Umbwilo 21 - Amazwi Yakwe Leza 2013

¹ Nupya ndola iyulu lipya ni nsi ipya. Iyulu lyankolelo ni nsi yankolelo vyati vipita, na yemba nawe atakuloleka.

² Lyene ndola Musumba Wamuzilo, Yelusalemu mupya, ukwika kufuma mwiyulu kuli Leza. Wene wateyanyiziwe kwati a nawinga wino wayemviwa pa kukomanya iya wakwe.

³ Alino nuvwa izwi likulu likulanda kufuma ku cilimba ca wene liti, “Ndakai uwikalo wakwe Leza uli pamwi na antu! Wene amaikalanga nao nupya yene yalaya antu yakwe. Leza umwisikulu alaya nao nupya wene alaya ali Leza wao.

⁴ Wene alayakumbula minsozi yonsi. Kutalaya imfwa nupya. Kutalaya kulosya nanti kulila, nanti kuvwa kuwaika. Vintu vyampiti vyati vipita.”

⁵ Lyene wino atenzi pa cilimba ca wene avwanga ati, “Ndakai vintu vyonsi nkuvicita ivipya!” Alino anena ati, “Lemba vii, pano mazwi yaa acumi nupya yalinzile kutailwa.”

⁶ Lyene avwanga ati, “Cati cicitwa! Nene Alufa na Omega, kuli kuti uwakutandika nu wakusyalikizya. Wensi ali nu lusala ndamupeela nsambu ya kumwa uwila mu kafukoka ka manzi yano akapeela umi.

⁷ Wino wensi alacimvya nemo ndaya Leza wakwe nawe alaya umwana wane.

⁸ Lelo antete na yano asi nu utailo, na yakacita ya vintu vyawinyi, ni nkomi, yacizelele, alozi, na yakapepa ya tuluwi, na antu yonsi antumpu, wikalo wao a yemba wa moto muno maluti yakapya. Ii ili mfwa yakwe ciili.”

Yelusalemu mupya

⁹ Mungeli wenga uwamu angeli cinimbali yano yakweti ngeso cinimbali izyazilemo vilumbelo cinimbali vyakusyalikizya aiiza kunondi anena ati, “Iza kuno, nga nani namakulanga nawinga, muci wa Mwana wa Mfwele.”

¹⁰ Mupasi Wamuzilo antungulula, nga umungeli ansenda nu kuntwala papela ya mwamba utali cuze. Alino andanga Yelusalemu, Musumba Wamuzilo, ula ukwika kufuma kwiyulu kuli Leza. Wene wayengesanga nu lulumbi lwakwe Leza.

¹¹ Musumba wayengise wi we liyengese lyamutengo, wakwe Yaspele, uyengese mpe wakwe Kulustele.

¹² Wene wakweti ilinga likulu, litali cuze, nupya lyali wa lung'umba. Lyene lyakweti mpongolo ikumi na zili, nga na angeli ikumi na yaili angalilanga mpongolo. Pali cila mpongolo palemvilwe izina lya mutundu onga uwamu mitundu yamu Izlaeli ikumu na iili.

¹³ Ku mbali zyonsi kwali mpongolo zitatu zitatu. Ku ufumondaka zitatu, ku kaeya zitatu, ku katutu zitatu nu ku uwondaka nako zitatu.

¹⁴ Ilinga lya musumba lyakuuzilwe pa mufula uwa mawe ikumi na yaili, pano palemvilwe mazina ya atumwa ikumi na yaili a Mwana wa Mfwele.

¹⁵ Mungeli wino uwavwanzile kunondi wakweti nsonzo yakwe zaabu iyakupimila kweneko musumba ukulu, ni mpongolo zyaiko, pamwi ni linga lyauko.

¹⁶ Musumba ukulu wakweti vinkonci vini, nu kusalala kwakweo kwalingine nu utali wakweo. Alino mungeli apima musumba ukulu ni nsonzo yakwe iya kupimila, nu mu utali wali makilomita mazimbi yaili ni myanda ini (2,400). Mu utali nu wipi wakweo vyalingine nu mulungu kwene.

¹⁷ Mungeli apima ni linga kwene, nga umulungu wali mamita makumi mutanda, kulingana ni cipimilo ica sontwa cino waomvizye.

¹⁸ Ilinga lyauko lyapangilwe na yaspele, musumba wene wapanzilwe na zaabu muswepe nupya muyengese mpe wi galasi.

¹⁹ Mawe amufula wa musumba ukulu yayemviwe ni misango yonsi ya mawe amutengo. Iwe lya mufula lyankolelo lyali a yaspele, na lyakwe cili a safilo. Ilyalenga yatatu a agate, lyalenga yani a emalodi

²⁰ ni lyalenga yasano a Aniki. Lyalenga mutanda a kaneli, lyalenga cinimbali a kwoti, ni lyalenga cinani a belulo, lyalenga fundimbali a topazi, lyalenga ikumi a kakedoni, lyalenga ikumi na lyonga a tukoizi, ni lyalenga ikumi na yaili a ametusto.

²¹ Mpongolo ikumi na ziili ali mbela ikumi na ziili. Cila mpongolo yapanzilwe ni mbela yonga. Museo ukulu uwamu musumba wali uwakwe zaabu muswepe, muyengese wi galasi.

²² Lelo mu musumba ntawenimo Ng'anda ikulu yakwe Leza, pano Mwene Leza Wamaka yonsi nga nu Mwana wa Mfwele ali Ng'anda ikulu iyaya mwenemo.

²³ Kuwala kwi lanzi nu mwezi kusyalondekwa mu musumba ukulu, pano lulumbi lwakwe Leza lukayengesa mwenemo, nga nu Mwana wa Mfwele ali lampi lyauko.

²⁴ Antu a mitundu yonsi yamu nsi yalapita mu luswepo lwakweo, na yakateeka amu nsi yonsi yalaletamo ucindami wao.

²⁵ Mpongolo zya musumba ukulu zilaya iziyulike musanya onsi. Zitalatala ziyalwe, pano kuku kutaya usiku.

²⁶ Ukulu nu lulumbi nga ni vyuma vya nko zyonsi vilaletwa mu musumba ukulu.

²⁷ Lelo kusi cimwi cikowele cino cilingila mu musumba ukulu, nupya mutalingila umuntu wino akacita vya winyi, nanti akatumpoka. Suka sile yao yano mazina yao yalembwa mu lupapulo lwa Mwana wa Mfwele ulwa umi, ayano yalingilamo.