Umbwilo 17 - Amazwi Yakwe Leza 2013

¹ Nupya mungeli wenga pa angeli cinimbali yano akweti ngeso cinimbali aiiza kunondi ati, “Iza kuno, nga nani namakulanga kuvunukwa kwakwe cizelele wino wamanyikwa cuze. Wene uli musumba uno uwakulwa pipi ni nguzi zingi.

² Yakateeka amu nsi yacitanga uzelele nawe, nga na antu amu nsi wayakolesizye waini wa uzelele wakwe.”

³ Mupasi Wamuzilo antungulula, nga mungeli ansenda ku lwanga. Kuku akuno naweni mwanaci atenzi pa cilyanyi ciyenzu cino calemvilwepo mazina ya miponto kuli Leza. Cilyanyi cii cakweti mitwe cinimbali ni mpembe ikumi.

⁴ Mwanaci wazwite nsalu ziyenzulukile zyamutengo, nupya wazwite tuyembelo twakwe zaabu, mawe yamutengo ayengese, nga ni mbela. Mwi kasa lyakwe walemile lwako lwakwe zaabu ulwazilemo ivya uwelewele vino vyafumile mu uzelele wakwe.

⁵ Pa usyu wakwe palemvilwe izina lino lyakwata usenulo wa nkama likati, “Babiloni mukulu nyina wakwe yacizelele ni vya winyi vyonsi mu nsi.”

⁶ Naweni ukuti mwanaci wakolike uwazi wa antu yakwe Leza nga nu wazi wakwe yao akomilwe pamulandu wa kuyela Yesu. Lino naweni mwanaci nzunguka cuze.

⁷ Alino mungeli anguzya ati, “Pacani wazunguka?” Namakunena inkama ya mwanaci ni cilyanyi cino akwezilepo. Cilyanyi cii cakwata mitwe cinimbali ni mpembe ikumi.

⁸ Cilyanyi cino ukulola, mpiti cali nu umi, lelo ndakai cafwa. Cili pipi nu kufuma mu ciwina caula impela nu kupita ku kononwa. Antu yonsi amu nsi yano mazina yao yatalemvilwe mu lupapulo lwa umi kufuma ku uumbo wa nsi yalazunguka cuze lino yalalola cilyanyi. Yalazunguka pa kulola ukuti cali nu umi nga ndakai cafwa. Lelo cilatutuluka nu kuloleka nupya.

⁹ Mulinzile kuomvya mano kuti mwiluke nu kumanyikisya. Mitwe cinimbali ili myamba cinimbali pano mwanaci akaikala. Nupya mitwe kwene ali yakateeka cinimbali.

¹⁰ Yasano yafwa, wenga acili akuteeka, muze atali kuti aiize. Lino aliza wene alateeka pa kasita kanono sile.

¹¹ Cilyanyi cino cali nu umi lelo ndakai cafwa, cene ali kateeka uwalenga cinani, wamuli yakateeka cinimbali nupya akuya ku kononwa.

¹² “Mpembe ikumi zino wali walola, ali yakateeka ikumi yano atali yatandike kuteeka, lelo yalapeelwa maka akuteeka pamwi ni cilyanyi kulingana na aawa wenga.

¹³ Yakateeka ikumi yonsi yakwata ilango lyonga, nupya yakapela maka ni nsambu zyao ku cilyanyi.

¹⁴ Yalalwisya Mwana wa Mfwele. Lelo Mwana wa Mfwele alayacimvya, pano ali Mwene wakwe yamwene, kateeka wakwe yakateeka. Nupya antu yakwe aamwa, asololwe na a utailo yalacimvya pamwi nawe.”

¹⁵ Mungeli nupya anena navyuze ati, “Manzi yano wali walola pano cizelele atenzi, ali antu amu nko, ni mitundu ya antu, ni misango ya antu, nga ni ndimi.

¹⁶ Mpembe ikumi zino wali walola ni cilyanyi vilapata cizelele. Vilamupoka vyonsi vino wakwata nu kumusya tupu. Vilalya munyefu wakwe nu kumoca mu moto.

¹⁷ Pano Leza wiika mu myenzo yao kuti yafikilizye kulonda kwakwe na kuti yawikizyanye nu kupeela uwene wao ku cilyanyi kufika lino mazwi yakwe Leza yalafikiliziwa.

¹⁸ “Mwanaci wino wali walola ali musumba ukulu ukateeka yakateeka yonsi amu nsi.”