Umbwilo 12 - Amazwi Yakwe Leza 2013

¹ Nupya mwiyulu mwalolike cimanyililo cikulu. Mwalolike umwanaci wino cizwalo cakwe cali ilanzi. Mwezi wali pisika lya ngazo zyakwe, na pa mutwe wakwe pali ingala ya wene ya ntanda ikumi na zili.

² Wene wali ni ndilwa ala akulila nu kunyunguluka mukuwaika kwa umbuza, nu kunyunguluka kwa pa kulela.

³ Nupya mwiyulu muloleka cimanyililo nacuze. Ndola cizoka cikulu cuze nupya ciyenzu cakweti mitwe cinimbali ni mpembe ikumi, nga ni ngala ya wene yali pali cila mutwe.

⁴ Cene caomvizye musinda pa kukuwa ciputulwa conga mu viputulwa vitatu vya ntanda, icizifumya mwiyulu nu kuzisumba pano pansi. Cizoka cii caimi nkolelo ya mwanaci pakuti cilye umwana wakwe zuwazuwa lino wavyalwa.

⁵ Lyene umwanaci avyala umwana monsi, wino walinga kuteeka inko zyonsi ku nsonzo ya cela. Lelo mwana yamusompola yamusenda kuli Leza nu kumwika pa cilimba cakwe ca wene.

⁶ Mwanaci nawe autukila ku lwanga, ku ncende ino Leza wamuteyanyizizye kuno wasunzilwe pa manda izimbi lyonga myanda iili na makumi mutanda (1,260).

⁷ Nupya mwiyulu mukatuka ulwi. Mikaeli na angeli yakwe yalwisyanya ni cizoka nga cizoka pamwi na angeli yakweco yalwisyanya nao.

⁸ Lelo cizoka na angeli yakweco yacimviwa cakuti yatakweti pa kwikala mwiyulu.

⁹ Cizoka cikulu cisumbwa pansi. Cene cili cizoka ca mpiti cino yakati Ciwa, nanti Satana, wino akasomba antu amu nsi. Wene pamwi na angeli yakwe yonsi yasumbwa pano nsi.

¹⁰ Nupya nuvwa izwi likulu mwiyulu likuti, “Ndakai Leza watatutuula! Leza watalanga maka yakwe nu wene wakwe! Ndakai Katuula wino wasolola watalanga maka yakwe! Pano wiyo akapeela aina itu milandu wene wasumbwa pano nsi, wino musanya nu usiku akayapeela milandu nkolelo yakwe Leza witu.

¹¹ Aina itu yamucimvizye ku wazi wa Mwana wa mfwele, nu ku mazwi ya umboni uno yapile. Yene yaipezile cuze cakuti yatoopanga nanti kufwa.

¹² Acino zangini mwe mayulu na mwe muno mwikalamo! Lelo kalanda ku amu nsi na yemba! Pano Ciwa watasumbwa pa nsi kunomuli, nupya ali nu ukali cuze pano amanyile ukuti watasyala sile ni nsita inono.”

¹³ Lino cizoka camanya ukuti cati cisumbwa pano nsi, citandika kuzinganya umwanaci u waviile umwana umonsi.

¹⁴ Mwanaci wapilwe maapa yaili yakwe lyang'anda kuti apapuke aye ku ncende yakwe mu lwanga. Mu amuno alasungwa ningo pa myaka itatu na citika, ukoopa kuti cizoka cingamonona.

¹⁵ Alino cizoka ciswila mwanaci manzi aingi kufuma mu mulomo wakweco kwati luzi, kuti mukuku umusende.

¹⁶ Lelo musili nao wazwilizya mwanaci. Musili wasama nu kumila manzi afumile mu mulomo wa cizoka.

¹⁷ Cizoka cisokela mwanaci cuze, nga cipita ku kulwisya ana yakwe onsi, ku antu yonsi akayela masunde yakwe Leza, nupya akapeela umboni wa pali Yesu.

¹⁸ Alino cizoka cimilila pa nkumba yakwe yemba.