Umbwilo 13 - Amazwi Yakwe Leza 2013

Vilyanyi viili

¹ Nupya ndola cilyanyi cikufuma muli yemba. Cene cakweti impembe ikumi ni mitwe cinimbali, nga cila lupembe pali ingala. Nupya cila mutwe palemvilwepo izina lya miponto kuli Leza.

² Cilyanyi calolike wa nangu, ni ngazo zyakweco wakwe zyakwe ciuli, nu mulomo wali wa mulomo wakwe cisama. Cizoka cipela maka ni cilimba ca wene nu utesi ku cilyanyi.

³ Umutwe onga uwa cilyanyi walolike ni cilonda cakuleta imfwa, lelo calanga icipola. Antu yonsi amu nsi yalondela cilyanyi ala yakuzunguka.

⁴ Cila muntu wapefile cizoka pano cene capile maka akuteeka ku cilyanyi. Alino yapepa ni cilyanyi kwene yati, “Uzye aweni akoline wa cilyanyi? Uzye aweni angalwa naco?”

⁵ Cilyanyi cizumiliziwa kuvwanga mazwi akuilumba nupya a miponto kuli Leza. Nupya cizumiliziwa kuti ciye na maka akuteeka kulingana ni myezi makumi yani na iili.

⁶ Citandika kutuka Leza, izina lyakwe ni ncende ino akaikalamo, nga na onsi akaikala mwiyulu.

⁷ Cene cizumiliziwa kulwa na antu yakwe Leza nu kuyacimvya, nupya cipelwa amaka akuteeka pa mitundu yonsi, ni nko, ni ndimi, nga ni misango yonsi ya antu.

⁸ Antu yonsi akaikala pano nsi yalacipepa, suka sile antu yano mazina yao yalemvilwe mu lupapulo lwa umi kufuma lino insi itali iumbwe, ulwa Mwana wa Mfwele wino uwakomilwe.

⁹ “Ndi umwi ali na matwi yakuuvwa, auvwe!

¹⁰ Wino wensi ali nu kuya mu uzya, alasendwa mu uzya. Wino wensi akakoma ku lupanga, alinzile akomwe ku lupanga. Ku antu yakwe Leza paa yalinzile kuposya nu kukwata utailo.”

¹¹ Alino ndola cilyanyi nacuze, cikufuma mu musili. Cene cakweti mpembe ziili wa mwana wa mfwele, nga ala cikuvwanga wa cizoka.

¹² Cene caomvizye maka aingi a cilyanyi ca kutandika pa manso yakweco. Cipatikizya insi na onsi akaikalamo kuti yapepa cilyanyi ca kutandika, cino cilonda caciko cakuleta imfwa calanga capola.

¹³ Cilyanyi cii cakwe ciili cicita vinjelengwe vikulu cuze. Cileta umoto pano pa nsi kufuma mwiyulu na antu yonsi yala yakulola.

¹⁴ Nupya cisomba antu yonsi akaikala pano pa nsi ku vinjelengwe vino cazumiliziwe kucita pa manso ya cilyanyi ca kutandika. Cilyanyi cinena antu kupanga unkolanya kuti yacindikilemo cilyanyi cino yacisa ku lupanga lelo cili nu umi.

¹⁵ Cilyanyi cakwe ciili cazumiliziwe kuputa mupu uno ukapeela umi mu unkolanya wa cilyanyi ca kutandika, kuti unkolanya ungalanda nu kukomisya yao yonsi akukana ukucipepa.

¹⁶ Cilyanyi cipatikizya antu yonsi anono na akulu, akama na apina, azya na antungwa kuti ikilwe cimanyililo pa makasa yao ailunji nanti pa mausyu yao.

¹⁷ Kusi umwi wakuti akale nanti akazye suka sile ndi akweti cimanyililo cii, kuli kuti izina lya cilyanyi nanti mpendwa ino ikwimilila izina lilyo.

¹⁸ Mulinzile kuomvya mano kuti mwiluke. Wino wensi mucenjele angapituluka nu kuzana vino mpendwa ya cilyanyi ikusenula, pano mpendwa ikaimilila izina lya muntu. Ni mpendwa yakwe myanda mutanda na makumi mutanda na mutanda (666).