Umbwilo 10 - Amazwi Yakwe Leza 2013

¹ Nupya ndola mungeli namuze uwa maka ala akwika kufuma mwiyulu. Wene wakufilwe mwi kumbi nu mulalamfuti wazingulwike mutwe wakwe. Cinso cakwe calolike wi lanzi, ni ngazo zyakwe zyalolike wa cimbilimbili ca moto.

² Wene wakweti kalupapulo kanono kano kali akakupulwe mwi kasa lyakwe lilunji. Wene alyata lwazo lwakwe lwilunji pali yemba nga nu lwimani pa musili,

³ nga apunda ni zwi likulu lino lyuvwikanga wa cilulumo cakwe yacisama. Pacisila cakupunda, kwali kupangalansya maila cinimbali.

⁴ Lilyo kwene lino kupangalansya kwasila, nali pipi nu kulemba vino vyalanzilwe. Lelo nuvwa izwi kufuma mwiyulu likunena liti, “Sunga inkama pali vino kupangalansya cinimbali kwati kulanda. Utalemba!”

⁵ Lyene mungeli wino naweni aimi pali yemba na pa musili atumpula ikasa lyakwe kwiyulu

⁶ nu kucita mulapo mwi zina lyakwe Leza wino uwaya umumi pe na pe. Leza kwene wii uwaumvile iyulu na vyonsi vyayamo, insi na vyonsi vyayamo yemba na vyonsi vyayamo. Mungeli avwanga nu mulapo ati, “Kutalaya kulengezya nupya!

⁷ Lelo lino mungeli uwalenga cinimbali alalizya ntandala yakwe, lyene Leza alafikilizya kuteyanya kwakwe ukwa nkama, ndi vino walavile kuli yakasema aomvi yakwe.”

⁸ Lyene izwi lino nuvwile kufuma mwiyulu nupya ilinena liti, “Pita katole kalupapulo kanono akakupulwe kano akali mwi kasa lya mungeli wino lwazo lwakwe longa lulyasile pali yemba nu luze pa musili.”

⁹ Alino nani naile ku mungeli imulenga kuti ampeele kalupapulo kanono. Nawe anena ati, “Tola ulye. Kene kamaya akalule munda yako. Lelo mu mulomo wako mwene kamaya akalyompe wa uci.”

¹⁰ Lyene ntola kalupapulo kanono kufuma mwi kasa lyakwe, indya nga mu mulomo wane kuvwika kalyompe wa uci. Lelo pacisila lino nakamila, kene kuvwika kalule munda yane.

¹¹ Lyene anena ati, “Nupya kwene ulinzile kukosola Ilandwe lyakwe Leza pamulandu wa antu amu nko zingi, misango ya antu aingi, indimi, na yakateeka aingi.”