamu ikolo anguzya ati, “Uzye antu yaa azwite mingila itiswe aaweni, nupya aukwi kuno yafuma?”

¹⁴ Nani mwasuka inti, “Musambazi, wewe umanyile.” Nawe anena ati, “Yaa ali antu yano aposya mu macuzi akulu cuze. Yene yafula mingila yao nu kuiswefya mu wazi wa Mwana wa mfwele.

¹⁵ Uli mulandu uno yati iimilila nkolelo ya cilimba ca wene cakwe Leza nu kumutumikila musanya nu usiku mu Ng'anda ikulu yakwe Leza. Wino atenzi pa cilimba ca wene alayacingilila pa kuya nao.

¹⁶ Yene yatalatala yuvwe inzala nanti lusala nupya. Ilanzi nanti cikaililwa cili consi citalatala ciyoce,

¹⁷ pano Mwana wa mfwele, wino ali pakasi ka cilimba ca wene alaya ali kacema wao. Wene alayatungulula ku tufukoka twa manzi yano akapeela umi. Leza nawe alayakumbula minsozi yonsi.”