Umbwilo 15 - Amazwi Yakwe Leza 2013

¹ Nupya ndola cilangililo cikulu cakuzunguka nacuze mwiyulu. Angeli cinimbali yaloleka ala yakweti vilumbelo cinimbali. Vilumbelo vii ivyakusyalikizya, pano amuno ukali wakwe Leza wasilila.

² Alino ndola cimwi cikuloleka wakwe yemba musenguluke wi galasi, muminkane nu moto. Naweni na yao acimvizye cilyanyi nu unkolanya wakweco na wino mpendwa ikaimilila izina lyakwe. Antu yaa yaimi pa mbali yakwe yemba musenguluke wi galasi, ala yalemile mapango yano Leza wayapile,

³ nupya ala yakwimba lwimbo lwakwe Mose, muomvi wakwe, nga nu lwimbo lwa Mwana wa Mfwele, yati, “We Mwene Leza wa maka yonsi, milimo yako iikulu, nupya iyakuzunguka! We kateeka wa nko zyonsi, miyele yako iya ololoke nupya iya cumi!

⁴ Uzye aweni atangoopa we Mwene? Uzye aweni angakana kulanda ukulu wako? Wewe wenga sile waya uwamuzilo. Antu amu nko zyonsi yaliza nu kukupepa, pano micitile yako isi yalufyengo nupya ikaloleka kuli onsi.”

⁵ Pacisila cakwe vii naweni Ng'anda ikulu yakwe Leza mwiyulu ala yati yulwa, nupya mwali ni taalu lyakulanga ukuti Leza ali mwenemo.

⁶ Angeli cinimbali yano akweti vilumbelo cinimbali yafumile mu Ng'anda ikulu yakwe Leza, ala yati yazwala nsalu ziswepe nupya ziyengese. Yene yanyefile vimisipi vyakwe zaabu pa visao vyao.

⁷ Lyene ciumbwa conga pa viumbwa vyaumi vini cipela angeli cinimbali ingeso cinimbali zyazilemo ukali wakwe Leza wino uwa umi manda pe.

⁸ Ng'anda ikulu yakwe Leza yazilemo cunsi kufuma ku lulumbi na maka yakwe Leza, nga kutali uwakwingilamo suka lino vilumbelo cinimbali ivyacisilwe na angeli cinimbali vyasila.