Umbwilo 6 - Amazwi Yakwe Leza 2013

¹ Nupya ndola Mwana wa mfwele akulematula cimanyililo cakwe conga pa vimanyililo cinimbali, nga nuvwa ciumbwa conga mu viumbwa cinimbali civwanga ni zwi likulu likoline wa kupangalansya kwa mvula citi, “Iza!”

² Lyene ndola imfwalasi itiswe. Wino uwakwezilepo walemile ulapwa, nupya yamupile ingala ya wene. Wene wapisile wakwe kacimvya kuti akacimvye.

³ Lyene Mwana wa mfwele alematula cimanyililo cakwe ciili, nga nuvwa ciumbwa caumi cakwe cili citi, “Iza!”

⁴ Alino kwiza imfwalasi yuze iyenzu. Wino uwakwezilepo wapilwe amaka akuleta ulwi mu nsi, pakuti antu yakomane. Wene wapilwe lupanga lukulu.

⁵ Alino Mwana wa mfwele alematula cimanyililo cakwe citatu, nga nuvwa ciumbwa caumi cakwe citatu citi, “Iza!” Lyene ndola imfwalasi itifi. Wino uwakwezilepo walemile cipimilo mwi kasa lyakwe.

⁶ Alino nuvwa cimwi kwati izwi ala likufuma mu viumbwa vyaumi vini, liti, “Cipimo conga ca ngano cakulingana na malipilo ya muntu a wanda onga, nga ni vipimo vitatu vya malezi vyakulingana na malipilo ya muntu a wanda onga. Lelo mutonona miolivi nanti calo ca matingi!”

⁷ Lyene Mwana wa mfwele alematula cimanyililo calenga vini, nga nuvwa ciumbwa caumi calenga vini citi, “Iza!”

⁸ Lyene ndola imfwalasi iswepuluke. Wino uwakwezilepo watemilwe izina lyakuti Imfwa, nga ni cifulo ca antu afwe camulondile pipi. Oili yapilwe maka pa ciputulwa ca mu viputulwa vini ivya nsi, kuti yakome antu mukuomvya inkondo, cipowe, ndwala, nga ni vilyanyi vya mpanga.

⁹ Lyene Mwana wa mfwele alematula cimanyililo calenga visano. Alino pisika lya kavuwa ndola mipasi yakwe yao akomilwe pamulandu wakuti yene yakosozile mazwi yakwe Leza na pamulandu wa umboni uno yapile. Yene yapunda ni zwi likulu yati,

¹⁰ “We Mwene witu, wewe wamuzilo nupya uwa cumi! Uzye ukufika lilaci lino ulapingula nu kuvunuka antu yano akaikala pano nsi, yano atukoma?”

¹¹ Alino cila wenga wapilwe mwingila utiswe, nupya yayanena kuti yapuze pa nsita inono nayuze, suka mpendwa ya aomvi na ina yao mu utailo ilingane, yao alakomwa wakwe aliyo.

¹² Nupya ndola Mwana wa mfwele akulematula cimanyililo calenga mutanda. Alino kuya cilundumusi ca maka cuze, nga ni lanzi lifita fititi wa nsalu yakwe kafifi. Nu mwezi uyenza cee wa wazi.

¹³ Ntanda nazyo zipona pano nsi wa masamvu aisi yano yakalukuta ku muti lino umuza ukome waupunganya.

¹⁴ Ni yulu nalyo lifumiwa wa kukupikwa kwa lupapulo, nga ni myamba pamwi ni vilila vyonsi vyafumiwe pa vifulo vyaviko.

¹⁵ Lyene yakateeka amu nsi, intunguluzi na yamusika akulu avita, akama na antu ya maka, nga na antu yauze, azya na antungwa yonsi yafisama mu macele nu mwisika lya milunda yamu myamba.

¹⁶ Alino yanena myamba ni milunda yati, “Tuponelini nu kutufisa ku manso yakwe wino uwikala pa cilimba ca wene nga nu ku ukali wa Mwana wa mfwele!

¹⁷ Pano wanda wa ukali wao wati wiza, uzye lyene aweni angimilila?”