Umbwilo 5 - Amazwi Yakwe Leza 2013

¹ Nupya naweni lupapulo mwi kasa lilunji lyakwe wino uwatenzi pa cilimba ca wene. Lwene lwakweti amalembo kulimvya imbali zyoili zyakwelo. Lwene lwalematikwe ni vimanyililo cinimbali.

² Alino ndola mungeli wa maka avwanga ni zwi likulu ati, “Aweni alinzile ukulematula vimanyililo nu kuyula lupapulo?”

³ Lelo kutali umwi mwiyulu nanti pano nsi nanti pansi ya nsi wino uwali na maka akuyula lupapulo nu kulola mukasi.

⁴ Nani ndila cuze pano kutalolike nanti wenga uwalinzile kuyula lupapulo nu kulola mukasi kakwelo.

⁵ Lyene wenga uwamu ikolo anena ati, “Utalila. Lola! Cisama uwamu mutundu wakwe Yuda, umukulu uwamu mupanda wakwe Davidi, wene watacimvya nupya angalematula vimanyililo cinimbali nu kuyula lupapulo.”

⁶ Lyene ndola Mwana wa mfwele aimi pakasi ka cilimba ca wene ala viumbwa vyaumi vini pamwi na ikolo vyati vimuzinguluka. Mwana wa mfwele walolike kwati iyamukoma. Wene wali ni mpembe cinimbali na manso cinimbali. Manso yaa, ali mipasi cinimbali yakwe Leza ino yatumwa mu nsi yonsi.

⁷ Mwana wa mfwele aya tola lupapulo kufuma mwi kasa lilunji lyakwe wino uwatenzi pa cilimba ca wene.

⁸ Lino akucita vii, viumbwa vyaumi vini pamwi na ikolo makumi yaili na yani yafukamila Mwana wa mfwele. Cila wenga wakweti zeze nga ni ngeso zyakwe zaabu izyazilemo vya mununko usuma nga navyo vili mapepo ya antu yakwe Leza.

⁹ Yene imvile lwimbo lupya yati, “Wemo wazipilwa kutoola lupapulo nu kulematula vimanyililo vyakwelo. Pano wemo wakomilwe, nupya mu mfwa yako amuno wakalile Leza antu kufuma mu mitundu, ni ndimi, ni nko, nga ni misango ya antu yonsi.

¹⁰ Wemo wayacita kuya yakateeka na yasimapepo akatumikila Leza witu, yene yalateeka pano nsi.”

¹¹ Alino ndola nupya, nga nuvwa mazwi ya angeli mazimbi ni mintapendwa! Yene yaimi iyalizizya cilimba ca wene, ni viumbwa vyaumi vini nga na ikolo.

¹² Nupya imvile lwimbo ni zwi likulu yati, “Mwana wa mfwele wino uwakomilwe wene wazipilwa ukupelwa maka, icuma, mano, ulamba, mucinzi, lulumbi nu kulumbanyiziwa!”

¹³ Alino nuvwa ciumbwa consi ca mwiyulu, pano pansi, pansi ya nsi, muli yemba ni vya uumbo vyonsi vikwimba viti, “Wino uwikala pa cilimba ca wene pamwi nu Mwana wa mfwele yene yalumbanyiziwe, yapelwe mucinzi, lulumbi nu ulamba manda pe!”

¹⁴ Lyene viumbwa vyaumi vini vyasuka viti, “Ameni!” Alino aikolo yafukama nu kupepa.