Umbwilo 14 - Amazwi Yakwe Leza 2013

¹ Nupya ndola Mwana wa mfwele aimi pa mwamba wa Zioni. Wene wali pamwi na antu mazimbi mwanda onga makumi yani na yani (144,000) yano pa mausyu yao palemvilwe izina lyakwe nga ni zina lyakwe Isi.

² Alino nuvwa izwi kufuma mwiyulu lino lyuvwikike wa kupooma kwa manzi aingi, nupya wa kupangalansya kwa mvula kukulu. Lyuvwikike wa lwimbo ulwimbwangwa na yakiimba yano akulizya mapango.

³ Antu yao imbanga lwimbo lupya nkolelo ya cilimba ca wene na pa manso ya viumbwa vini vyaumi na pa manso ya ikolo. Kutali umwi uwasambilile lwimbo luu suka sile antu mazimbi mwanda onga makumi yani na yani yano akulwilwe kufuma mu nsi.

⁴ Yaa, ali antu ataikowizye na anaci, pano yatatazile yamanye anaci. Yene yalondelanga Mwana wa Mfwele konsi kuno akuya. Yene yakulwilwe kufuma pa antu yonsi asyala kuti yaye ankolelo kupelwa kuli Leza nu ku Mwana wa Mfwele.

⁵ Yatatazile yalande intumpu. Yene yatakweti mulandu.

Kulanda pa Angeli Yatatu

⁶ Nupya ndola mungeli muze akupapuka mwiyulu papelapela, ala asenzile Landwe Lisuma lya manda pe kuti akalande ku antu amuno nsi amisango yonsi, mitundu, ni ndimi ni nko zyonsi.

⁷ Alino avwanga ni zwi likulu ati, “Oopini Leza nu kulumbanya ukulu wakwe! Pano insita yatifika yakuti wene apingule antu! Pepini wino uwaumvile iyulu ni nsi, yemba nu tufukoka twa manzi.”

⁸ Mungeli wakwe ciili alondela pa wankolelo, ala akuti, “Watawa! Babiloni mukulu watawa! Wene wamwesya antu yonsi waini mulume uwa ulenzyo wakwe.”

⁹ Mungeli wakwe citatu alondela pa angeli yankolelo yaili, avwanga ni zwi likulu ati, “Wino wensi akapepa cilyanyi nu unkolanya wakweco nga nu kupokelela cimanyililo caciko pa usyu wakwe nanti pi kasa lyakwe

¹⁰ wene alamwa waini wa ukali wakwe Leza. Waini wa cipyu cakwe wino wapongolwela mu lwako ulwa ukali wakwe ukwaula kucefiwa maka. Wene alasumbwa nu kupya mu moto na maluti pa manso ya angeli yakwe Leza nu Mwana wa Mfwele. Wene alasumbwa mu moto na maluti pa manso ya angeli amuzilo nu Mwana wa Mfwele.

¹¹ Cunsi ca moto uno ulayoca cilakwela mupela manda pe. Kusi upemwilo musanya nu usiku kuli yao akapepa cilyanyi nu unkolanya wakweco, nga nu ku muntu wensi akweti cimanyililo ci zina lyaciko.”

¹² Acino mwe antu yakwe Leza mulinzile kuposya mwe muno mukayela masunde yakwe Leza nu kutaila muli Yesu.

¹³ Nupya nuvwa izwi kufuma mwiyulu likuti, “Lemba ukuti, Alongo ayao yano kufuma ndakai yakufwila mu kutumikila Mwene!” Mupasi Wamuzilo nawe ati, “Endi! Yene yalailyokezya kupuza ku kuombesya kwao, pano milimo yao isuma ikuyalondela.”

Insita ya Kuzombola Yatifika

¹⁴ Nupya ndola ikumbi litiswe, nga pi kumbi patenzi umwi uwalolike wa Mwana wa muntu, ala azwite ingala yakwe zaabu nupya alemile cikwakwa cikali.

¹⁵ Alino mungeli afuma mu Ng'anda ikulu yakwe Leza nga apunda ni zwi likulu kuli wino uwatenzi pi kumbi ati, “Tola cikwakwa cako uciomvye mu kuzombola, pano insita yatifika. Vilimwa vyati vica kulingana nu kuzombolwa!”

¹⁶ Lyene wino uwatenzi pi kumbi apisya cikwakwa cakwe mu nsi, nga vilimwa vyamu nsi vizombolwa.

¹⁷ Nupya ndola mungeli muze akufuma mu Ng'anda ikulu yakwe Leza mwiyulu, nga nawe kwene alemile cikwakwa cikali.

¹⁸ Lyene kwiza mungeli muze wino ali na maka pa moto wino wafumile ku kavuwa. Alino apunda ni zwi likulu ku mungeli wino wakweti cikwakwa cikali ati, “Tola cikwakwa cako ciomvye mukuputula matingi mu calo ca matingi ca mu nsi, pano matingi yati yaca!”

¹⁹ Caleka mungeli apisya cikwakwa cakwe mu nsi, aputula matingi, nga ayasumbila mu ciwina cakufenelamo matingi ca ukali wakwe Leza.

²⁰ Alino matingi yafenwa mu ciwina cakufenelamo kunzi ya musumba. Alino uwazi ufuma mu ciwina cakufenelamo uno wizile uya kwati luzi luno mu utali lwali makilomita myanda itatu nu kuzika kwakwelo kwali manye mamita yaili.