Umbwilo 19 - Amazwi Yakwe Leza 2013

¹ Pacisila cakwe vii nuvwile cimwi cino cuvwikike kwati ciunda ci umba likulu lya antu mwiyulu, yakuti, “Aleluya! Ufyusi, lulumbi, na maka ivyakwe Leza witu!

² Upinguzi wakwe uwa cumi nupya usi walufyengo! Wene watavunuka cizelele wino uwakowizye insi ku uzelele wakwe. Leza watamuvunuka pano wene wakoma aomvi yakwe.”

³ Nao yapunda nupya yati, “Aleluya! Cunsi cikufuma ku cimbilimbili ca moto uno ukoca musumba ukulu cikukwela papela manda pe!”

⁴ Aikolo makumi yaili na yani nga ni viumbwa vini vyaumi vifukama nu kupepa Leza wino uwatenzi pa cilimba ca wene. Yavwanga yati, “Ameni! Aleluya!”

Cimulo ca winga wa Mwana wa Mfwele

⁵ Alino ku cilimba ca wene kufuma izwi liti, “Lumbanyini Leza mwe aomvi yakwe mwensi pamwi na antu yakwe onsi, anono na akulu kwene, mwe muno mukamucindika!”

⁶ Lyene nuvwile izwi lino lyuvwikike kwati iumba likulu, nupya kwati kupooma kwa cipoma nu kupangalansya kukulu. Nuvwile yakuti, “Aleluya! Pano Mwene Leza witu uwa maka, ali Kateeka!

⁷ Lekini tuzange nu kuya ni nsansa. Lekini tulumbanye ukulu wakwe! Pano insita yatifika iya winga wa Mwana wa mfwele, na nawinga wataiteyanya.

⁸ Wene watapelwa nsalu iswepe nupya itiswe iyakuti azwale.” Nsalu itiswe ali vicitwa visuma vya antu yakwe Leza.

⁹ Alino mungeli anena ati, “Lemba uti, Alongo ayao aamwa ku cimulo ca winga wa Mwana wa mfwele.” Mungeli alundapo kulanda ati, “Yaa amazwi ya cumi yakwe Leza.”

¹⁰ Alino mfukama pipi ni ngazo zyakwe kuti imupepe, lelo wene anena ati, “Utacita cico! Nene muomvi muzo pamwi na auzo ataila, onsi yakambone ya cumi cino Yesu wasokolwile. Uwapepa Leza.” Pano cumi cino Yesu wasokolwile umupasi wa usemo.

Kulanda pali wino uwakwezile pa mfwalasi itiswe

¹¹ Nupya ndola iyulu lyalekuka, ni mfwalasi itiswe iloleka. Izina lyakwe wino uwakwezilepo yakati, “Uwakutailwa” nu “Wacumi.” Wene ataya na lufyengo mu upinguzi wakwe nanti mu ulwi uno akalwisya.

¹² Manso yakwe yakoline wa cimbilimbili ca moto, nupya wene wazwite ngala zingi zya wene ku mutwe. Wene wakweti zina lino lyalemvilwe panoli. Lelo kusi umwi uwalimanya suka umwisikulu.

¹³ Mwingila uno wazwite wakandine uwazi. Zina lyakwe yakati, “Izwi lyakwe Leza.”

¹⁴ Vita vya mwiyulu vyamulondile vila vikwezile pa mfwalasi zitiswe, nupya vyazwite nsalu ziswepe nupya zitiswe.

¹⁵ Lupanga lukali cuze lwafumile mu mulomo wakwe, luno wene alacimvizyako antu amu nko. Wene alayateeka ku nsonzo ya cela. Wene alafena matingi mu ciwina ca kufenelamo matingi a cipyu nu ukali wakwe Leza wa maka onsi.

¹⁶ Pa mwingila wakwe na pa lupamba lwakwe palemvilwe zina lino likati, “Kateeka wakwe yakateeka nu Mwene wakwe yamwene.”

¹⁷ Lyene ndola mungeli aimi pi lanzi. Wene apunda ni zwi likulu ku vyunyi vyonsi ivikapapuka papela mulwelele ati, “Izini mukolongane pamwi ku cimulo cikulu cakwe Leza.

¹⁸ Izini mulye minyefu yakwe yakateeka, yamusika akulu, na asilika, minyefu yamfwalasi pamwi na yao akakwelapo, ni minyefu ya antu onsi, azya na antungwa akulu na anono!”

¹⁹ Nupya ndola cilyanyi nga na yakateeka amu nsi. Yene pamwi ni vita vyao yakongana kuti yalwisye wino uwatakwela pa mfwalasi pamwi ni vita vyakwe.

²⁰ Cilyanyi casenzilwe ku ng'anda yaminyololo pamwi na kasema waufi wino wacisile vinjelengwe pa manso yakwe. Wene waomvizye vinjelengwe vii pa kusomba yao akweti cimanyililo ca cilyanyi na yao apefile unkolanya wa cilyanyi. Cilyanyi pamwi na kasema waufi yasumbilwe apuma muli yemba wa moto, muno mwapyanga maluti.

²¹ Vita vyao vyakomilwe nu lupanga luno lwafumile mu mulomo wakwe wino uwakwezile pa mfwalasi. Vyunyi vyonsi vyalile vyala vyao viikuta.