Umbwilo 11 - Amazwi Yakwe Leza 2013

¹ Pacisila cakwe cico yampela cakupimila cikoline ni nsonzo, nga mungeli anena ati, “Yanga ukapime Ng'anda ikulu yakwe Leza pamwi na kavuwa, nu kupenda yao akupepa mwenemo.

² Lelo utapima misolo ya kunzi, pano yene yapeelwa ku antu Akulukuwa, yene yalalyatola Musumba Wamuzilo kulingana ni myezi makumi yani na iili.

³ Nani ndatuma yakambone yane yaili ale yazwite masaaka, yene yalakosola ilandwe lyakwe Leza mu manda kulingana ni zimbi lyonga, myanda iili na makumi mutanda (1260).”

⁴ Yakambone yaa yaili yene ili miti iili ya miolivi nga ni vyakutekapo inyali viili ivyaya ku nkolelo ya Mwene uwateeka insi yonsi.

⁵ Umuntu umwi ndi wezya kucisa yakambone yaa yaili, umoto ulafuma mu milomo yao nu konona anisi yao. Mu musango uli onga kwene, wensi alezya kuyacisa wene alakomwa.

⁶ Yakambone ya yali na maka akuyala iyulu kuti imvula itaca itonye mu nsita yakusema kwao. Nupya yakweti maka pa manzi kuyasenula yaye uwazi, nupya yakweti maka akuponyezya insi vilumbelo vya misango yonsi pa nsita yonsi ino yakasi.

⁷ Lyene lino yalamala kupeela umboni wao, cilyanyi cino cilafuma mu ciwina caula impela cilayalwisya. Cene cilayacimvya nu kuyakoma,

⁸ vyala vyao vilasyala vilambalile mu museo uwamu musumba ukulu, muno Mwene wao watanyilwe pa lupanda. Izina lya musumba uwa mwi syente ukaamwa ukuti Sodoma, nanti Eguputo.

⁹ Antu kufuma mu nko zyonsi, mitundu, indimi, nga ni misango yonsi ya antu yalalola ivyala vyao pa manda yatatu na citika nupya yatalazumilizya kuti vizikwe.

¹⁰ Antu yonsi amu nsi yalazanga pamulandu wa mfwa yakwe yakambone yaa yaili. Yene yalazevya nu kutumilana mawila, pano yakasema yaa yaili yalesile macuzi aingi pa antu.

¹¹ Pacisila ca manda yatatu na citika umupu uno ukapeela umi wizile kufuma kuli Leza wingila munoyali, nga yakatuka, na yao yonsi aweni yuvwile intete

¹² Alino yakasema yaili yuvwa izwi likulu kufuma mwiyulu liti, “Izini kuno kupeela!” Lino anisi yao yacili yakulolekesya, yene yakatuka yaya mwiyulu mwi kumbi.

¹³ Pa nsita kwene ilya kwali cilundumusi cikome cuze, nga ciputulwa conga mu viputulwa ikumi vya musumba ciwa conononeka, lyene na antu mazimbi cinimbali yafwile ku cilundumusi. Na antu yauze asile yuvwile intete cuze nu kulumbanya ukulu wakwe Leza wa mwiyulu.

¹⁴ Kalanda kakwe cili kapita, lelo kalanda kakwe citatu kakwiza zuwa!

Ntandala yalenga cinimbali

¹⁵ Nupya mungeli uwalenga cinimbali alizya ntandala yakwe, ngu mwiyulu muvwika mazwi akulu yati, “Ndakai akweti amaka akuteeka insi u Mwene witu na Katuula, nupya wene alateeka manda pe!”

¹⁶ Lyene aikolo makumi yaili na yani, yano akaikala pa vilimba vyao inkolelo yakwe Leza yafukama nu kukontamika vinso vyao nga yapepa Leza

¹⁷ yati, “We Mwene Leza uwa maka onsi, we muno ulipo nupya uwalipo! Twakutaizya pano watupoka maka yako nu kutandika kuteeka!

¹⁸ Antu atakuzumila yali ni cipyu lelo insita ya ukali wako yatifika. Ii ili nsita yakuti afwe yapingulwe. Insita yatifika ya kupeela vilambu ku yaomvi yako, yakasema nu ku antu yako yonsi yano akucindika, akulu na anono kwene. Insita yatifika ya konona yao akaonona insi!”

¹⁹ Mulyango wa Ng'anda ikulu yakwe Leza mwiyulu wayuzilwe nga ni Mbokosi ya Upangano yalolike mukasi ka Ng'anda ikulu yakwe Leza. Kwali kumyansya kwa nkuwa nu kuvwa kupangalansya. Alino kuya ni cilundumusi nga ni citalawe cikulu.